MUTWE WAKULILONGESA 33
Yehova Kakufunga Atu Jenyi
“Liso lia Yehova kuliakutala kuli waze akumuvwila woma.”—SAMU 33:18.
MWASO 4 “Yehova Iye Kafunga Kami”
CHIKUMA CHILEMUa
1. Mumu liaka Yesu etele kuli Yehova hanga afunge tumbaji twenyi?
HA UFUKU uze te kanda achifwa, Yesu ketele kuli Tato hanga afunge tumbaji twenyi. (Yoa. 17:15, 20) Chamwenemwene Yehova kakufunga atu jenyi mashimbu eswe. Chipwe chocho, Yesu te kananyingika ngwenyi Satana mapinjisa chinji tumbaji twenyi. Kanyingikine nawa ngwenyi, ayo te mafupiwa ukwaso wa Yehova mba akumbe yeseko ya Satana.
2. Kulita ni Samu 33:18-20, mumu liaka kutwatambile kwivwa woma wa yipikalo?
2 Chifuchi chino anayulu kuli Satana chakumwesa akwa-Kristu amwenemwene lamba linji. Twakupalika mu yipikalo yize muyihasa kutuhongesa ni kusa mu cheseko ushishiko wetu kuli Yehova. Alioze ha mutwe uno, mutumonaho ngwetu kutwatambile kwivwa woma wa chuma nichimwe. Yehova kakumona lamba lietu nawa kanazange kutukwasa. Mutulilongesa yilweza yaali ya mu Mbimbiliya yize muyisolola ngwo, ‘Yehova kakutala ni kufunga waze akumuvwila woma.’—Tanga Samu 33:18-20.
YEHOVA KAKUTUKWASA MUZE TUNALIVU UKAWETU
3. Ha mashimbu aka mutuhasa kulivwa ukawetu?
3 Chipwe ngwe tuli ni mandumbu ni mapangi anji mu chikungulwila, nihindu ha mashimbu amwe mutuhasa kulivwa ukawetu. Chakutalilaho, akweze mahasa kulivwa ukawo muze analumbununa yize afuliela kuli alongi-ni-akwo ku shikola hanji muze malukila mu chikungulwila cheka. Amwe a kuli yetu mutuhasa kunenganyana ni kupinda ni manyonga api, ha kunyonga ngwo mutwakumba ukawetu. Mutuhasa kwehuka kulweza akwetu yize tunevu mumu tunanyongo ngwetu, kukushi niumwe yoze matwivwa. Ha mashimbu amwe, mutuhasa kunyonga ngwetu, kukushi niumwe yoze unalihulumba hali yetu. Kulivwa ukawetu ha chuma cheswecho muchilingiwa, muchihasa kutuhongesa ni kutusakalalisa. Yehova keshi kuzanga tulivwe chocho. Yika yinatwehe shindakenyo yacho?
4. Mumu liaka profeta Eliya ambile ngwenyi: “Yami wika ukawami nasala”?
4 Tutalenu chilweza cha Eliya umwe lunga wa shishika. Jezebele kambile ngwenyi mamushiha, chocho yachina ha matangwa 40 hanga alamwine mwono wenyi. (1 Mia. 19:1-9) Muze apwile ukawenyi ku chivwenge, yalweza Yehova ngwenyi: “[Profeta] yami wika nasala.” (1 Mia. 19:10) Mu chifuchi mwapwile aprofeta akwo. Chakutalilaho, Obadia kanakapulwila aprofeta 100 waze Jezebele ambile kushiha. (1 Mia. 18:7, 13) Mba, mumu liaka Eliya alivwile ukawenyi? Shina kanyongene ngwenyi, aprofeta eswe waze Obadia alamwinyine no kafwile? Kutala kalivwile ukawenyi mumu aprofeta akwo kakalichingile nenyi hanga awayile Yehova hanyima lia cheseko cha Mbale ku Mulundu Karmela? Nyi kalivwile chocho mumu kanyongene ngwenyi, kukushi niumwe yoze unanyingika ponde yize te anapalika hanji unalihulumba hali iye? Lusango yono keshi kulumbununa yuma yeswe yize Eliya evwile. Alioze tunanyingika pundu ngwetu, Yehova kanyingikine yize yatwalile Eliya kulivwa ukawenyi nawa kanyingikine chize mamukwasa.
