Mu Chimwe Chipatulo Cha Kwilu

TE TANGWA liamawana ha ufuku, nawa te hikwapalika matangwa aali. Yesu ni apostolo jenyi 12 yaya mu chipatulo cha kwilu hanga alilemo Chizomboka. Lunga yoze unamono unatuhuka kali Yundase Ka-Keriote. Iye kanayi ni kulweza asasendote chize ayo mahasa kukwata Yesu.

Ha tangwa lia kunyima, Yundase kanakaya ni kuhula asasendote ngwenyi: ‘Yika munungwaha nyi nanukwasa kukwata Yesu?’ Ayo yamba ngwo: ‘Mutukwaha makumi atatu a mbongo ja prata.’ Kashika haliapwila Yundase kanayi ni kuliwana ni malunga jacho hanga aanehe haze ali Yesu. Nyonga lino lipi, nyi ngwami?

Chiwanyino cha Chizomboka yichihwa. Hazehene Yesu yaputuka ni chiwanyino cheka chipema. Iye yahana lumbolo kuli apostolo jenyi nawa yamba ngwenyi: ‘Lienu, mumu chino chinalumbuka mujimba wami muukapwa kuhana hali yenwe.’ Iye yahana nawa umwe musenge wa vinyu nawa yamba ngwenyi: ‘Nwenu, mumu chino chinalumbuka manyinga jami waze maakapwa kumwanga hali yenwe.’ Mbimbiliya yinachivuluka ngwo, ‘chiwanyino cha Mwene cha ufuku’ hanji ‘ceia ya Mwene.’

A-Izalele te kakulinga Chiwanyino cha Chizomboka hanga euluke muze mungelo wa Zambi ‘apalikile helu’ lia mazuwo jo mu Engitu, alioze yashaha tupula-majimo eswe ku mazuwo ja A-Engitu. Mba alioze, haliapwila Yesu kanazange hanga tumbaji twenyi apwe ni kumweuluka, nawa ngwo iye kanakahana mwono wenyi hali ayo. Kashika iye yaalweza hanga apwe ni kweuluka chiwanyino chacho chipema ha miaka yeswe.

Chiwanyino cha Mwene cha Ufuku muze te hichahwa, Yesu yamba kuli apostolo jenyi hanga ajikize hamwe ni ufulielo unji. Hi kusongo, ayo yahalisa Zambi ni miaso, mba ayo yafwambuka. Te hikwatoka chinji, kota te ha muchima ufuku. Tutalenu kuze ayo anakaya.