Fupa Ukwaso wa Zambi Mba Upwe ni Uwahililo mu Ulo

Yehovaa Zambi mwe walingile ulo utangu. Mbimbiliya yinatulweze ngwo iye yatanga pwo mutangu, mba “yamuneha kuli lunga.” Alama yawahilila chinji, kashika yamba ngwenyi: “Yono chifwaha cha ku yifwaha yami; musunya wa ku musunya wami.” (Uputukilo 2:22, 23) Yehova nihindu kanazange hanga mu ulo mupwe uwahililo.

Muze munulimbata, munuhasa kunyonga ngwenu yuma yeswe muyenda kanawa. Alioze, pundu lume, chipwe lunga ni pwo waze alizanga chinji, no makapwa ni kapinda. (1 A-Korindu 7:28) Mu kamukanda kano, muwanamo shimbi ja mu Mimbiliya, nyi mujikaula mujihasa kukukwasa upwe ni uwahililo mu ulo ni mu usoko we.—Masamu 19:8-11.

1 TAYIZA MULIMO UZE YEHOVA AKUHELE

YIZE MBIMBILIYA YINAMBE: Lunga kali mutwe wa usoko.—A-Efwesu 5:23.

Nyi uli lunga mu usoko, nyingika ngwe Yehova kanazange hanga ufunge kanawa pwo lie ni zango. (1 Petulu 3:7) Yehova katangile pwo apwe chikwashi che, kashika, kanazange umulemese ni kumuzanga. (Uputukilo 2:18) Watamba kuzanga chinji pwo lie ni kusa upale wenyi kulutwe kuhiana wa yena mwene.—A-Efwesu 5:25-29.

Nyi uli pwo mu usoko, nyingika ngwe Yehova kanazange hanga use vumbi lunga lie ni kumukwasa muze malinga mulimo wenyi. (1 A-Korindu 11:3; A-Efwesu 5:33) Tayiza yuma yize mayula ni kukalakala nenyi ni mbunge yeswe. (A-Kolosu 3:18) Nyi walinga chocho, makuvwila kuwaha kuli lunga lie ni kuli Yehova.—1 Petelu 3:1-6.

YIZE MUHASA KULINGA:

• Hula yoze walimbata nenyi akulweze chize muhasa kupwa lunga hanji pwo wa yitanga yipema. Panjika kanawa, ni kulinga yize muhasa hanga upwe ni yitanga yipema

• Pwako chihumikiji. Chakumbata shimbu linji hanga nunyingike chize muhasa kulivwisa kuwaha umwe ni mukwo

2 SAKO MBUNGE YOZE WALIMBATA NENYI

YIZE MBIMBILIYA YINAMBE: Watamba kusa mbunge kuli mukwenu yoze walimbata nenyi. (A-Fwilipu 2:3, 4) Sako mbunge yoze walimbata nenyi, ni kwiwuluka ngwe Yehova kanazange tuvumbi twenyi apwe ‘yimbovu kuli eswe.’ (2 Timoteu 2:24) “Kwali mukwa kuhanjika kalusulusu, ngwe kutuwa cha katanu; alioze limi lia mukwa mana kuliakuwuka.” Kashika, sakula kanawa maliji muhanjika. (Yishima 12:18) Spiritu ya Yahova muyikukwasa kuhanjika kanawa ni zango.—A-Ngalashia 5:22, 23; A-Kolosu 4:6.

YIZE MUHASA KULINGA:

• Lemba hanga uhase kulihumikiza ni kululieka mbunge ye muze kanda nuchihanjika yuma yilemu ni yoze walimbata nenyi

• Nyonga yuma yize mufupa kuhanjika ni chize muyihanjika

3 PWENU NI NYONGA LIMUWIKA

YIZE MBIMBILIYA YINAMBE: Muze munulimbata, munupwa “musunya umuwika” ni yoze walimbata nenyi. (Mateu 19:5) Alioze, nihindu nuli atu aali, waze ali ni manyonga alisa. Kashika nwatamba kulilongesa kupwa ni manyonga amuwika. (A-Fwilipu 2:2) Nwatamba kupwa ni mbunge yimuwika ha kukwata yiyulo. Mbimbiliya yinambe ngwo: “Kuhala cheswe chakukola ni yiyulo.” (Yishima 20:18) Echenu Mbimbiliya yinusongwele ha kukwata yiyulo hamuwika.—Yishima 8:32, 33.

YIZE MUHASA KULINGA:

• Shimutwina nyonga lie ni yoze walimbata nenyi, hi kumulweza wika ko

• Hanjika ni yoze walimbata nenyi shimbu kanda ulinga chimwe chuma