Muze tunalivu ukawetu, longeso lika mutuwana ha chize Yehova akwashile Eliya? (Tala maparagrafu 5-6)
5. Kuchi Yehova akwashile Eliya muze te analivu ukawenyi?
5 Yehova kalingile yuma yinji hanga akwase Eliya. Iye kakolwezele Eliya hanga ahanjike. Kamuhulile ha yisuho yaali ngwenyi: “Yika unalingi kuno?” (1 Mia. 19:9, 13) Ha hita chisuho, Yehova kapanjikile kanawa Eliya muze te anamulweze chize anevu. Yehova kakumbulwile Eliya ha kumusolwela ngwo, kapwile hamwe nenyi nawa ngwo kakwete ndundo jinji. Iye nawa yakolweza Eliya ha kumulweza ngwenyi, te kuchili A-Izalele anji waze te anamuwayila. (1 Mia. 19:11, 12, 18) Kwamba pundu, Eliya kalivwile kanawa hanyima lia kulweza Yehova chize te anevu ni kwivwa kumbululo Lienyi. Yehova yahana Eliya milimo yinji yilemu. Yamulweza awayise Hazaele hanga apwe mwanangana mu Seria, Jehu apwe mwanangana mu Izalele, Elisha aye apwe profeta. (1 Mia. 19:15, 16) Ha kuhana Eliya milimo yacho, Yehova yamukwasa hanga apwe ni nyonga lialita. Chikwo nawa, Yehova yamwaha sepa mupema, Elisha. Kuchi muhasa kutambula ukwaso wa Yehova muze mulivwa ukawe?
6. Yuma yika muhasa kwita mu yilemba muze unalivu ukawe? (Samu 62:8)
6 Yehova kanakwite hanga ulembe kuli iye. Kanamono yuma yeswe yize unapalika, kashika anakulweze ngwenyi mapanjika yilemba ye ha shimbu lieswalio. (1 Tesa. 5:17) Iye kakuzanga kupanjika yilemba ya tuvumbi twenyi. (Yishi. 15:8) Yuma yika muhasa kwita mu yilemba muze unalivu ukawe? Ngwe Eliya, lweza Yehova chize unevu ku mbunge. (Tanga Samu 62:8.) Mulweze yuma yize yinakupinjisa ni chize unevu mumu lia yuma yacho. Eta kuli Yehova hanga akukwase kunyingika yize mulinga muze mulivwa ukawe. Chakutalilaho, nyi wakulivwa ukawe hanji wakwivwa woma wa kwambujola ku shikola, eta kuli Yehova akwehe hamu lize unafupiwa hanga uhase kuhanjika. Muhasa kumwita malinjekela hanga ulumbunune yize wafuliela ni mana. (Luka 21:14, 15) Nyi unapinji ni manyonga api, eta kuli Yehova hanga akukwase kuhanjika yuma yacho ni mandumbu waze ajama. Muhasa kwita Yehova hanga akwase ndumbu yoze muhanjika nenyi akupanjike kanawa. Lweza Yehova chize unevu, tala chize makumbulula yilemba ye ni kutayiza ukwaso wa akwenu. Nyi wachilinga, kuuchi kulivwa ukawe!
DShina wakufupa majila hanga wambujole chinji ni kukwasa akwenu? (Tala paragrafu 7)
