Shina Wakuyuka ha Kuhengwola Yisoneko Tangwa ha Tangwa?

Shina ukwete chako cha kutanga chisoneko cha ha tangwa ni maliji waze ali ha kamukanda Kuhengwola Yisoneko Tangwa ha Tangwa? Nyi ka, shina muhasa kuputuka kuchilinga hita tangwa? Atu anji kakuzanga kutanga chisoneko cha ha tangwa ha chimene, hanga ahase kupukuna ha chisoneko chacho muze ali ku milimo yo ya hita tangwa. (Yos 1:8; Sam 119:97) Nawa kuchi muhasa kuyuka chinji ha chisoneko cha hita tangwa? Tanga chisoneko cheswe cha Mbimbiliya hanga unyingike chize yuma yalingiwile. Chuma chikwo chize muhasa kulinga chili, kunyonga ha chilweza cha Mbimbiliya chize chinatale ha chisoneko chacho. Kusulaho, kaula yize walilongesa ku mwono we. Nyi mukaula usongwelo wa Liji lia Zambi ha kukwata yiyulo ye, yena muyuka chinji.—Sam 119:105.

Asoko a ku Mbetele mu yifuchi yeswe, kakuhengwola Yisoneko Tangwa ha Tangwa ha kulia cha chimene. Ha miaka yino, pande ja uwayilo wa chimene kanajise ha JW Broadcasting^® ha chikuma TUTALILO NI YIHEHO. Chisuho chika cha kasula watalile jimwe pande jacho? Hanji yize mutala ye unafupu ku mwono we. Chakutalilaho, yika muhasa kulilongesa ha chilweza cha Lote ha kukwata yiyulo?

TALENU CHINEMA, KANDA NUZANGA HANO HASHI (1Yo 2:15), MBA NUKUMBULULE YIHULA YINO:

• Chisoneko chika cha Mbimbiliya haze hanakatuka Uwayilo uno wa Chimene?

• Kuchi lusango wa Lote anasolola ponde ya kuzanga hashi ni yuma yize yiliho?—Upu 13:12; 14:12; 19:3, 12, 13, 24-26

• Kuchi twakusolola ngwetu twakuzanga Yehova hi hashi ko ni yize yiliho?