“Chino Chapwile Chawana Chilemu Chize Natambwile”

Wano kali maliji a umwe kanuke wa pwo wa miaka 13 muze amuhele mwana kawa ngwe chawana. Umwe pwo wa mingoso kambile ngwenyi, computador amuhele kuli tato ngwe chawana muze apwile ku shikola yalumwine mwono wenyi. Nawa umwe sandungi yamba ngwenyi, cartão anguhele kuli pwo liami wa kulinga chiwanyino chitangu cha umbachiso wetu, kapwile chawana chilemu chinji kuli yami.

Hita mwaka, atu anji kakusa mashimbu ni tachi hanga kufupe chawana “chilemu” chize mahana kuli masepa hanji kuli asoko jo ha mashimbu apema. Nawa anji te mazanga kwivwa maliji ja atu wano tunatongola hano. Mba yena? Shina muzanga kuhana hanji kutambula chawana chize akwenu mazanga?

Yino ye atu anji akuzanga, hi ko mumu ha kuwaha chize mahasa kwivwa ha kutambula chawana chacho, alioze ha chize mevwa mutu yoze mahana chawana chacho. Hachino, Mbimbiliya yinambe ngwo: “Chinawaha kutambula alioze shinaho kuhana.” (Yilinga 20:35) Kwamba pundu, twakwivwa chiseke chinji nyi chawana chacho machilemesa kuli yoze unachitambula.

Kuchi chawana che muchihasa kuvwisa chiseke kuli yena ni kuli yoze machitambula? Nawa, nyi kuushi kuhasa kuhana chawana “chilemu”, yika muhasa kulinga hanga chawana che achilemese?