“Namwene Mbunga Yinene”

1. Kapinda muka apwile nenyi postolo Yoano ku songo lia sekulu yitangu?

KU SONGO lia sekulu yitangu, postolo Yoano kapwile mu umwe kapinda mukalu. Iye te hapwa kashinakaji, kapwile mu zuwo lia ususu ha tungu lia Patemu, nawa kota iye wika wasalile ngwe postolo. (Uso. 1:9) Iye kanyingikine ngwenyi, akwa-kole kanapiangula chikungulwila ni malongeso jo a mahuza ni kuhandununa mandumbu. Chapwile ngwe akwa-Kristu amwenemwene te kanayi ni kuhwa.—Yunda. 4; Uso. 2:15, 20; 3:1, 17.

2. Kulita ni Usolwelo 7:9-14, usolwelo uka ulemu amwene Yoano? (Tala chizulie ha chifukilo.)

² Muze Yoano apwile mu kapinda wacho, Zambi yamwaha umwe usolwelo ulemu hakutwala kulutwe lia matangwa. Mu usolwelo wacho, angelo yatambula shimbi ya kukwata fuji yakunongesa nayo ha luyinda munene, ndo haze masa chijikilo chakasula ha chizavu cha ndungo ja Zambi. (Uso. 7:1-3) Mu chizavu chacho muli atu 144,000, waze makayula hamwe ni Yesu mu malilu. (Luka 12:32; Uso. 7:4) Kusulaho, Yoano yamona chizavu chikwo chinene, chocho yamba ngwenyi: “Namwene mbunga yinene, yize niumwe mahasa kwalula, a ku mavungu eswe, ni ku minyachi yeswe, ni kuli atu eswe, ni ku malimi eswe, kanamana kulutwe lia ngunja, ni kumeso ja mwe Mwana-panga.” (Tanga Usolwelo 7:9-14.) Achinyonga uwahililo uze Yoano evwile muze anyingikine ngwo, kulutwe lia matangwa tununu a tununu twa atu te mawayila Zambi mu jila yalita!

3. (a) Mumu liaka usolwelo wa Yoano unakolesa ufulielo wetu? (b) Yika mutulilongesa ha mutwe uno?

³ Kwamba pundu, usolwelo wacho wakolesele chinji ufulielo wa Yoano. Ni yetu unakolesa ufulielo wetu, mumu tuli ha mashimbu waze usolwelo wacho unamanunuka. Tunamono kukunga cha tununu a tununu twa atu, waze ali ni kutalatala cha kulilamwina ha luyinda munene ni kutwama hashi ku miaka ya mutolo. Ha mutwe uno, mutulilongesaho chize Yehova akwashile atu jenyi ha miaka kuhiana 80 kunyima hanga anyingike mbunga yinene. Kusulaho, mutulilongesa yuma yaali hakutwala ku mbunga yacho: (1) utohwe wayo, nawa (2) atu waze alimo kanakatuka hashi heswe. Yuma yacho muyikolesa ufulielo wa waze eswe analingi chihanda mu chizavu chacho.

KULIHI MBUNGA YINENE MUYIKATWAMA?

4. Umwenemwene uka wa Mbimbiliya uze akwa-mangeleja keshi kulongesa, nawa kuchi Alongi a Mbimbiliya asolwele ngwo kalisa no?

⁴ Akwa-mangeleja keshi kulongesa umwenemwene wa mu Mbimbiliya uze unambe ngwo, atu waze akwononokena Zambi makatwama hano hashi ku miaka yeswe. (2 Kori. 4:3, 4) Musono, mangeleja anji kakwamba ngwo atu eswe apema nyi mafwa kakuya mu malilu. Alioze Alongi a Mbimbiliya, waze akutuhwisa Kaposhi wa Kutalila kukatuka ha mwaka 1879, kapwile ni nyonga lialisa. O kanyingikine ngwo, Zambi te malulieka hashi ni kupwisaho Paraisu, nawa ngwo tununu a tununu twa atu waze akwononokena Zambi makatwama hano hashi—hi mu malilu ko. Alioze, kwapalikile mashimbu mba ayo anyingike kanawa atu jacho.—Mateu 6:10.