7. Yika walilongesa ha chilweza cha Mauricio?
7 Yetu eswe Yehova hanatwehe umwe mulimo ulemu. Muhasa kupwa ni shindakenyo ngwenyi, iye kakumona ni kulemesa yuma yize wa kulinga mu chikungulwila ni mu mulimo wa kwambujola. (Samu 110:3) Kuchi kulihana chinji mu mulimo uno muchikukwasa muze mulivwa ukawe? Tutalenu chilweza cha Mauricio,b umwe ndumbu mukweze. Hanyima lia kumupapachisa, umwe wa kuli masepa jenyi yaputuka kuhichika umwenemwene hakehe-hakehe. Mauricio yamba ngwenyi: “Muze namumwene mahichika Yehova, chino chakwachile ha hamu lize napwile nalio. Te nakulihula nyi munguhasa kushishika kuli Yehova ni kununga mu usoko wenyi. Chocho, yinguputuka kulivwa ukawami ni kunyonga ngwami kukushi niumwe yoze wakulihulumba hali yami.” Mba yika yakwashile Mauricio? Mwene yamba ngwenyi: “Kwambujola chinji changukwashile kuhona kulihulikila hali yami mwene ni kwehuka manyonga jami api. Nawa kwambujola ni mandumbu jami changukwashile kuwahilila ni kuhona kulivwa ukawami.” Kwamba pundu, chipwe muze kutushi hamuwika ni mandumbu jetu hanga twambujole, nihindu mutuhasa kuwana utakamiso ha kwambujola no kupalikila mu kusoneka mikanda ni ku telefone. Yika yakwashile nawa Mauricio? Yawezela ngwenyi: “Kulinga milimo ya mu chikungulwila changukwashile chinji. Napwile ni kusa tachi hanga ngululieke kanawa yihanda ya alongi yize te akungwaha ha kukunguluka. Yihanda yacho yangukwashile kulivwa ngwo ngukwete ulemu kuli Yehova ni kuli mandumbu jami.”
YEHOVA KAKUTUKWASA MUZE YIPIKALO YINATUHONGESA
8. Kuchi mutuhasa kulivwa mumu lia kupalika mu yipikalo yinji?
8 Tunashimbwila kupalika mu yipikalo ha matangwa wano a kusula. (2 Timo. 3:1) Chipwe chocho, mutuhasa kuhona kushimbwila yimwe yipikalo hanji kukomoka muze yipikalo yacho muyilingiwa. Chakutalilaho, susumuku mutuhasa kupalika mu kapinda wa mbongo, kutuwana ni umwe musongo upi hanji kufwisa mutu yoze twazanga. Ha mashimbu yacho, mutuhasa kuhonga, chipi-chipi nyi chinasoloka ngwe tunapalika mu yipikalo yinji ha shimbu limuwika. Kashika, twiwulukenu ngwetu, Yehova kanamono yize yinalingiwa ku mwono wetu nawa ni ukwaso wenyi mutukumba yipikalo yacho ni hamu.
9. Lumbununa yipikalo yimwe yize Yombi apalikile.
9 Tutalenu chize Yehova akwashile Yombi, lunga washishika. Iye kapalikile mu yipikalo yinji ha shimbu limuwika. Ha tangwa limuwika, Yombi yatambula lusango ngwenyi, yimuna jenyi eswe kaashiha nawa ngwenyi, tuvumbi twenyi ni ana jenyi no kaashiha. (Yombi 1:13-19) Muze te anapinji ni yikola ya kutokesa upite ni kufwisa ana jenyi, Yombi yayiza musongo upi chinji. (Yombi 2:7) Mwono wenyi te unakale chinji, kashika ambile ngwenyi: “Mwono wami hiwangupihila; chazangile kutwama ni mwono.”—Yombi 7:16.
Mba akwase Yombi kunyingika zango lize akwete, Yehova yahanjika nenyi hakutwala ku chize akufunga yitangiwa yenyi mu majila eka ni eka (Tala paragrafu 10)
10. Kuchi Yehova ahanyine kuli Yombi yize te anafupiwa hanga akumbe yipikalo yenyi? (Tala chizulie ha chifukilo.)
10 Yehova kamwene yeswe yize te yinalingiwa kuli Yombi. Amu azangile chinji Yombi, Iye yamwaha yize te anafupiwa hanga akumbe yipikalo ni kununga ni kushishika. Yehova yahanjika ni Yombi, ha kumwiwulula mana Jenyi ahiana ni chize akufunga yitangiwa yenyi ni zango. Iye yahanjika ha tushitu anji akukomwesa. (Yombi 38:1, 2; 39:9, 13, 19, 27; 40:15; 41:1, 2) Yehova nawa yazachisa Elihu, umwe mukweze washishika hanga akolweze Yombi ni kumutakamisa. Elihu yamulweza ngwenyi, Yehova kakuwahisa tuvumbi twenyi ha kunyongonona cho. Alioze, Yehova kazachishile nawa Elihu hanga ahane Yombi yimwe yiyulo ya zango. Elihu kakwashile Yombi hanga eche kunyonga chinji hali mwene, ha kumwiwulula ngwenyi, tuli chinji akepe ha kulitesa ni Yehova, Sakatanga wa malilu ni hashi. (Yombi 37:14) Yehova kahanyine nawa Yombi umwe mulimo hanga alinge. Iye yamulweza hanga alembele masepa jenyi atatu waze avulumwine. (Yombi 42:8-10) Kuchi Yehova akutukwasa musono muze tunapalika mu yipikalo?
