Ndungo Yoze Wononokene Zambi

Yosefwe kapwile umwe wa kuli ana ja Yakomba. Mandumbu jenyi a makulwana yanyingika ngwo Tato te kamuzanga chinji. Kuchi wanyonga ha chize ayo evwile hakutwala ha chikuma chino? Ayo te kakwivwila Yosefwe chipululu ni kole. Muze Yosefwe alotele, yalweza mandumbu jenyi hakutwala ku yilota yacho. Ayo yanyingika ngwo, yilota yacho te yinalumbunuka ngwo limwe tangwa ayo maliumba kuli iye. Hachino, ayo yaputuka kumuvwila kole yinji!

Limwe tangwa mandumbu ja Yosefwe yaya ni kulisa mapanga hakamwihi ni mbonge ya Shekeme. Yakomba yatuma Yosefwe aye ni kutala yize analingi mandumbu jenyi. Muze mandumbu jenyi amumwene, yaliamba ngwo: ‘Talenu mukwa yilota kaneza. Tumushihenu!’ Yamukwata ni kumumbila mu wina usuku. Alioze Yunda, umwe wa kuli mandumbu jenyi yamba ngwenyi: ‘Kanda tumushiha! Tumulanjisenu mu undungo.’ Hachino, ayo yalanjisa Yosefwe mu unji wa mbongo 20 a prata, kuli akwa-mingoso A-Midiane waze apwile ni kuya ku Engitu.

Chocho, mandumbu ja Yosefwe yashiha pembe yasa chikuto chenyi mu manyinga, yachituma kuli tato, ni kwamba ngwo: ‘Chikuto chino hi cha mwane ko?’ Chocho, Yakomba yanyingika ngwenyi umwe kashitu washiha mwanenyi Yosefwe. Iye yevwa yikola yinji ku mbunge. Kukushi ni umwe wahashile kumulembejeka.

Ku Engitu, Yosefwe yamulanjisa mu undungo kuli umwe mwata yoze te avuluka ngwo Potifwa. Alioze Yehova kapwile hamwe ni Yosofwe. Potifwa yamona ngwenyi, Yosefwe mupema nawa te kakukalakala kanawa, mahasa kumujikijila. Chocho, Yosefwe yamusa mwata wa yuma yeswe ya Potifwa.

Pwo lia Potifwa yaputuka kumona ngwenyi, Yosefwe kali lunga wa tachi nawa mupema. Tangwa ni tangwa aye te kakulweza Yosefwe hanga apombe nenyi. Mba yika te Yosefwe malinga? Iye yalituna nawa yamba ngwenyi: ‘Ka! Kulinga chino chili chipi. Mwata wami hanangukunjika yuma yeswe, nawa ena uli mukwo-pwo. Nyi mungupomba ni yena, munguvulumuna kumeso ja Zambi!’

Limwe tangwa pwo lia Potifwa yakwata Yosefwe hanga apombe nenyi ku tachi. Aye yamulalaminya ku chikuto, alioze Yosefwe yachina. Muze Potifwa afunyine ku zuwo, mukwo-pwo yamulweza ngwenyi, Yosefwe kamukwata ku tachi hanga apombe nenyi. Aye te keshi kuhanjika umwenemwene. Potifwa yevwa uli unji, hachino yasa Yosefwe mu zuwo lia ususu. Alioze Yehova kakavulamine Yosefwe.