Yikungulwila Yeswe “Yapwile ni Sambukila”

1, 2. Yika Saulu azangile kulinga ku Ndamaseku?

MALUNGA a ufwatulo unji kanakundama ku Ndamaseku, o kanazange kulinga chuma chimwe chipi chinji. Tumbaji twa Yesu maakambulumuna ku mazuwo jo, maakakasa ni kwevwisa sonyi, maakatwala ku Yerusaleme hanga aasopese mu Chota cha Akwa-Kuyula A-Yunda.

² Yoze unasongwela malunga jacho kali Saulu, yoze uli ni yipeka ya manyinga ku moko.a Ha shimbu likepe kunyima, iye kamona chize atu waze te anyingika ashiha kambaji ka Yesu, Eshetevau. (Yili. 7:57–8:1) Saulu kaputukile kuhungumiona tumbaji twa Yesu waze te atwama mu Yerusaleme. Chipwe chocho, yalihana nawa hanga ahungumione tumbaji twa Yesu waze apwile ku yihela yikwo. Saulu kazangile kunongesa uwayilo weswe te avuluka ngwo, “Jila ya Mwene”—Yili. 9:1, 2; tala mushete unambe ngwo, “Chiyulo Chize Saulu Apwile Nacho ku Ndamaseku.”

3, 4. (a) Yika yalingiwile kuli Saulu muze te anayi ku Ndamaseku? (b) Yihula yika mutukumbulula mu longeso lino?

³ Susumuku, Saulu mamona limwe pangu. Atu waze anayi no mu wenyi no mamona pangu liacho alioze, mahola kuluu, chakuhona kuhanjika nichimwe. Saulu mapwa kapuputa mba malimbuka hashi. Chakuhona kumona nichimwe chuma, iye mevwa limwe liji linene lia kukatuka mwilu ngwo, “Saulu, Saulu, mumu liaka unanguhungumiona?” Saulu makumbulula ni woma ngwenyi: “Yena iya?” Kumbululo lize Saulu mevwa mulimuvwisa nawa woma unji. “Yami Yesu, yoze unahungumiona.”—Yili. 9:3-5; 22:9.

⁴ Yika mutuhasa kulilongesa ha maliji atangu waze Yesu ambile kuli Saulu? Kuchi mutuhasa kuyuka ha kuhengwola yuma yize yalingiwile muze mukwa-kuhungumiona yono alumukine? Yika mutuhasa kulilongesa ha chize chikungulwila cha Akwa-Kristu chazachishile mashimbu a sambukila muze Saulu apwile kambaji ka Yesu?

“Mumu Liaka Unanguhungumiona?” (Yilinga 9:1-5)

5, 6. Yika mutuhasa kulilongesa ha yize Yesu ambile kuli Saulu?

⁵ Muze Yesu ahanjikile ni Saulu mu tapalo linayi ku Ndamaseku, kakamuhulile ngwenyi, mumu liaka unahungumiona tumbaji twami, alioze, kamuhulile ngwenyi: “Mumu liaka unanguhungumiona?” (Yili. 9:4) Chino chinasolola ngwo, muze akwa-kole akuhungumiona tumbaji twa Yesu, chakupwa ngwe kanahungumiona Yesu mwene.—Mateu 25:34-40, 45.

⁶ Nyi kanakuhungumiona mumu lia kufuliela muli Kristu, pwako ni shindakenyo ngwe, Yehova ni Yesu kananyingika yize unapalika. (Mateu 10:22, 28-31) Hanji muchihasa kupwa ngwe kapinda yoze unapalika kechi kumuhwisa shimbu lizeliene. Iwuluka ngwe, Yesu kamwene Saulu muze akwashile kushiha kambaji kenyi Eshetevau, ni muze ambulumwine tumbaji twenyi akwo mu Yerusaleme. (Yili. 8:3) Chipwe chocho, Yesu kakahwishile lamba lio ha shimbu lizeliene. Nihindu Yehova kupalikila muli Kristu, yahana tachi kuli Eshetevau ni kuli tumbaji akwo hanga anunge ni kushishika kuli iye.

