Kasongo Mwaha ni Mapwo Aali a Hamu

Muze Yoshua te hasongwela atu ja Yehova ha miaka yinji, iye yafwa ni miaka 110. Muze iye te uchili ni mwono, A-Izalele te kakuwayila wika Yehova. Alioze muze Yoshua afwile, ayo yaputuka kuwayila mahamba, ngwe chize apwile ni kulinga A-Kanana. Amu A-Izalele te keshi kukaula nawa shimbi ja Yehova, iye yecha mwanangana wa A-Kanana yoze te avuluka ngwo Jabini hanga aamwese lamba. Chocho, ayo yaputuka kwita ukwaso kuli Yehova. Hachino, Yehova yaaha kasongo mwaha, Mbarake. Iye te makwasa A-Izalele hanga ahiluke kuli Yehova.

Profeta wa pwo Debola yamutuma hanga aliwane ni Mbarake. Yaya ni kumulweza sango ja Yehova ngwenyi: ‘Mbatako malunga 10,000 nawa yako ukaliwane ni maswalale a Jabini waze ali ku lwiji Kishone. Koko, yena mukakumba Sisera mwata wa maswalale a Jabini.’ Mbarake yalweza Debola ngwenyi: ‘Munguyako, alioze nyi yena muya hamwe ni yami. Debola yamba ngwenyi: ‘Munguya hamwe ni yena. Alioze nyingika ngwe hi yena ko mukashiha Sisera. Mumu Yehova kanambe ngwenyi, makamushiha kuli umwe pwo.’

Debola yaya hamwe ni Mbalake ni maswalale jenyi ndo ku Mulundu Tabore hanga alilulieke akase jita. Muze Sisera achinyingikine, yakunga matemba jenyi a jita ni maswalale yapalumuka ndo mu chimbongo. Hachino, Debola yamba kuli Mbalake ngwenyi: ‘Musono lie tangwa Yehova manukwasa kukumba.’ Mbarake ni maswalale jenyi 10,000 yapalumuka mulundu hanga ase jita ni maswalale a ndundo a Sisera.

Yehova yafutunwisa meya amu lwiji Kishone. Matemba-a-jita a Sisera yasakaminha mu malowa. Sisera yahichika temba lienyi, chocho yaputuka kuchina. Mbarake ni maswalale jenyi yakumba maswalale a Sisera, alioze Sisera mwene yachina! Muze achinyine, yaya ni kuswama mu mbalaka ya pwo yoze te avuluka ngwo Jaele. Iye yamwaha yamwa, nawa yamufuka mukombo. Mumu lia uhonge yapomba. Hachino, Jaele kafuji-fuji yanda lumbambo wa mbalaka yamuhatayo mu mutwe. Chocho yafwa.

Mbarake yaputuka kufupa Sisera. Jaele yamana haze lia mbalaka yenyi nikumwamba ngwenyi: ‘Tweya unjile muno. Mungukulweza mutu yoze unafupu.’ Chocho, Mbarake yanjila yawana Sisera hapomba wakufwa. Mbarake ni Debola yahalisa Yehova ni miaso hakukwasa A-Izalele hanga akumbe akwa-kole jo. Chocho, A-Izalele yatwama ni sambukila ha miaka 40.