Kuchi Mulilulieka ha Mashimbu a Chiwanyino?

Kuputuka ha mwaka uno, mutupwa ni mashimbu anji a kulilulieka hanga tukapwe ha Chiwanyino cha Kwiwuluka Kufwa cha Yesu. Nyi Chiwanyino muchipwa ha kachi ka poso, Kukunguluka cha Mwono Wetu ni Mulimo Wetu kuchichi kupwa ko nawa. Nyi muchipwa kusongo lia poso, pande ja mbunga ni Longeso lia Kaposhi wa Kutalila kuyichi kupwa ko nawa. Shina muzachisa kanawa mashimbu waze muupwa no? Ngwe chize apwile ni kulinga ku sekulu yitangu, ni yetu twatamba kulilulieka kanawa hanga tupwe ha Chiwanyino chino chilemu. (Lu 22:7-13; km 3/15 1) Alioze twatamba nawa kululieka mbunge yetu. Kuchi mutuhasa kuchilinga?

• Pukuna ha ulemu wa kuya ha Chiwanyino chacho.—1Ko 11:23-26

• Lemba ni kunyonga ha usepa we ni Yehova.—1Ko 11:27-29; 2Ko 13:5

• Tanga ni kupukuna ha sango jize jinahanjika hakutwala ku ulumbunwiso wa Chiwanyino cha Kwiwuluka Kufwa cha Yesu.—Yo 3:16; 15:13

Akwa-kwambujola amwe kakutanga ni kupukuna ha Yisoneko ya Mbimbiliya yize yakwiza ha kamukanda, Kuhengwola Yisoneko Tangwa ha Tangwa. Amwe kakutanga versu ja mu Mbimbiliya jize jakusoloka ha katalilo uli ha Tradução do Novo Mundo. Eka kakuhitulula yikuma ya Kaposhi wa Kutalila yize yakuhanjika hakutwala ku Chiwanyino ni zango lize Yehova ni Yesu asolwele hali yetu. Chipwe ngwe musakula katalilo mweswawo, nihindu makukwasa kukundama kuli Yehova ni Mwanenyi.