LONGESO 05
Mbimbiliya Yili Mukanda Uze Atwaha Kuli Zambi
Mbimbiliya yili chawana cha Zambi kuli yetu. Chawana chacho chili ni mikanda yikehe-yikehe 66. Hanji muhasa kulihula ngwe: ‘Mbimbiliya kulihi yakatukile? Mwenya Mbimbiliya iya?’ Tutalenu chize Mbimbiliya yaheta kuli yetu mba tuhase kukumbulula yihula yino.
1. Nyi atu e asonekene Mbimbiliya, mba mumu liaka akuyivuluka ngwo Liji lia Zambi?
Mbimbiliya kayisonekene kuli malunga 40 ha unji wa miaka 1.600. Mukanda utangu wa mu Mbimbiliya kausonekene ha mwaka 1513 K.M.J., wakasula wapwile kusoneka ha mwaka 98 M.J. Atu waze asonekene Mbimbiliya kapwile alisa, mumu amwe kapwile tufunga-mapanga, akwa-kuta yishi ni mianangana. Chipwe ngwe waze ayisonekene kapwile ni kulinga milimo yeka-ni-yeka, nihindu Mbimbiliya yalita chize ku uputukilo ndo ku songo. Kuchi chino chalingiwile? Chalingiwile mumu Zambi mwe mwenya Mbimbiliya. (Tanga 1 A-Tesalonika 2:13.) Akwa-kusoneka Mbimbiliya kakasonekene manyonga jo ene. Alioze ‘atu ahanjikile cha kuli Zambi, nikuhungumuka cha spiritu yisandu.’a (2 Petulu 1:21) Zambi yazachisa spiritu yisandu hanga akwase malunga jacho kusoneka manyonga jenyi.—2 Timoteu 3:16.
2. Aya waze Zambi asonekenene Mbimbiliya?
Zambi kasonekenene Mbimbiliya atu a “ku mavungu eswe, ni ku minyachi yeswe, ni ku malimi eswe, ni kuli atu eswe.” (Tanga Usolwelo 14:6.) Kashika Zambi asele shindakenyo hanga Mbimbiliya ayilumbunune mu malimi anji kuhiana mikanda yeka. Atu eswe mahasa kutanga sango jipema jili mu Mbimbiliya, chipwe ngwe kakuhanjika limi lieswalio hanji katwama ku chihela cheswacho.
3. Kuchi Yehova afungile Mbimbiliya?
Mbimbiliya yapwile mu yikwiko yinji, alioze Yehova kakechele hanga chuma hanji mweswawo mutu akwike mukanda uno kuheta kuli yetu. Chikwiko chimwe chili chino: Yikwata yize apwile ni kuzachisa ngwe couro ni papiro hanga asoneke Mbimbiliya kuyakapwile ni kukola chinji, yapwile yilelu. Mba kuchi Mbimbiliya yaheta kuli yetu? Chino chalingiwa mumu lia atu waze azangile Mbimbiliya ni kuyisonejeka ni malinjekela. Chikwiko chikwo chili ngwo: Atu alemu kazangile kwenyeka Mbimbiliya, alioze Mbimbiliya yayifunga! Chize ku mashimbu a kunyima ndo ni musono, atu waze azanga Mbimbiliya kakuhana mwono wo hanga afunge Mbimbiliya. Yino yinalite ni yize Mbimbiliya yene yakwamba: “Liji lia Zambi yetu kumulikakola lia mutolo.”—Izaia 40:8.
NYINGIKA NAWA
Nyingika chize Zambi akwashile atu hanga asoneke Mbimbiliya, chize ayifungile ni yize alingile mba Mbimbiliya yihete kuli atu eswe.
4. Mbimbiliya yinasolola Mwenyayo
Tala CHINEMA. Hanyima tanga 2 Timoteu 3:16, mba nushimutwine yihula yino:
Nyi atu e asonekene Mbimbiliya, mba mumu liaka akuyivuluka ngwo Liji lia Zambi?
