Yetwe Tunawahilila ha Kunyingika Chimwe Chijimbikilo

Yena hanakulweze kama chimwe chijimbikilo?​—a Mbimbiliya yinambe hakutwala ku chimwe chijimbikilo chipema chize akuvuluka ngwo “chijimbikilo” chisandu. Chili chisandu mumu chineza kuli Zambi. Nawa kakuchivuluka ngwo chijimbikilo mumu atu te kachinyingikine. Chipwe angelo noo te kakuzanga kuchinyingika. Yena unazange kunyingika chijimbikilo chacho?​—

Ku mashimbu anji kunyima, Zambi yatanga atu atangu, lunga ni pwo. Majina jo te Alama ni Eva. Zambi yaaha chimwe chihela chipema chize te akuvuluka ngwo munda wa Endene. Nyi Alama ni Eva te kononokene kuli Zambi, ayo hamwe ni ana jo kachi kanakapwisa hashi heswe paraisu ngwe umwe munda upema. Nawa ayo kachi te kanakatwama ni mwono matangwa eswe mu paraisu. Alioze yena unanyingika yize yapwile kuli Alama ni Eva?​—

Alama ni Eva kavulumwine kuli Zambi, kashika yetwe musono tushi mu paraisu. Alioze Zambi kambile ngwo iye mapwisa hashi heswe paraisu, nawa ngwo mutu mweswe mahasa kupwa ni mwono wa miaka yeswe ni uwahililo. Kuchi iye makachilinga? Ha mashimbu anji kunyima, atu te kachinyingikine. Mumu te chijimbikilo.

Muze Yesu apwile hano hashi, iye kalongesele atu hakutwala ku chijimbikilo chacho. Iye yamba ngwo chijimbikilo chacho te Wanangana wa Zambi. Yesu yalweza atu alembe hanga Wanangana wacho wize. Wanangana wacho we muukapwisa hashi heswe paraisu yipema.

Yena wazanga kunyingika chijimbikilo chacho?​— Ewuluka ngwo atu waze akwononokena Yehova ayo wika makatwama mu Paraisu. Mbimbiliya yinatulweze sango jinji hakutwala kuli malunga ni mapwo waze anakononokena Yehova. Yena unazange kunyingika atu jacho?​— Mutulilongesa amwe a kuli atu jacho chize apwile ni chize mutuhasa kweembulula.