Kaposhi wa Mbapele

Muze Sanga lia Meya te hiliapalika, ana ja Noa ni mapwo jo yasema ana anji. Asoko jo yoka, yijiputuka kulimwanga hashi heswe ngwe chize Yehova aalwezele.

Alioze amwe akuli asoko jacho te keshi kwononokena Yehova. Ayo yamba ngwo: ‘Tutungenu limwe limbo hanga tutwamemo. Mututunga kaposhi songo lienyi likahete ndo mu malilu. Hachino, mutupwa akwa-lufuma.’

Yehova kakazangile yuma yize atu jacho apwile ni akulinga, chocho, yaakanjisa. Shina unanyingika chize iye achilingile? Susumuku, iye yaalingisa hanga aputuke kuhanjika mu malimi alisa. Chocho, ayo yecha kulinga mulimo wacho, mumu te keshi kulivwa umwe ni mukwo. Limbo liacho atungile yalivuluka ngwo Mbapele, lize linalumbunuka ngwo, ‘kalumbanganyiso.’ Mba atu yalimwanga hashi heswe. Alioze yanunga ni kulinga yuma yipi ku yihela kuze ayile ni kutwama. Shina kwakapwile mutu niumwe yoze wapwile ni kuzanga Yehova? Mutuwana kumbululo ha longeso lize mulisulaho.