Tesa Yize Mulinga ha Mashimbu a Chiwanyino cha Kwiwuluka Kufwa cha Yesu

Ha miaka yeswe, tuvumbi twa Yehova kakuwahilila ha kupwa hamuwika ha Chiwanyino cha Kwiwuluka Kufwa cha Yesu. Ha poso jacho jalipwila shimbu kanda tuchiputuka Chiwanyino cha Kwiwuluka Kufwa cha Yesu ni hanyima lia chiwanyino chacho, twakupwa ni uhashi wa kuhalisa ni kusakwilila Yehova mumu lia ukuule. (Efw 1:3, 7) Chakutalilaho, twakulihana ni mbunge yeswe hanga tusanyike atu ha Chiwanyino cha Kwiwuluka Kufwa cha Yesu. Amwe mahasa kulinga katalilo hanga akalakale ngwe pionelu wa shimbu likehe ha kuhana maola 30 hanji 50 ha tukweji a Março ni Abril. Shina unazange kwokesa mashimbu je mu mulimo wa kwambujola ha Chiwanyino cha Kwiwuluka Kufwa cha Yesu? Yika muyihasa kukukwasa kulinga kanawa mulimo uno?

Kanji-kanji twakuhasa kulinga mulimo wacho muze twakulianga kulinga umwe katalilo. (Yis 21:5) Muze Chiwanyino cha Kwiwuluka Kufwa cha Yesu chinakundama, kakupwa mashimbu alita akuputuka kulinga katalilo we. Tala chize muhasa kulihana mu mulimo wa kwambujola ha mashimbu a Chiwanyino, ni kunyonga ha yize mufupa hanga ulinge kanawa mulimo wacho. Kashika, eta kuli Yehova hanga awahise tachi je.—1 Yoa. 5:14, 15.

Shina muhasa kunyonga ha majila amwe akulihanyinamo chinji mu mulimo wa kwambujola ha mashimbu a Chiwanyino cha Kwiwuluka Kufwa cha Yesu?