5. Yika Alongi a Mbimbiliya anyingikine hakutwala kuli atu 144,000?

⁵ Alongi a Mbimbiliya kanyingikine nawa ngwo kulita ni Liji lia Zambi, amwe te ‘maalanda hashi’ hanga akayule mu malilu hamwe ni Yesu. (Uso. 14:3) Chizavu chacho te muchipwa ni akwa-Kristu 144,000, waze hanalihane kuli Zambi ni kumulingila ni mbunge yeswe muze te achili hano hashi. Mba yika ayo te akunyonga hakutwala kuli mbunga yinene?

6. Yika Alongi a Mbimbiliya anyongene hakutwala kuli mbunga yinene?

⁶ Mu usolwelo wenyi, Yoano yamona mbunga yinene ya atu “kanamana kulutwe lia ngunja, ni kumeso ja mwe Mwana-panga.” (Uso. 7:9) Maliji wano katwalile Alongi a Mbimbiliya anyonge ngwo, chizechene ngwe atu 144,000, mbunga yinene no makaya mu malilu. Alioze nyi atu 144,000 ni mbunga yinene eswe makaya mu malilu, mba kalisa muka te mapwa hakachi ko? Alongi a Mbimbiliya kapwile ni kunyonga ngwo, mbunga yinene te yinachingi akwa-Kristu waze te keshi kwononokena Zambi ni mbunge yeswe muze achili hano hashi. Chipwe ngwe akwa-Kristu jacho te kakukaula shimbi ja Mbimbiliya, nihindu o te kakulinga chihanda ku uwayilo wa mahuza. Hachino, Alongi a Mbimbiliya yakwata chiyulo ngwo, akwa-Kristu jacho kakapwile ni zango linji lize te muliakwasa kuyula hamwe ni Yesu mu malilu. Amu zango lio kuli Zambi te likehe, mbunga yinene muze maya mu malilu o te mapwa wika kulutwe lia ngunja, alioze te kechi kutwama ha ngunja.

7. Kulita ni Alongi a Mbimbiliya, aya te matwama hano hashi ha Kanunu ka Miaka? Yika ayo te akunyonga hali tuvumbi twa Zambi a ku shakulu?

⁷ Mba aya te matwama hano hashi? Alongi a Mbimbiliya te kakutayiza ngwo, chitangu atu 144,000 ni mbunga yinene maya mu malilu. Mba hi tununu twa atu mapwa ni uhashi wa kutwama hano hashi, ni kuzuka yiwape ha Kanunu ka Miaka ya Kuyula cha Kristu. Alongi a Mbimbiliya kakanyingikine ngwo, atu jacho te mapwa waze hanalingila Yehova shimbu Kuyula cha Kristu ha Kanunu ka Miaka kanda chiputuka. Ayo kapwile ni kunyonga ngwo, atu jacho te malilongesa hakutwala kuli Yehova ha Kanunu ka Miaka. Ku songo lia Kanunu ka Miaka, waze te makaula shimbi ja Yehova mazuka mwono wa mutolo hano hashi, alioze yihulia te maashiha. Alongi a Mbimbiliya te kakunyonga nawa ngwo, ha mashimbu jacho waze makalakala hano hashi ngwe “yilolo,” te maya mu malilu ku songo lia Kanunu ka Miaka. Yilolo jacho, amwe te maavuluka ngwo, “a shakulu waze atela ulemu”—wano kali tuvumbi twa Zambi ashishika waze afwile shimbu Kristu te kanda achifwa. Nawa ngwo, tuvumbi jacho te maahindwisa ha Kanunu ka Miaka hanga no aye mu malilu.—Samu 45:16.

