Yena Muhasa Kukolweza Mukwa-Kristu Yoze Unakokoloka

Liamali 11 ya Abril, Akwa-Kristu anji waze anakokoloka ku spiritu makapwa ha Chiwanyino cha Yesu. Ayo kaputukile kuzomboka mu jila yakuzuka mwono alioze hanahongo ha mukunda wa yitela yinji, yitela yacho yimwe kanayihanjika ha mukanda Volte para Jeova. (Hepre. 12:1) Chipwe chocho, waze anakokoloka mu ufulielo kali alemu chinji kuli Yehova, mumu hanalande ni manyinga a Mwanenyi. (Yili. 20:28; 1 Petu. 1:18, 19) Kuchi mutuhasa kwakwasa hanga ahiluke mu chikungulwila?

Makulwana a mu chikungulwila kakufupa kuwana waze anakokolola mu ufulielo ni kwakwasa ngwe chize kafunga akufupa panga yoze walihandununa mu chendo cha mapanga. (Luka 15:4-7) Chino chakusolola zango lize Yehova ali nalio lia kufunga atu jenyi. (Jere. 23:3, 4) Yetu eswe, mutuhasa kukolweza waze anakokoloka mu ufulielo, hi wika ko makulwana atamba kuchilinga. Tachi jize twakusa hanga tusolole zango hali ayo, jakuvwisa Yehova kuwaha nawa iye mahasa kutuyukisa. (Yishi. 19:17; Yili. 20:35) Kashika, nyonga yoze yena muhasa kutakamisa, nawa chilinge kawashi-washi!

TALENU CHINEMA CHAKWAMBA NGWO, KOLWEZENU WAZE ANAKOKOLOKA MU UFULIELO, MBA NUSHIMUTWINE YIHULA AI:

• Yika Abigail alingile muze anyingikine umwe chela cha Yehova yoze te unakokoloka mu ufulielo?

• Mumu liaka twatamba kukundama kuli makulwana a mu chikungulwila nyi tunazange kukwasa mutu yoze unakokoloka mu ufulielo?

• Kuchi Abigail aliluliekele mba aye ni kumeneka Laura kamuchaali?

• Kuchi Abigail asolwele ngwo kananungu, nawa kanasolola uhomboloji ni zango ha kukolweza Laura?

• Yika mutuhasa kulilongesa ha chilweza cha Yesu chili ha mukanda wa Luka 15:8-10?

• Yiwape yika mandumbu anakapwa nayo ha tachi jize asele hanga akwase Laura?