7. Yika watamba kulinga mba ununge ni kunyongonona mu yihungumiona?

⁷ Muhasa kunyongonona chipwe muze anakuhungumiona. Tala chize muhasa kuchilinga: (1) Nunga ni kushishika kuli Yehova, chipwe ngwe mukulingiwa chuma cheswacho. (2) Eta ukwaso wa Yehova. (Fwili. 4:6, 7) (3) Hichika yuma yeswe mu moko ja Yehova. (Roma 12:17-21) (4) Fuliela ngwe, Yehova makwaha tachi hanga ununge ni kunyongonona mu yihungumiona, ndo muze mahwisa kapinda wacho.—Fwili. 4:12, 13.

“Ndumbwami Saulu, Mwene Yesu . . .Kangutuma” (Yilinga 9:6-17)

8, 9. Kuchi kota Ananiya alivwile mumu lia chiteli chize amuhele?

⁸ Muze te hakumbulula chihula cha Saulu chakwamba ngwo, “yena iya?” Yesu yamulweza ngwenyi: “Katuka unjile mu mbonge, mba makulweza yize watamba kulinga.” (Yili. 9:6) Saulu yamutwala ku zuwo kuze te atamba kutwama, kuze alitwaminyine kulia ha matangwa atatu. Ha shimbu liacho, Yesu yahanjika ni ananiya kambaji kenyi yoze te watwama ku Ndamaseku hakutwala kuli Saulu.—Yili. 22:12.

⁹ Ananiya kota kanyongene yuma yinji muze amwene Yesu Kristu yoze ahindwishile, kanahanjika nenyi hanga amwehe chimwe chiteli chalipwila. Achize chapwile chiwape chinene, alioze chiteli chikalu. Muze evwile ngwenyi te katamba kuhanjika ni Saulu, Ananiya yakumbulula ngwenyi: “Mwene, nakwivwa atu anji akuhanjika hakutwala kuli lunga yono, ni yuma yipi yize iye akulinga kuli asandu je mu Yerusaleme. Iye kejile kuno ni chiyulo chize amuhele kuli asasendote a lutwe cha kukwata atu eswe waze akutambika mu jina lienu.”—Yili. 9:13, 14.

10. Yika twalilongesa ha chize Yesu ahanjikile ni Ananiya?

¹⁰ Yesu kakahishile Ananiya mumu lia kusolola kulihulumba chenyi. Alioze, kamuhele usongwelo uze te muumukwasa kumanununa chiteli chenyi. Kamusolwele vumbi ha kumulumbunwina mumu liaka te atamba kumanununa chiteli chacho. Yesu yamulweza hakutwala kuli Saulu ngwenyi: “Lunga yono hapwa ngwe chikwachilo kuli yami chize hingunatongola kulu akatwale jina liami kuli akwa-mavungu, ni mianangana ni ana ja Izalele. Mumu mungumulweza lamba lieswe lize makamona mumu ha jina liami.” (Yili. 9:15, 16) Ha shimbu lizeliene, Ananiya yakaula yize Yesu amulwezele. Yaliwana ni Saulu ni kumulweza ngwenyi: “Ndumbwami Saulu, Mwene Yesu yoze wasolokele kuli yena mu jila yize wejile, kangutuma hanga ulaule meso je uzale too ni spiritu yisandu.”—Yili. 9:17.

11, 12. Yika twalilongesa ha lusango wa Yesu, Ananiya ni Saulu?

¹¹ Twalilongesa yuma yinji ha lusango wa Yesu, Ananiya ni Saulu. Ngwe chilweza, Yesu kanasongwela mulimo wa kwambujola ngwe chize alakenyene. (Mateu 28:20) Chipwe ngwe musono keshi kuhanjika ni atu, nihindu Yesu kakusongwela mulimo wa kwambujola kupalikila muli ndungo washishika wakanyama yoze atongwele hanga alise atu jenyi ha matangwa wano. (Mateu 24:45-47) Kupalikila mu usongwelo wa Chizavu cha Tusongo, akwa-kwambujola, mapionelu ni mishionaliu kakwatuma hanga awane atu waze anazange kunyingika hakutwala kuli Yesu Kristu. Ngwe chize hitwamona kulu ha kapitulu wapalika, atu anji kakulemba kuli Zambi hanga aakwase kukundama kuli iye. Kashika, ha kupalika cha shimbu likehe Yela ja Yehova kakungongwela ku mazuwo ja atu jacho.—Yili. 9:11.

