Chize Mutuhasa Kunyingika Akwa-Kristu Amwenemwene

Tununu a tununu twa atu kakwamba ngwo kali akwa-Kristu. Alioze, keshi kufuliela ha malongeso amuwika hanji kukaula shimbi jimuwika. Mba kuchi mutuhasa kunyingika akwa-Kristu amwenemwene?

1. Kupwa mukwa-Kristu yika chinalumbunuka?

Akwa-Kristu kali tumbaji twa Yesu hanji ngwetu waze akumukaula. (Tanga Yilinga 11:26.) Kuchi akwa-Kristu akusolola ngwo kali tumbaji twa Yesu? Yesu yamba ngwenyi: “Nyi munutwama mu maliji jami, mba chamwenemwene munupwa tumbaji twami.” (Yoano 8:31) Chino chinalumbunuka ngwo, akwa-Kristu amwenemwene katamba kwononoka ku malongeso a Yesu. Yesu kapwile ni kulongesa kulita ni yize Mbimbiliya yakwamba. Kashika, akwa-Kristu amwenemwene no che akulinga.—Tanga Luka 24:27.

2. Kuchi akwa-Kristu amwenemwene akusolola zango?

Yesu yalweza tumbaji twenyi ngwenyi: ‘Nukalizange umwe ni mukwo, chizechene ngwe yami hingunanuzange.’ (Yoano 15:12) Kuchi Yesu asolwele ngwenyi kakuzanga tumbaji twenyi? Ha kupalikisa mashimbu hamwe no, ha kwatakamisa ni kwakwasa. Yesu nawa yahana mwono wenyi hali ayo. (1 Yoano 3:16) Chizechene nawa, akwa-Kristu amwenemwene no keshi kuhanjika wika ha zango, alioze kakulisolola mu maliji ni mu yitanga.

3. Mulimo uka akwa-Kristu amwenemwene akulinga?

Yesu kahanyine umwe mulimo kuli tumbaji twenyi. “Yaatuma mukwambujola wanangana wa Zambi.” (Luka 9:2) Akwa-Kristu atangu te keshi kwambujola wika mu yihela yo ya uwayilo, alioze kapwile ni kwambujola nawa ha mbunga ni ku zuwo-ni-zuwo. (Tanga Yilinga 5:42; 17:17.) Musono, akwa-Kristu amwenemwene no kakwambujola umwenemwene wa mu Mbimbiliya ku yihela yeswe. O kakuzanga enyembo jo, kashika akuzachisa mashimbu ni tachi jo hanga ambujole umwenemwene wa mu Mbimbilia uze wakuhana kutalatala ni utakamiso.—Marku 12:31.

NYINGIKA NAWA

4. O kakufupa umwenemwene wa mu Mbimbiliya

Atu amwe waze akwamba ngwo kali akwa-Kristu, keshi kulemesa umwenemwene wa mu Mbimbiliya. Tala CHINEMA, mba nushimutwine chihula chinahateho.

CHINEMA: Chize Uwayilo Wamwenemwene Watokele (5:11)

• Yika mayingeleja amwe waze akuliamba ngwo kali akwa-Kristu akulinga hanga akwike atu kunyingika malongeso a Yesu?

Yesu kalongesele umwenemwene wa mu Liji lia Zambi. Tanga Yoano 18:37, mba nushimutwine chihula chino:

• Kulita ni maliji a Yesu, kuchi mutuhasa kunyingika akwa-Kristu waze ali sali lia “umwenemwene”?

5. O kakwambujola umwenemwene wa mu Mbimbiliya

Shimbu te Yesu kanda achiya mu malilu, yahana umwe mulimo kuli tumbaji twenyi uze unalingiwa ndo ni musono. Tanga Mateu 28:19, 20 ni Yilinga 1:8, mba nushimutwine chihula chino:

• Mulimo wa kwambujola te muuheta ndo kulihi?

6. Kakukaula yize akwambujola

Yika yakwashile umwe lunga avuluka ngwo Tom, kupwa ni shindakenyo ngwenyi kawana umwenemwene? Tala CHINEMA, mba nushimutwine yihula yinahateho.

CHINEMA: Mayingeleja Kanguhongesele (5:20)

• Kulita ni chinema, yika yalingishile Tom kuhonga ni mayingeleja?

• Yika yinakamwaha shindakenyo ngwenyi kawana umwenemwene?

Yitanga ya mutu yili yilemu chinji kuhiana maliji jenyi. Tanga Mateu 7:21, mba nushimutwine chihula chino:

• Yika Yesu akulemesa chinji—shina yuma yize twakwamba nyi yitanga yetu?

7. Kakulizanga umwe ni mukwo

Shina chamwenemwene akwa-Kristu kakusa mwono wo mu ponde mumu lia mandumbu jo? Tala CHINEMA, mba nushimutwine yihula yinahateho.

CHINEMA: Iye Yatayiza Kuhana Mwono Wenyi Hali Yami (2:55)

• Kulita ni chinema, yika yakwashile Lloyd kusa mwono wenyi mu ponde hanga akalile ndumbwenyi Johansson?

• Ku nyonga lie, shina iye kasolwele yitanga ya Ukristu?

• Kuchi tumbaji a Yesu (akwa-Kristu amwenemwene) atamba kumona atu a ku vungu hanji chifuchi cheka?

• Kuchi atamba kuchilinga ha mashimbu a jita?

YIZE WALILONGESA

Akwa-Kristu amwenemwene kakukaula malongeso a mu Mbimbiliya, kakusolola zango ni kwambujola umwenemwene wa mu Mbimbiliya.

Kuhitulula

• Ufulielo wa akwa-Kristu amwenemwene halihi unakatuka?

• Yitanga yika yakunyingikisa akwa-Kristu amwenemwene?

• Mulimo uka akwa-Kristu amwenemwene akulinga?

HENGWOLA NAWA

Nyingika nawa hakutwala kuli atu waze akusa tachi hanga akaule chilweza ni malongeso a Yesu Kristu.

Yela ja Yehova—Atu Aka? (1:13)

Tala yize yakwashile umwe ngana wa pwo kuwana “usoko wamwenemwene ku ufulielo.”

“O Kazachishile Mbimbiliya Hanga Akumbulule Yihula Yami Yeswe!” (Kaposhi wa Kutalila 1 wa Abril, 2014)

Tala chize akwa-Kristu amwenemwene akusolwela akwo zango muze mafupiwa ukwaso.

Ukwaso Kuli Mandumbu Jetu ku Yihela Yize Kwalingiwa Luyinda—Chinema Chikehe

Tala chize akwa-Kristu waze akukaula Yesu musono akwimbulula akwa-Kristu atangu.

“Yika Yakunyingikisa Akwa-Kristu Amwenemwene?” (Kaposhi wa Kutalila 1 wa Março, 2012)