Malunga Kanaasongwela Kuli Katongonoshi

YENA muhasa kumona katongonoshi yoze unatemuka, anamika munwe kuli umwe wa kuli malunga wano? Katongonoshi kanakasoloka muze ayo ahichikile Yerusaleme. Malunga wano kaneza ku chivumbuko, nawa ayo te kakulilongesa hakutwala ku tutongonoshi. Ayo te kanatayiza ngwo katongonoshi yono mwaha maatwala kuli umwe mutu mulemu.

Muze malunga jacho yaheta ku Yerusaleme, ayo yahula ngwo: ‘Kuli ali mwana-kemba yoze wasemuka hanga apwe mwanangana wa A-Yunda? “A-Yunda” lili jina likwo lia A-Izalele. ‘Malunga jacho yamba ngwo: ‘Chitangu yetwe twamonanga katongonoshi wa mwana ku chivumbuko, kashika tweza hanga tumuwayile.’

Muze Heronde, mwanangana wa mu Yerusaleme, evwile hakutwala kuli mwana wacho yalipikala chinji. Iye te kaso kuzanga mwanangana mukwo ha chihela chenyi. Heronde yasanyika asasendote akwa lutwe nawa yaahula ngwenyi: ‘Kuli anakalakenya ngwo mwanangana masemukina? Ayo yakumbulula ngwo: ‘Mbimbiliya yinambe ngwo mu Mbeteleme.’

Hohene, Heronde yatambika malunga waze ejile ku chivumbuko, nawa yaamba ngwenyi: ‘Yenu hanga nufupe mwana-kemba wacho. Muze yenwe munumuwana, munuhiluka kuli yami hanga nungutoweze. Ni yami ngunazange kuya hanga ngumuwayile.’ Alioze, Heronde te kanazange ngwo muze mawana mwana wacho hanga amushehe!

Katongonoshi yatwala malunga jacho ndo ku Mbeteleme, mba yamana ha chihela chize te hali mwana. Muze malunga jacho yanjila mu zuwo, ayo yawana Maria ni kanuke Yesu. Ayo yatuhwisa yawana yayihana kuli Yesu. Yehova yatoweza malunga jacho ku chilota ngwo kanda ahilukila kuli Heronde. Mba hi ayo yafuna ku chifuchi cho mu jila yeka.

Muze Heronde yanyingika ngwo malunga waze ejile kuchivumbuko hafuna ku mazuwo jo, iye yevwa uli unji. Kashika iye yatuma, hanga ashehe ana eswe a malunga mu Mbeteleme waze te ali ni miaka yaali. Alioze Yehova yalianga kutoweza Yosefwe ku chilota, mba Yosefwe yaya ni asoko jenyi ku Engitu. Kulutwe lia matangwa, muze Yosefwe hanyingika ngwo Heronde hafwa, mba iye yanda Maria ni Yesu yijifuna ku Nazare. Kwenako kwe Yesu anakakolela.

Yena unanyingika iya yoze unakasolola katongonoshi wacho mwaha? Euluka, ngwo malunga jacho chitangu kayile mu Yerusaleme muze ayo amwene katongonoshi wacho. Satana Ndiapu te kanazange kushaha Mwana wa Zambi, nawa iye te kananyingika ngwo Heronde Mwanangana wa Yerusaleme mahasa kumushaha. Kashika muchihasa kupwa, ngwo Satana mwe wasolwele katongonoshi wacho.