¹² Ananiya kamuwahishile mumu kamanunwine chiteli chize amuhele. Shina wakwononokena shimbi ya kuya ni kwambujola chipwe ngwe mulimo wacho wakusoloka ngwe uli ukalu? Kuli amwe, kwambujola ku zuwo ni zuwo ni kuhanjika ni atu waze kanyingikine chakwasakalalisa. Eka, chakwapwila chikalu kwambujola ku yihela yakulanjishila, ha mbunga hanji ku telefone. Ananiya kakumbile woma wenyi, kashika apwile ni chiwape cha kukwasa Saulu kutambula spiritu yisandu.b Ananiya kahashile kumanununa chiteli chenyi mumu kajikijilile muli Yesu ni kumona Saulu ngwe yoze mahasa kupwa ndumbwenyi wa ku ufulielo. Chizechene ngwe Ananiya, ni yetu mutuhasa kukumba woma nyi twajikijila mu usongwelo wa Yesu, kulisa mu chihela cha waze twakwambulwila ni kumona waze akutuvwisa woma ngwe waze mahasa kupwa mandumbu jetu a ku ufulielo.—Mateu 9:36.

“Iye Yaputuka Kwambujola Hakutwala Kuli Yesu” (Yilinga 9:18-30)

13, 14. Nyi wakulilongesa Mbimbiliya mba kanda achikupapachisa, kuchi muhasa kwimbulula Saulu?

¹³ Saulu yaputuka kukaula yuma yize alilongesele. Muze amulawishile meso, yamupapachisa ni kuputuka kulikungulula ni tumbaji ku Ndamaseku. Iye kasulilile hazehene. Mbimbiliya yinambe hali Saulu ngwo: “Yaputuka kwambujola mu masunangonga hakutwala kuli Yesu ngwo, iye Mwana wa Zambi.”—Yili. 9:20.

¹⁴ Nyi wakulilongesa Mbimbiliya mba kanda achikupapachisa, shina muhasa kwimbulula Saulu ha kukaula yuma yize unalilongesa? Kwamba umwenemwene, chikomokeso chize Saulu amwene chamukwashile kwalumuna mwono wenyi. Alioze, atu anji waze amwene yikomokeso ya Yesu kakalingile chocho. Chakutalilaho, A-Fwariseu amwe, kamwene muze Yesu awukile lunga yoze wapwile ni kwoko liasosewa. Chikwo nawa, A-Yunda anji kapwile ni shindakenyo ngwo, Yesu kahindwishile Lazaru, nihindu o yanunga ni kukalisa mbunge jo ni kumuhamika. (Marku 3:1-6; Yoa. 12:9, 10) Alioze, Saulu kahashile kwalumuna mwono wenyi. Mumu liaka? Mumu kapwile ni kuvwila woma Zambi kuhiana atu ni kusakwilila chinji ha keke yize Yesu amusolwele. (Fwili. 3:8) Nyi wembulula chilweza cha Saulu, kukuchi kupwa nichimwe chuma chize muchikukwika kwambujola sango ja Wanangana ni kulihana hanga akupapachise.

15, 16. Yika Saulu alingile mu masunangonga, mba yika A-Yunda azangile kumulinga?

¹⁵ Mbunga kevwile uli unji muze anyingikine ngwo, Saulu kanambujola mu masunangonga hakutwala kuli Yesu. Kashika, o yahula ngwo: “Lunga au hi yoze ko washihile atu waze te akutambika jina lia Yesu mu Yerusaleme nyi?” (Yili. 9:21) Muze alumbunwine chilumbu chaka alumwine kunyonga chenyi hali Yesu, Saulu ‘yaasolwela ni shindakenyo ngwenyi, Yesu mwe Kristu.’ (Yili. 9:22) Alioze, kuhanjika wika ni shindakenyo kuchishi kwalumuna manyonga ja atu waze anazange kulikwachilila ku mianda yo hanji kulinangamisa.

