Yakomba Yazuka Chihinga

Izake kalimbachile ni Rebeka muze te hapwa ni miaka 40. Aye te kakuzanga chinji mukwo-pwo. Hakupalika cha mashimbu, yasema ana-apasa aali—a malunga.

Mukulwana te kamuvuluka ngwo Esau, kanuke Yakomba. Esau te keshi kuzanga kutwama ku zuwo nawa mulimo wenyi te kushiha tushitu. Alioze Yakomba te kakuzanga kutwama ku zuwo.

Ha matangwa jacho, mwana mutangu te kakumwaha chihela chinene ni mbongo jinji muze tato mafwa. Yino ye te akuvuluka ngwo chihinga. Mu usoko wa Izake, chihinga te chapwa nawa yilakenyo yize Yehova alakenyene Apalahama. Esau te keshi kulemesa yilakenyo yacho, alioze Yakomba te kakuyilemesa chinji.

Ha limwe tangwa, Esau yafuna ku zuwo wa kuhonga mumu kayile ni kuhanga tangwa lia muwundu. Yevwa vumba lipema lia kulia chize Yakomba apwile ni kuteleka, chocho yamwamba ngwenyi: ‘Kungunafu ni zala! Ngwehe kama chimwe kulia!’ Yakomba yamba ngwenyi: ‘Ami mungukwaha kulia, alioze ena lishinge kumeso jami ngwo mungwaha chihinga che.’ Esau yamba ngwenyi: ‘Che chihinga kuli mungukaya nacho! Munguhasa kukwaha cho. Ami ngunafupu wika kulia.’ Shina Esau kalingile kanawa? Ka, kakalingile kanawa. Esau kahanyine chuma chilemu chinji ha mukunda wa chimwe kulia.

Muze Izake te hapwa kashinakaji, aye yamona ngwenyi, lino lie shimbu lia kuhana yiwape kuli mwanenyi wa mukulwana. Alioze Rebeka te kakukwasa kasulasongo kwo Yakomba hanga azuke yiwape yacho. Muze Esau achivwile, aye yevwa uli unji nawa yatwama punga hanga ashihe mwanakwo. Izake ni Rebeka kazangile kufunga Yakomba, kashika amwambile ngwo: ‘Yako hanga ukatwame ni nokotu, Lapane ndo muze ufwatulo wa Esau muuhwa.’ Yakomba yapanjika chiyulo cha yisemi jenyi, chocho yalamwina mwono wenyi.