Shina twatamba lume kutayiza ngwetu, Zambi mwe wakwashile atu kusoneka Mbimbiliya?
Mukwa-kusoneka mahasa kusoneka umwe mukanda ni maliji ja mwenya-mulimo. Chizechene nawa, atu e asonekene Mbimbiliya, alioze maliji kali a Yehova
5. Atu kazangile kwenyeka Mbimbiliya, alioze kayihashile
Mbimbiliya yili mukanda wa Zambi, kashika iye aufungile. Atu kazangile kwenyeka Mbimbiliya. Chize ku mashimbu a kunyima, atu akwete ndundo kakuzanga kwenyeka Mbimbiliya. Mangana a mangeleja te keshi kuzanga atu apwe ni Mbimbiliya. Chipwe mu yihungumiona, atu yasa mwono wo mu ponde hanga afunge Mbimbiliya. Tunyingikenu umwe wa kuli malunga jacho. Tala CHINEMA, mba nushimutwine yihula yinahateho.
Shina kunyingika yuma yize atu alingile hanga afunge Mbimbiliya chakukwasa kuzanga chinji kuyitanga? Mumu liaka?
Tanga Samu 119:97, mba nushimutwine chihula chino:
Mumu liaka atu anji asele mwono wo mu ponde hanga alumbunune ni kuhana Mbimbiliya?
6. Mukanda wa atu eswe
Kukwatwamine mukanda ukwo uze hanalumbununa mu malimi anji ngwe Mbimbiliya wakuhi. Tanga Yilinga 10:34, 35, mba nushimutwine yihula yino:
Mumu liaka Zambi anazange hanga Mbimbiliya ayilumbunune mu malimi anji ni kuyihana kuli atu eswe?
Chuma chika wakuzanga chinji hakutwala ku Mbimbiliya?
Atu amwe hanji
100%
a hashi heswe
mahasa kutanga Mbimbiliiya mu malimi jo
Mbimbiliya hanayituhwisa mu unji wa
3,000
a malimi
Mbimbiliya yamuundu hanji chihanda
5,000,000,000
We unji wa Mbimbiliya jize hanatuhwisa,
chino chahiana weswawo mukanda
ATU AMWE KAKWAMBA NGWO: “Mbimbiliya yili mukanda ukulu uze atu asonekene.”
Yika wakunyonga ha chikuma chacho?
Maliji aka akusolola ngwo, Mbimbiliya yili Liji lia Zambi?
YIZE WALILONGESA
Mbimbiliya yili Liji lia Zambi, kashika asele shindakenyo hanga atu eswe apwe nayo.
Kuhitulula
Mbimbiliya yinambe ngwo Zambi katumine atu kuyisoneka. Yika chino chinalumbunuka?
Yika yakukukomwesa ha chize akulumbununa Mbimbiliya ni kuyihana kuli atu?
Kuchi wakwivwa ha kunyingika tachi jize Zambi asele hanga uhase kumunyingika?
HENGWOLA NAWA
Tanga hakutwala ku sango ja Mbimbiliya, chize ha mashimbu waze aputukile kuyisoneka ndo musono.
“Chize Mbimbiliya Yaheta Kuli Yetu” (Laulenu! ya Novembro 2007)
Tala chize Mbimbiliya yapalikile mu ponde jitatu.
“Sango ja Chize Mbimbiliya—Yinanungu Ndo Musono” (Kaposhi wa Kutalila No. 4 2016)
Tala ponde apalikile atu waze asele tachi hanga alumbunune Mbimbiliya.
Mbimbiliya kayisonejekene ni kuyilumbununa yisuho yinji. Mba kuchi muhasa kupwa ni shindakenyo ngwe, sango jamo kujalumukine?
a Ngwe chize Longeso 07 mulikalumbununa, spiritu yisandu yili tachi jize Zambi akuzachisa hanga amanunune upale wenyi.