8. Yizavu yingahi alongi a Mbimbiliya te akunyonga?

⁸ Mu maliji akehe, Alongi a Mbimbiliya te kakutayiza ngwo, kuli yizavu yitatu: (1) atu 144,000, waze te mayula ni Yesu mu malilu; (2) mbunga yinene ya akwa-Kristu waze te keshi zango linji maya mu malilu, alioze mamana wika kulutwe lia ngunja ya Yesu; nawa (3) tununu a tununu twa atu waze te matwama hano hashi ni kulilongesa hakutwala kuli Yehova ha Kanunu ka Miaka ya Kuyula cha Kristu.b Alioze ha shimbu yalita, Yehova yatukwasa kuchinyingika kanawa.—Yishi. 4:18.

PANGU LIA UMWENEMWENE LINANUNGU NI KUTEMUKA

9. (a) Mu mutapu uka mbunga yinene mahasa kumana “kulutwe lia ngunja, ni kumeso ja Mwana-panga” chipwe ngwe kali hano hashi? (b) Mumu liaka ulumbunwiso uli ha Usolwelo 7:9 unalite?

⁹ Ha mwaka 1935, Yela ja Yehova yanyingika kanawa mbunga yinene yize yili mu usolwelo wa Yoano. Ayo yanyingika ngwo, mbunga yinene mba yimane “kulutwe lia ngunja, ni kumeso ja mwe Mwana-panga” kuyafupiwile kuya mu malilu. Chino muchihasa kulingiwa chipwe ngwe ayo kali hano hashi. Kumana “kulutwe lia ngunja” chinalumbunuka kunyingika wata wa Yehova ni kuuzeyela. (Iza. 66:1) Kumana “kumeso ja Mwana-panga” chinalumbunuka kufuliela ha chitapo cha ukuule wa Yesu. Chizechene nawa Mateu 25:31, 32, unambe ngwo, “mavungu eswe”—kuchingako yingulungulu “makakunguluka” kulutwe lia ngunja ya Yesu mu malilu. Kwamba pundu, akwa-mavungu wano eswe keshi mu malilu, alioze kali hano hashi. Ulumbunwiso uno waha uze Yela ja Yehova awanyine ha mwaka 1935 unalite. Mumu unasolola ngwo, kulita ni Mbimbiliya mbunga yinene kuyichi kaya mu malilu. Alioze mbunga yikehe wika ya atu 144,000 waze ali ni kutalatala chacho e makaya mu malilu hanga akayule “hashi” ni Yesu.—Uso. 5:10.

10. Mumu liaka mbunga yinene atamba kulilongesa hakutwala kuli Yehova shimbu Kanunu ka Miaka kanda aputuka?

¹⁰ Hachino, kukatuka ha mwaka 1935, Yela ja Yehova yanyingika ngwo mbunga yinene yize Yoano amwene, yili chizavu cha akwa-Kristu ashishika waze ali ni kutalatala cha kutwama hano hashi ku miaka yeswe. Mba ayo alilamwine ha luyinda munene, katamba kulilongesa hakutwala kuli Yehova shimbu Kanunu ka Miaka kanda aputuka. Nawa katamba kupwa ni ufulielo ukolo, mba akalilamwine ‘ku yuma yino yeswe muyikapwa,’ shimbu Kanunu ka Miaka ya Kuyula cha Kristu kanda aputuka.—Luka 21:34-36.

11. Mumu liaka amwe Alongi a Mbimbiliya apwile ni kunyonga ngwo atu amwe te maya mu malilu hanyima lia Kanunu ka Miaka?

¹¹ Mba yika mutwamba ha nyonga lize liakwamba ngwo, amwe atu apema te maya mu malilu hanyima lia Kanunu ka Miaka? Ha miaka yinji kunyima, Kaposhi wa Kutalila wa 15 ya Fevereiro 1913, mu inglês, kahanjikile ha chikuma chino. Amwe Alongi a Mbimbiliya te kakulihula ngwo: ‘Mumu liaka atu ashishika ku shakulu makazuka mwono wa mutolo hano hashi, alioze akwa-Kristu waze kashishikile chinji akatambule mwono wa mutolo mu mulilu?’ Kwamba pundu, nyonga lino te linakatuka ha manyonga aali api ngwo: (1) mbunga yinene te muyiya mu malilu, nawa (2) mbunga yinene te yili akwa-Kristu waze keshi zango linji.

12-13. Yika akwa-Kristu akuwayisa ni mbunga yinene ananyingika?

