LONGESO 2
Rebeka Yazanga Kuwahilila Yehova
Rebeka te umwe pwo yoze ukwete zango kuli Yehova. Mukwo-lunga jina lienyi te Izake. Izake neye te kakwete zango kuli Yehova. Kuchi chapwile mba Rebeka alimbate ni Izake? Kuchi iye asolwele ngwo te kanazange kuwahilila Yehova? Mutulilongesa nawa hakutwala kuli iye.
Yisemi ja Izake te Apalahama ni Sara. Ayo eswe te katwama mu chifuchi cha Kanana, atu jamo te keshi kuwayila Yehova. Alioze Apalahama yazanga hanga mwanenyi ambate umwe pwo yoze te wakuwayila Yehova. Kashika, Apalahama atumine kavumbi kenyi, Elieza, ku Panda-narame kuze te kwatwama asoko jenyi hanga afupile Izake umwe pwo.
Rebeka kanakahondangana ha kuswichila tumelu meya
Elieza yalinga wenyi hamwe ni tuvumbi akwo a Apalahama. Te umwe wenyi usuku chinji. Ayo yaya ni kumi lia tumelu waze te anambata kulia ni yawana. Kuchi Elieza te manyingika pwo yoze masakwila Izake? Muze Elieza hamwe ni tuvumbi akwo ahetele ku Panda-narame, ayo yamana ha limwe shima lia meya mumu Elieza te kananyingika ngwo atu meza ni kutaha meya. Iye yalemba kuli Yehova ngwenyi: ‘Nyi neta meya kuli umwe mwana-pwo nawa iye mangwaha meya hanga ngunwe hamwe ni tumelu twami, chocho mungunyingika ngwo yono kali pwo yoze yena wasakula.’
Ha mashimbu waze ene mwana-pwo Rebeka yeza ku shima lia meya. Mbimbiliya yinambe ngwo iye te chileza. Elieza yamwita amwe meya akunwa nawa iye yatayiza ngwenyi: ‘Ewa. Mungukuswichila meya hanga unwe ni tumelu twe.’ Achi nyonga kama! Tumelu kakunwa meya anji, kashika, ha kwaaswichila meya mu shima Rebeka kanakendangana chinji. Yena unamono ha chizulie chize Rebeka anakalakala chinji?— Elieza yakomoka ha chize Yehova anakakumbulula yilemba yenyi.
Elieza yahana yawana yinji kuli Rebeka. Iye yasanyika Elieza ni tuvumbi akwo hanga jiye ku zuwo lia yisemi jenyi. Elieza yaalumbunwina mumu liaka Apalahama amutumine ku Panda-narame ni chize Yehova akumbulula yilemba yenyi. Asoko ja Rebeka kanakawahilila chinji hanga iye alimbate ni Izake.
Rebeka kayile ku Kanana hamwe ni Elieza hanga alimbate ni Izake
Shina Rebeka kanakazanga kulimbata ni Izake?— Rebeka yanyingika ngwo Yehova mwe watuma Elieza kuno ku Panda-narame. Kashika muze asoko jenyi amuhulile nyi iye mazanga kuya ku Kanana hanga akalimbate ni Izake, Rebeka yatayiza ngwenyi: ‘Ewa, munguya.’ Ha tangwa lize linakasuloho, Rebeka yaya hamwe ni Elieza. Muze ahetele ku Kanana, iye yalimbata ni Izake.
Ha chino Rebeka yalinga yize Yehova te anazange hanga alinge, kashika Yehova amuwahishile. Ha kupalika cha miaka, Yesu yasemuka mu munyachi wa ana ja Rebeka! Nyi yena wapwa ngwe Rebeka nawa wawahilila Yehova, ni yena makuwahisa.