11. Kuchi Mbimbiliya yakutukwasa muze tunapalika mu yipikalo?
11 Yehova keshi kuhanjika ni yetu ngwe chize ahanjikile ni Yombi, alioze kakuchilinga kupalikila mu Mbimbiliya. (Roma 15:4) Iye kakututakamisa ha kutwaha kutalatala cha kulutwe lia matangwa. Tutalenu yimwe yisoneko yize muyihasa kutukwasa muze tunapalika mu yipikalo. Mu Mbimbiliya, Yehova kanatulweze ngwenyi, kukushi chuma nichimwe chize ‘muchituhandununa ku zango [lienyi]’ chipwe yipikalo yinji kuyichi kuhasa. (Roma 8:38, 39) Kanatulweza nawa ngwenyi, “hakamwihi ali ni waze eswe akutambika kuli iye” mu yilemba. (Samu 145:18) Yehova kanambe ngwenyi, nyi mutujikijila muli iye, mutuhasa kunyongonona mu yipikalo yeswayo ni kuwahilila chipwe muze tunamono lamba. (1 Kori. 10:13; Tia. 1:2, 12) Liji lia Zambi linatwiwulula nawa ngwo, yipikalo yetu yili ya mashimbu akehe nyi twayitesa ni yiwape yize mutukazuka kulutwe. (2 Kori. 4:16-18) Yehova kanatulakenya ngwenyi makachiza yuma yeswe yize yakutumwesa lamba, kuchingako Satana ni waze eswe akumwimbulula. (Samu 37:10) Shina uli ni yimwe yisoneko ya mu Mbimbiliya yize muyikukwasa kunyongonona mu yipikalo yize muyiza kulutwe?
12. Yika Yehova anazange hanga tulinge nyi tunafupu kuyuka chinji ha Liji lienyi?
12 Yehova kanazange tuse amwe mashimbu hanga tulilongese Mbimbiliya hita tangwa ni kupukuna ha yize tunalilongesa. Muze tunakaula yize tunalilongesa, ufulielo wetu muukola nawa mutupwa ni usepa upema ni Yehova. Nyi twachilinga, mutupwa ni tachi ja kunyongonona mu yipikalo. Yehova nawa kakuhana spiritu yenyi yisandu kuli waze akujikijila mu Liji lienyi. Spiritu yacho muyihasa kutwaha ‘ndundo jahiana’ hanga tukumbe hita kapinda yoze mutupwa nenyi.—2 Kori. 4:7-10.
13. Kuchi kulia cha ku ufulielo chize akutwaha kuli “ndungo wamwenemwene” chakutukwasa kukumba yipikalo?
13 Ni ukwaso wa Yehova, “ndungo wamwenemwene” kakutuhwisa mikanda, yinema ni miaso yize yakutukwasa kukolesa ufulielo wetu ni kukundama kuli Yehova. (Mateu 24:45) Twatamba kuzachisa kanawa yuma yeswe yize Yehova akutwaha. Umwe pangi mu Estados Unidos kambile ngwenyi, kakusakwilila chinji ha kulia cheswe cha ku ufulielo chize akutambula. Yamba ngwenyi: “Ha miaka 40 yize ngunalingila Yehova, ushishiko wami wapalika mu yeseko yeka ni yeka.” Iye kapalikile mu yipikalo yinji—kako yamushiha ku mashinyi kuli shofwele yoze te unazengewa, yisemi jenyi yafwa ni umwe musongo upi chinji nawa iye yayiza musongo wa câncer ha yisuho yaali. Mba yika yamukwashile kunyongonona? Mwene yamba ngwenyi: “Yehova kakungufunga mashimbu eswe. Kulia cha ku ufulielo chize akutwaha kupalikila muli ndungo wamwenemwene, chakungukwasa kunyongonona. Mumu lia kulia chino, munguhasa kwamba ngwe Yombi ngwami: ‘Ndo kufwa chami chichi kwecha ungunu wami.’”—Yombi 27:5.