¹⁶ Chipwe ngwe te hikwapalika miaka yitatu, nihindu A-Yunda waze apwile ku Ndamaseku te machilimika ni Saulu ni kufupa kumushiha. (Yili. 9:23; 2 Kori. 11:32, 33; Ngala. 1:13-18) Muze Saulu anyingikine yize azangile kumulinga, yachina, yamuzeza mu chituwa cha mu chipanga ni kumusunwisa hashi mu chimwe chisoka chinene. Waze akwashile Saulu kuchina kanaavuluka ngwo, “tumbaji.” Chekwamba, tumbaji twa Saulu. (Yili. 9:25) Liji lino linasolola ngwo, atu amwe ku Ndamaseku kota kapwile tumbaji twa Kristu muze atayijile sango jize Saulu ambulwile.

17. (a) Yika atu anji akulinga muze twakwambulwila umwenemwene? (b) Yika twatamba kulinga, mba mumu liaka?

¹⁷ Muze walwezele asoko ni masepa je yuma yize unalilongesa mu Mbimbiliya, kota wanyongene ngwe mayitayiza. Muchihasa kupwa hanji amwe a kuli ayo katayijile, alioze akwo ka. Hanji lume, eka mu usoko kakumwene ngwe uli mukwa-kole yo. (Mateu 10:32-38) Alioze, nyi wanunga ni kululieka utotombo we, kuzachisa kanawa Mbimbiliya ni kusolola yitanga ya Ukristu, chipwe waze akulimika ni yena mahasa kwalumuna manyonga jo.—Yili. 17:2; 1 Petu. 2:12; 3:1, 2, 7.

18, 19. (a) Yika yalingiwile muze Mbarnabe akalilile Saulu? (b) Kuchi mutuhasa kwimbulula Mbarnabe ha chize akwashile Saulu?

¹⁸ Muze Saulu ahetele mu Yerusaleme tumbaji amwe kakatayijile ngwo, iye kalumuka. Alioze, apostolo kamutayijile ni kutwama nenyi mashimbu amwe muze Mbarnabe amukalilile. (Yili. 9:26-28) Saulu te keshi kuzanga chinji kusoloka. Chipwe chocho, kakapwile ni kwivwa sonyi ja kwambujola sango jipema. (Roma 1:16) Iye kambujolele ni hamu mu Yerusaleme, muma muzemwene ahungumionene tumbaji twa Yesu. Muze A-Yunda mu Yerusaleme amwene ngwo, lunga yoze wapwile ni kwamanyinako hapwa kambaji ka Kristu, yafupa kumushiha. “Muze tumbaji achivwile, yamutwala ku Sezarea ni kumutuma ku Tarsu.” (Yili. 9:30) Saulu kakawile usongwelo wa Yesu. Kashika iye ni mandumbu eswe ayukile.

¹⁹ Mbarnabe kalihanyine hanga akwase Saulu. Chino chakolesele chinji usepa wo. Chizechene ngwe Mbarnabe, shina wakulihana hanga ukwase atu aha mu chikungulwila, ha kukalakala no mu munda ni kukolesa ufulielo wo? Kulinga chino chakuyukisa chinji. Nyi uli mukwa-kwambujola mwaha, shina wakutayiza ukwaso wa akwenu ngwe chize Saulu alingile? Kukalakala hamuwika ni akwa-kwambujola waze hajama, muchilulieka utotombo we wa kwambujola ni kukolesa ufulielo we. Chikwo nawa, muchikukwasa kuwana masepa apema waze mununga no ndo ku miaka yeswe.

“Atu Anji Yafuliela Muli Mwene” (Yilinga 9:31-43)

20, 21. Kuchi tuvumbi twa Zambi a ku mashimbu akunyima ni a ha matangwa jetu akuzachisa kanawa mashimbu a sambukila?

