MITWE YA KULILONGESA | MALONGESO A CHIFUKILO
Shina Kuhondangana—Kuchishi ni Ulemu Nyi?
Alex mahwima muze anatwale kasha yikwo mu mashinyi a ku mulimo kuze akalakala. Iye malihula ngwenyi: ‘Mumu liaka mulimo uno kuushi ni kungutwala kulutwe? Tangwa lika mungukeza kapwa kama ni mulimo upema? Mwono wami kachi te uli kanawa nyi chishi ni kuhondangana!’
Atu anji ngwe Alex keshi kuwahilila ni mulimo uze akuhondangana. Arone yoze wakalakala ngwe mekanyiku yamba ngwenyi: “Atu anji kakumona ngwe yili milimo ya ngwaza. Nyonga lio ngwo: “Ami ngunalingi chino ndo ni muze mungupwa ni mulimo weka.”
Mumu liaka atu anji akumona ngwo ayo katambile kuhondangana? Kota ha mukunda wa kwapiangula kuli akwa-sango, waze akwamba ngwo mulimo upema ndo uze ulelu alioze wa mbongo jinji. Mateu mukwa-kululieka yuma, yamba ngwenyi: “Atu kakwamba ngwo nyi wahondangana chinji hanga utwame kanawa muupwa chiswale.” Shane yoze wakukalakala milimo ya kukomba-komba neye yatayiza nyonga lioliene. Yamba ngwenyi: “Atu keshi ni kukalakala chinji kulita ni fweto akutambula.”
Alioze, atu anji waze ali ni mwono upema kakuwahilila chinji ha kuhondangana cho. Daniel wa miaka 25 yoze mukwa-kutunga mazuwo yamba ngwenyi: “Ku nyonga liami kuhondangana chakuyukisa chinji, kanji-kanji ni manyingika mumu liaka anahondanganyina.” Andre wa miaka 23, neye yachitayiza. Iye yamba ngwenyi: “Nakufuliela pundu ngwami uwahililo ni chiseke yakwiza ha kuhondangana, alioze kukalakala hakehe kuchishi kuneha uwahililo unji!”
Kuchi atu ngwe Daniel ni Andre apwa ni nyonga lipema lia kuhondangana? Ayo kakulinga chino hakukaula shimbi ja Mbimbiliya ku mwono wo. Mbimbiliya kuyishi kulengulula kuhondangana, alioze yakulongesa kuhondangana ni matambu ni kunyongonona ha mulimo. Mbimbiliya yakulongesa yuma yikwo kuhiana kutulweka wika ya kuhondangana. Yakulongesa chize mutuhasa kuwahilila ha kuhondangana.
Shimbi jika ja Mbimbiliya mujihasa kukukwasa kupwa ni uwahililo ku mulimo we? Tunakulakenya hanga uhengule jimwe ja ku shimbi jacho ha mutwe ukwo unasulaho.