Kutalatala Chika Chiliko Hakutwala ku Ufwe?

1. Sango jipema jika hali afu?

Yesu muze ahetele ku Mbetaniya hakamwihi ni Yerusaleme, yevwa ngwo sepa lienyi Lazaru hafwa te hikwapalika matangwa awana. Yesu yaya ku mafuka chimuwika ni Marta ni Maria, mandumbu ja mufu. Hazehene mbunga yiyikunguluka. Yena muhasa kumona chiseke cha Marta ni Maria muze Yesu ahindwishile Lazaru ku ufwe?​—Tanga Yoano 11:21-24, 38-44.

Marta te hananyingika sango jipema hakutwala kuli afu. Iye te kananyingika ngwo Yehova makahindwisa afu hanga akatwame kamuchali ni mwono hano hashi.​—Tanga Yombi 14:14, 15.

2. Afu kuchi apwa?

Atu kanakaatanga ku fufuta. (Uputukilo 2:7; 3:19) Yetwe tushi ni spiritu ize yishi kufwa mu mujimba wetu. Yetwe tuli atu a musunya, kashika ni twafwa kushi nichimwe cha kusala ni mwono mu mujimba wetu. Nyi twafwa, wongo wetu neyo wakufwa, ni manyonga jetu noo kakusula. Kashika Lazaru kakambile nichimwe hakutwala ku ufwe, mumu manyonga jenyi kanakasula.—Tanga Masamu 146:4; Chilumbununyi 9:5, 6, 10.

Shina Zambi kakwocha atu mu kahia muze hafwa nyi? Mbimbiliya yinasolola ngwo afu kanyingikine nichimwe, kashika inferno ya kahia chamwenemwene yili longeso lia mahuza hali Zambi. Longeso lino ngwo Zambi kakwocha atu mu kahia iye keshi kulizanga.—Tanga Jeremia 7:31.

Tala chinema Yika Yakulingiwa Kuli Mutu Nyi Mafwa?

3. Shina yetwe mutuhasa kuhanjika ni afu nyi?

Afu keshi kuhanjika chipwe kwivwa. (Masamu 115:17) Alioze amwe angelo api kakuzala mijimba ya atu waze hanafu hanga ahase kwonga atu. (2 Petulu 2:4) Yehova keshi kuzanga atu waze akufupa kuhanjika ni afu.​—Tanga Shimbi Yamuchiali 18:10, 11.

4. Iya makahinduka mu ufwe?

Tununu ja atu waze hanafu makahinduka ni mwono hanga atwame hano hashi. Ni waze apwile nikulinga yuma yipi, kakalilongesele kulinga upale wa Zambi, noo maakahindwisa.​—Tanga Luka 23:43; Yilinga 24:15.

Waze makahinduka makalilongesa umwenemwene wa Zambi ni kufuliela kuli Yesu mba ahase kwononoka kuli iye. (Usolwelo 20:11-13) Eswe waze makahindwisa, nyi malinga yuma yipema makawahilila ni mwono wa mutolo hano hashi.—Tanga Yoano 5:28, 29.

5. Yika uhindukilo unatulongesa hakutwala kuli Yehova?

Zambi kanakalulika kutalatala cha ufwe, hakutuma Mwanenyi hanga afwile hali yetwe. Uhindukilo unatulongesa zango ni upeme wa Yehova. Muze afu makahinduka iya yoze yena muzanga kulianga kumona?—Tanga Yoano 3:16; A-Roma 6:23.