Kuchi mutuhasa kukwasa mandumbu jetu mu chikungulwila? (Tala paragrafu 14)
14. Kuchi Yehova akuzachisa mandumbu jetu hanga atukwase kunyongonona mu yipikalo? (1 A-Tesalonika 4:9)
14 Yehova kanafumbu atu jenyi hanga alizange ni kulitakamisa ha mashimbu akalu. (2 Kori. 1:3, 4; tanga 1 A-Tesalonika 4:9.) Ha kwimbulula Elihu, mandumbu ni mapangi jetu kanazange chinji kutukwasa hanga tununge ni kushishika muze mutupalika mu yipikalo. (Yili. 14:22) Chakutalilaho, tutalenu chize mandumbu mu chikungulwila atakamishine Diane ni kumukwasa kukundama kuli Yehova muze mukwo-lunga ayijile chinji. Yamba ngwenyi: “Chapwile chikalu, alioze twamwene ukwaso ni zango lia Yehova ha tukweji jacho akalu. Chikungulwila chetu chatukwashile chinji. Mandumbu kapwile ni kutumeneka, kutusanyika ku telefone ni kutukangayika. Yino yeswe yatukwashile kunyongonona. Amu te kuchishi kwendesa nawa mashinyi, mandumbu kaluliekele yuma yeswe hanga ngupwe ni kuya ku kukunguluka ni kutuhuka mu munda muze te nakuhasa kuchilinga.” Twakuwahilila chinji mumu lia kupwa mukachi ka mandumbu jetu waze akutuzanga!
TWAKUSAKWILILA YEHOVA HA UKWASO WENYI WA ZANGO
15. Mumu liaka tuli ni shindakenyo ngwetu, mutuhasa kukumba yipikalo yize tunapalika?
15 Kulutwe lia matangwa, yetu eswe mutupalika mu yimwe yipikalo. Alioze ngwe chize twalilongesa, kutuchi kapwa ukawetu. Ngwe chizechene apwa umwe chisemi wa zango, Yehova kwali hanga atukwase. Iye kali hakamwihi ni yetu hanga apanjike yilemba yetu, nawa kanazange kutukwasa tunyongonone. (Iza. 43:2) Tuli ni shindakenyo ngwetu, mutuhasa kukumba yipikalo mumu Yehova kakutwaha yeswayo tunafupiwa hanga tunyongonone. Iye hanatwehe chawana cha kulemba, Mbimbiliya, kulia cha ku ufulielo cheka ni cheka ni mandumbu anji waze akutukwasa ha mwaka wa chikala.
16. Kuchi mutuhasa kununga mu ufunge wa zango wa Yehova?
16 Twakusakwilila chinji ha kupwa ni Tata yetu wa mu malilu yoze wakutukwasa! Mbimbiliya yinambe ngwo: “Mbunge jetu mujiwahilila muli iye.” (Samu 33:21) Mutuhasa kusolola kuli Yehova ngwetu, twakusakwilila ha ufunge wenyi wa zango ha kuzachisa yuma yeswe yize akutwaha hanga atukwase. Nawa twatamba kulinga chihanda chetu hanga tununge mu ufunge wa Zambi. Mu maliji akwo, nyi twanunga ni kulinga yize mutuhasa hanga twononokene Yehova ni kulinga yize yalita, iye matufunga ku mwono wetu weswe!—1 Petu. 3:12.
MWASO 30 Tata, Zambi Kanda Sepa Liami
a Tunafupiwa ukwaso wa Yehova mba tukumbe yipikalo yize tuli nayo musono. Mutwe uno mutwiwulula ngwo, Yehova kakufunga atu jenyi. Iye kakumona yize hita umwe wa kuli yetu akupalika, kashika akutwaha ukwaso hanga tukumbe yipikalo jacho.
b Majina amwe kapwa kwalumuna.