Zambi Yatanga Lunga ni Pwo Mutangu

Yehova yatumba munda ku chihela kuze te avuluka ngwo Endene. Mu munda wacho mwapwile mwa too ni yitemo, mitondo hamwe ni tushitu. Chocho, Zambi yatanga lunga mutangu Alama, ku fufuta ya mavu, yahwima mwiku mu mazulu jenyi. Unanyingika yize yalingiwileko? Hohene, mutu yapwa ni mwono! Yehova yahana Alama mulimo wakufunga munda, ni kumulweza aluke tushitu eswe majina.

Yehova yahana Alama shimbi yilemu. Yamulweza ngwenyi: ‘Muhasa kulia mitondo yeswe ya mu munda, alioze kanda ulia mutondo wa chinyingi cha chipi ni chipema. Yika tangwa muuliako, kumukafwa.’

Mba, Yehova yamba ngwenyi: ‘Mungulingila Alama chikwashi.’ Iye yayisa Alama tulo anji, mba Zambi yanda lupachi wa Alama, yamulinga pwo. Pwo wacho jina lienyi te Eva. Alama ni Eva kapwile usoko utangu. Kuchi Alma evwile muze amwene mukwo-pwo? Alama ni chiseke cheswe, yamba ngwenyi: ‘Tala yize Yehova alinga ni lupachi wami! Chochene! Mba hikwasoloka yoze walifwa ni yami.’

Yehova yalweza Alama ni Eva hanga aseme ni kuzalisa hashi. Iye kazangile hanga ayo akalakale hamuwika ni kupwisa hashi heswe paraisu, hanji munda upema, ngwe chize wapwile munda wa Endene. Alioze, yino kuyakalingiwile. Mumu liaka? Mutulilongesa yo mu kapitulu yoze masulaho..