¹² Alioze ngwe chize twamona, kukatuka ha mwaka 1935 Yela ja Yehova yanyingika ngwo, atu waze makalilamwina ha Armagedone kali mbunga yinene yize Yoano amwene mu usolwelo. Ayo “kanatuhuka mu luyinda munene” hano hashi ni kukololoka ni liji linene ngwo: “Ulamwino wa kuli Zambi yetu, yoze watwama ha ngunja, ni kuli mwe Mwana-panga.” (Uso. 7:10, 14) Chikwo nawa, Mbimbiliya yinalongesa ngwo waze kamahindwisa hanga aye mu malilu makatambula “chuma chimwe chipema” kuhiana yize makatambula atu ashishika a ku shakulu. (Hepre. 11:40) Ulumbunwiso uno waha hakutwala ku mbunga yinene, unakevwisa mandumbu jetu kuwaha. Chocho, ayo yaputuka kusanyika atu hanga awayile Yehova ni kuzuka mwono wa mutolo hano hashi.

¹³ Mbunga yino yinene ya kuwahilila chinji ni kutalatala chize akwete. Ayo kananyingika ngwo, Yehova mwe uli ni uhashi wa kusakula waze makaya mu malilu ni waze makatwama hano hashi. Chipwe akwa-Kristu akuwayisa chipwe mbunga yinene, eswe kanyingika ngwo makazuka yiwape, mumu lia chawana cha vumbi lia Zambi, kupalikila mu ukuule wa chitapo cha Yesu Kristu.—Roma 3:24.

YIMWE MBUNGA YINENE CHINJI

14. Mumu liaka mandumbu anji te akukakajana hakutwala ku kumanunuka cha uprofeto wa mbunga yinene?

¹⁴ Muze atu ja Yehova awanyine ulumbunwiso uno waha ha mwaka 1935, anji a kuli ayo yaputuka kulihula ngwo kuchi mbunga yacho muyihasa kwoka chinji? Chakutalilaho, Ronald Parkin yoze wapwile ni miaka 12 muze awanyine ulumbunwiso uno waha yamba ngwenyi: “Ha mashimbu jacho hashi heswe hapwile akwa-kwambujola tununu 56, nawa anji a kuli ayo te akwa-Kristu akuwayisa. Hachino, mbunga yinene te kuyishi kusoloka ngwe muyoka chinji.”

15. Kuchi Yehova anakungu mbunga yinene ha kupalika cha miaka?

¹⁵ Ha miaka yize yasulileho, ululikiso yiuputuka kutuma mishionaliu mu yifuchi yinji, chocho Yela ja Yehova yaputuka kwoka. Kusulaho, ha mwaka 1968, yaputuka umwe katalilo wa Longeso lia Mbimbiliya ha kuzachisa mukanda Umwenemwene Uze Unatwale ku Mwono wa Mutolo, (A Verdade Que Conduz à Vida Eterna.) Mukanda wacho, te wakulumbununa umwenemwene mu jila yashi, hachino atu yaputuka kuzanga chinji umwenemwene. Hakupalika cha miaka yiwana, atu kuhiana tununu 500 yaapapachisa. Chikwo nawa, kukokoloka cha ndundo ja Yingeleja ya Katolika mu América Latina ni mu yifuchi yikwo, kuhwa cha ukanjiso wa mulimo wetu mu Europa ya Chivumbuko ni mu yifuchi yikwo ya África, atu akwo tununu a tununu yaapapachisa. (Iza. 60:22) Ha miaka yize yasulileho, ululikiso wa Yehova yiutuhwisa mikanda ni yuma yinji yipema hanga akwase atu alilongese Mbimbiliya. Musono, akwa-kwambujola Wanangana kali kuhiana tununu nake a tununu. Kwamba pundu, tunamono chize Yehova anakungu mbunga yinene.

