Gabriele Yameneka Maria

Izabele te kakwete usoko yoze te avuluka ngwo Maria, yoze te watwama mu mbonge ya Nazare mu Ngalileya. Maria te hanamulakenya ulo kuli Yosefwe, karpinteru. Muze Izabele akumbanyishine tukweji asambano ni ufumba, mungelo Gabriele yasoloka kuli Maria. Iye yamba ngweny: ‘Vulie, Maria. Yehova kali hamwe nyi yena.’ Maria kakanyingikine yize te Gabriele anambe. Chocho yamwamba ngwenyi: ‘Mukapwa kafumba nawa mukasema mwanan wa lunga, watamba kumuluka jina lia Yesu. Makapwa Mwanangana. Wanangana wenyi muukapwa wa mutolo.’

Maria yamba ngwenyi: ‘Ami kanda nguchilimona ni lunga. Kuchi mba munguhasa kushita mwana wacho?’ Gabriele yamwamba ngwenyi: ‘Kukushi chuma chikalu kuli Yehova. Spiritu yisandu muyikeza hali yena, nawa muukapwa ni mwana. Usoko we Izabele neya hapwa kafumba.’ Hachino Maria yamba ngwenyi: ‘Ami nguli ndungo wa Yehova. Chikapwe kulita ni liji lienyi.’

Maria yaya ku mbonge ya milundu ni kutala Izabele. Muze Maria amenekene Izabele, Izabele yevwa mwana mu jimo lienyi kanatumbwoka. Muze hazala too ni spiritu yisandu, yamba ngwenyi: ‘Maria, Yehova kakuwayisa. Chili uhenya kupwa hamwe ni naye ya Mwene wetu ku zuwo liami.’ Maria yamba ngwenyi: ‘Ngunahalisa Yehova ni mbunge yami yeswe.’ Maria yatwama ku zuwo lia Izabele ha tukweji atatu, mba hi yafuna ku zuwo lienyi ku Nazare.

Muze Yosefwe anyingikine ngwo Maria kali kafumba, iye yafupa kumwecha. Alioze umwe mungelo yasoloka kuli iye mu chilota ni kumwamba ngwenyi: ‘Kanda wivwa woma wa kumbata Maria. Mumu iye kalingile upi niumwe.’ Hachino, Yosefwe yalimbata ni Maria.