²⁰ Muze Saulu echele kuhungumiona mandumbu ni kukatuka ku Yerusaleme, yikungulwila yeswe mu Yundeya, Ngalileya ni Samaria yiyipwa ni sambukila. (Yili. 9:31) Mba yika tumbaji alingile ha mashimbu jacho? (2 Timo. 4:2) Lusango kakwamba ngwo: “Yikungulwila yokele.” Apostolo ni mandumbu akwo waze te akusongwela, yakolesa ufulielo wa tumbaji ni kukwasa yikungulwila hanga yende mu jila ya Yehova, ni “kutwama kulita ni ukwaso wa spiritu yisandu.” Chakutalilaho, Petulu kazachishile uhashi wacho hanga akolese ufulielo wa tumbaji waze te atwama mu mbonge ya Lita ku mulundu wa Sarone. Tachi jize asele hanga akwase waze apwile mu Lita ni waze apwile hakamwihi, jaakwashile hanga afuliele muli mwene. (Yili. 9:32-35) Tumbaji kakechele chuma nichimwe hanga chaalalwise, alioze yalihulikila ha kulikwasa umwe ni mukwo ni kwambujola sango ja Wanangana. Kulinga chino chakwashile yikungulwila yinunge ni kukola.

²¹ Ngwe chize chalingiwile ha mashimbu ja apostolo, ku songo lia sekulu 20, Yela ja Yehova a mu yifuchi yinji kanakapwa ha mashimbu a sambukila. Manguvulu yalitwamina kwakaujola ni kuchiza ukanjiso hakutwala ku mulimo wo wa kwambujola. Tununu a tununu twa Yela ja Yehova kazachishile uhashi wacho hanga ambujole sango ja Wanangana. Chino chanehene yiwape yinji.

22. Kuchi muhasa kuzachisa kanawa utuswilo we?

²² Shina unazachisa kanawa utuswilo we? Nyi watwama mu chifuchi chize uwayilo wetu kuushi wa kukanjisa, Satana kanazange chinji hanga ukise mashimbu je ha kufupa upite, chakuhona kulihana chinji mu milimo ya Zambi. (Mateu 13:22) Kanda uzachisa utuswilo we mu jila yacho. Zachisa kanawa mashimbu a sambukila ni kwamona ngwe uhashi wa kulihana chinji mu mulimo wa kwambujola ni kukolesa yikungulwila. Iwuluka ngwe, uhashi uze uli nawo musono, muuhasa kwalumuka susumuku.

23, 24. (a) Yika twalilongesa ha lusango wa Tavwita? (b) Yika twatamba kununga ni kulinga?

²³ Tutalenu yize yalingiwile kuli kambaji avuluka ngwo, Tavwita. Iye kapwile mu mbonge ya Yopa, yapwile hakamwihi ni Lita. Kambaji yono kapwile ni kuzachisa kanawa utuswilo wenyi. Kapwile ni kulinga yuma yinji yipema ni kukwasa yiswale. Alioze, susumuku yayiza mba yafwa.c Kufwa chenyi chanehene lamba linji kuli tumbaji waze apwile mu Yopa, chipi-chipi kuli tuliwa waze apwile ni kukwasa. Muze Petulu ahetele kuze kwapwile mujimba wa Tavwita, yalinga chikomokeso chize te kanda alinga hakachi ka apostolo. Petulu yalemba, mba yahindwisa Tavwita! Tuliwa ni tumbaji kawahililile chinji muze amwene ngwo, Tavwita kamuhindwisa! Chuma chize Petulu alingile, chatakamishine chinji waze apwileho, mumu te kwasala hakehe hanga apalike mu cheseko. Kashika, chino chinasolola mumu liaka lusango wa chikomokeso chacho ‘amuvwile’ kuli atu anji mu Yopa, ni mumu liaka atu anji afulielele muli Mwene.—Yili. 9:36-42.

²⁴ Lusango wa Tavwita kanatulongesa yikuma yaali yilemu chinji: (1) Mwono wetu uli wa mashimbu akehe, kashika chili chilemu kulikolweza hanga tupwe ni lufuma mupema kumeso ja Zambi! (Chilu. 7:1) (2) Kutalatala cha uhindukilo chapwa chamwenemwene. Yehova kamwene yuma yipema yize Tavwita alingile, kashika amuwahishile. Yehova makewuluka yuma yipema yize twakumulingila, chikwo nawa nyi twafwa, makatuhindwisa. (Hepre. 6:10) Kashika, chipwe ngwe tuli ha mashimbu a sambukila hanji ka, nihindu tunungenu ni kwambujola Wanangana wa Zambi.—2 Timo. 4:2.