Kuwahisa Uhashi Wetu wa Kwambujola Kukwasa Alongi a Mbimbiliya Hanga Alihane ni Kwapapachisa

MUMU LIAKA CHILI CHILEMU: Akwa-Kulilongesa Mbimbiliya katamba kulihana kuli Yehova ni kwapapachisa mba Yehova atayize. (1 Petu. 3:21) Waze eswe akutwama kulita ni kulihana cho kakwafunga kuli Zambi. (Samu 91:1,2) Mukwa-Kristu kakulihana mwene kuli Yehova—hi kuli mutu ko hanji ku mulimo hanji ku ululikiso. Kashika, longi katamba kuzanga Zambi ni kumusakwila chinji mu mwono wenyi.—Roma 14:7,8.

CHIZE TWATAMBA KULINGA:

• Muze tunalilongesa, tushimutwinenu ha yize sango jinambe hakutwala kuli Yehova. Mukolwezenu apwe ni kutanga Mbimbiliya tangwa ha tangwa ni kulemba kuli Yehova chakuhona ‘kulitwamina.’—1Tesa. 5:17; Tia. 4:8

• Twatamba kukolweza a longi jetu apwe ni mbunge yakulihana kuli Zambi ni kwapapachisa. Twatamba nawa kwakolweza hanga apwe ni kulinga yuma yikwo yize muyakwasa, ngwe kukumbulula ha pande ni kwambujola kuli enyembo ni masepa jo. Twatamba kwiwuluka ngwetu, Yehova keshi kushinjila atu hanga amuwayile. Mutu katamba kulihana mwene kuli Zambi.—Shimbi 30:19,20

• Tukwasenu alongi jetu alumune mwono wo mba evwise Yehova kuwaha hanga ahase kwapapachisa. (Yishi. 27:11) Twatamba kununga kukwasa alongi hanga alumune utu wo ukulu ni kupwa ni utu waha, mumu ndako jimwe jakunjila chinji ku mbunge ya mutu. (Efwe. 4:22-24) Twatamba kutanga no mitwe ya Kaposhi wa Kutalila yakwamba ngwo “Mbimbiliya Yakwalumuna Mwono wa Atu”

• Mulwezenu yiwape yize yena wakupwa nayo hakulingila Yehova.—Iza. 48:17,18