YIMWE MBUNGA YINENE YA KU MINYACHI YEKA NI YEKA

16. Kulihi mbunga yinene yinakatuka?

¹⁶ Muze asonekene usolwelo wenyi, Yoano yamba ngwo mbunga yinene te muyiza “ku mavungu eswe, ni ku minyachi yeswe, ni ku malimi eswe ni kuli atu eswe.” Profeta Zekaria te hanahanjika maliji alifwa ni wano, muze asonekene ngwenyi: “Ha matangwa aze kumi lia malunga a ku mavungu a malimi eswe, makakwata ku hina lia mutu umuwika Ka-Yunda nikwamba ngwo, Tutayize kuya ni yena mumu hitwevwa lufuma ngwo, Zambi hwali hamwe ni yenu.”—Zeka. 8:23.

17. Mulimo uka tunalingi hanga tukwase atu a ku mavungu ni malimi eswe?

¹⁷ Yela ja Yehova kananyingika ngwo, mba ahase kukunga atu a ku malimi eswe katamba kwambujola sango lipema mu malimi anji. Yetu hitwalumbununa mikanda ya kulilongesa nayo Mbimbiliya ha miaka kuhiana 130, alioze musono, tunalumbununa mikanda mu malimi anji—uno uli mulimo unene wa kulumbununa uze unalingiwa hano hashi. Kwamba pundu, kukunga mbunga yinene ya atu a ku mavungu eswe chili—chikomokeso chize Yehova analingi ha mashimbu wano. Amu Mbimbiliya ni mikanda yetu yili mu malimi anji, mbunga yinene no kali a ku minyachi yalisa, chipwe chocho, ayo kakuwayila Yehova hamuwika. Nawa Yela ja Yehova kanaanyingika ha kwambujola sango lipema ni zango lize akwete kuli umwe ni mukwo. Yino yeswe yakukolesa ufulielo wetu!—Mateu 24:14; Yoa. 13:35.

USOLWELO UNO YIKA UNALUMBUNUKA KULI YETU?

18. (a) Kulita ni Izaia 46:10, 11, mumu liaka kutushi kukomoka ha kumona chize Yehova anamanununa uprofeto wa mbunga yinene? (b) Mumu liaka waze makatwama hano hashi keshi kulivwa ngwe kanahono yimwe?

¹⁸ Uprofeto hakutwala ku mbunga yinene uli wa ngunda! Nawa kutushi kukomoka ha kumona chize Yehova anamanununa uprofeto uno. (Tanga Izaia 46:10, 11.) Waze analingi chihanda cha mbunga yinene, kakusakwilila ha kutalatala chize Yehova anaehe. Ayo keshi kulivwa ngwe kanahono yimwe, mumu ngwo Zambi kaawayishile ni spiritu yisandu hanga akayule ni Yesu mu malilu. Muze twakutanga Mbimbiliya, twakuwanamo sango ja malunga ni mapwo a ufulielo waze anakasongwela ni spiritu yisandu. Chipwe chocho, ayo keshi mu chizavu cha atu 144,000. Chilweza chimwe chili cha Yoano Chipapachisa. (Mateu 11:11) Ndawichi kali chilweza chikwo. (Yili. 2:34) Ayo ni atu akwo nawa makaahindwisa hanga akatwame mu paraisu hano hashi. Chipwe waze makahindwisa chipwe mbunga yinene waze makalamwina ha luyinda munene, eswe makapwa ni uhashi wakusolola ushishiko wo kuli Yehova ni ku Wanangana wenyi.

19. Yika ulumbunwiso wa usolwelo wa Yoano unatukwase tulinge?

¹⁹ Kukushi mashimbu kunyima waze Yehova akungile tununu a tununu twa atu a ku mavungu eswe ngwe musono. Chipwe ngwe tuli ni kutalatala cha kuya mu malilu hanji cha kutwama hano hashi, nihindu twatamba kukwasa atu anji hanga alichinge ni mbunga yinene ya “mapanga akwo.” (Yoa. 10:16) Kwasala hakehe, Yehova maneha luyinda munene hanga anongese manguvulu ni mayingeleja waze akumwesa atu lamba. Nawa waze eswe ali mu chizavu cha mbunga yinene, makapwa ni chiwape chinene cha kuwayila Yehova ku miaka yeswe hano hashi!—Uso. 7:14.