MUTWE WA KULILONGESA 36
MWASO 89 Panjika, Ononoka Hanga Akupale
Pwenu Akwa-Kulinga Yize Liji lia Zambi Linambe”
“Pwenu akwa-kulinga yize liji lia Zambi linambe, kanda nupwa wika akwa-kwivwa.”—TIA. 1:22.
YIZE MUTULILONGESA
Mutwe uno, muutukwasa tuzange chinji kutanga Liji lia Zambi, kulipukuna ni kukaula yize twakulilongesa ku mwono wetu.
1-2. Yika yakukwasa tuvumbi twa Yehova kuwahilila? (Tiangu 1:22-25)
YEHOVA ni Mwanenyi Yesu, kanazange hanga tuwahilile. Mukwa-kusoneka Samu 119:2 yamba ngwenyi: “Kawaha waze akufunga shindakenyo jenyi; kawaha waze akumufupa ni mbunge yeswe.” Yesu neye yamba ngwenyi: “Kawaha waze akwivwa liji lia Zambi ni kulikaula!”—Luka 11:28.
2 Yetu twakuwahilila chinji, mumu lia kupwa tuvumbi twa Yehova! Mumu liaka? Mumu tuli ni yikuma yinji yipema, alioze chikuma chilemu chili kutanga Mbimbiliya matangwa eswe ni kusa tachi hanga tukaule yize twakulilongesa.—Tanga Tiangu 1:22-25.
3. Yika twakuyuka muze twakukaula yize twakulilongesa mu Liji lia Zambi?
3 Muze twakulinga yize Liji lia Zambi liakwamba, twakupwa ni yiwape yinji. Tunanyingika ngwetu, yino ye twatamba kulinga mba tuvwise Yehova kuwaha. Kunyingika chikuma chino chakutuvwisa kuwaha. (Chilu. 12:13) Muze twakukaula yize twakulilongesa mu Liji lia Zambi, mwono wetu mu usoko wa kupema chinji, usepa wetu ni mandumbu newo wakukola. Kota yino hiyinalingiwa kama ku mwono we. Chikwo nawa, twakwehuka milonga yinji, yize akupwa nayo atu waze keshi kuwayila Yehova. Yetu tunatayiza maliji waze Ndawichi ambile. Hanyima lia kwimba hakutwala ku shimbi, yiyulo ni upatwilo wa Yehova, iye yahwisa ni maliji wano: “Ha kuyilinga kuchili kwononona chinene.”—Samu 19:7-11.
4. Mumu liaka chakupwa chikalu kutanga Liji lia Zambi ni kukaula yize twakulilongesamo?
4 Kwamba umwenemwene, hi chashi ko kutanga Mbimbiliya matangwa eswe ni kukaula yize tunalilongesa. Chipwe ngwe tuli ni yuma yinji ya kulinga tangwa ha tangwa, nihindu twatamba kusa mashimbu hanga tutange Mbimbiliya ni kulilongesayo, mba tunyingike yize Yehova anashimbwila hali yetu. Kashika ha mutwe uno, mutumonaho yimwe yikuma yize muyitukwasa kutanga Mbimbiliya hita tangwa. Mutumona nawa chize mutuhasa kupukuna ha yize twakutanga, ni kumona majila a chize mutuyikaula ku mwono wetu.
PWAKO NI MASHIMBU A KUTANGA LIJI LIA ZAMBI
5. Yuma yika yakutumbata mashimbu anji?
5 Tuvumbi twa Yehova anji kakwete yuma yinji ya kulinga. Twatamba kupwa ni mashimbu hanga tulinge yuma yilemu yize Mbimbiliya yakwamba ngwo, twatamba kuyilinga. Ngwe chilweza, twatamba kukalakala hanga tulikwase yetu-ene ni kulela asoko jetu. (1 Timo. 5:8) Mandumbu anji kakufunga asoko jo waze hashinakajiwa hanji waze ayiza. Chikwo nawa, yetu eswe twakufupa kulifunga ku mujimba, yino neyo yakumbata mashimbu. Kuchizako yino, tuli nawa ni yiteli yikwo mu chikungulwila. Chimwe cha ku yiteli yacho chilemu chinji, chili kwambujola sango jipema. Chipwe ngwe ukwete yiteli yino yeswe, kuchi muhasa kupwa ni mashimbu a kutanga Mbimbiliya, kupukuna ha yize wakutanga ni kuyikaula ku mwono we?
6. Kuchi muhasa kusa kutanga cha Mbimbiliya ha chihela chitangu ku mwono we? (Tala nawa chizulie.)
6 Kutanga Mbimbiliya chili ‘chuma chilemu’ kuli Akwa-Kristu, kashika twatamba kuchisa ha chihela chitangu ku mwono wetu. (Fwili. 1:10) Ha kuhanjika hali mutu yoze wa wahilila, maliji atangu a Samu kakwamba ngwo: “Kuwahilila chenyi chili mu shimbi ja Yehova. Kakupukuna mu Shimbi jenyi mwalwa ni ufuku.” (Samu 1:1, 2) Chino chinasolola pundu ngwo, twatamba kusa mashimbu hanga tutange Mbimbiliya. Mashimbu aka alita kutanga Mbimbiliya? Chino chili chikuma chize chinatale hali mutu ni mutu. Alioze chuma chilemu chili, kusakula mashimbu waze matukwasa kutanga Mbimbiliya matangwa eswe. Ndumbu Victor yamba ngwenyi: “Yami nakuzanga kutanga Mbimbiliya chimene. Kwamba umwenemwene, chishi kuzanga kuhinduka ni kawashi. Alioze mashimbu a chimene kakupwa apema, mumu manyonga jami anachituluka; chakupwa chashi kulihulikila ha yize ngunatange.” Kota yino hiyinalingiwa ni kuli yena. Kashika, lihule ngwe: ‘Ha mashimbu aka nakuzanga kutanga Mbimbiliya?’
Mashimbu aka alita kutanga Mbimbiliya? Shina wakuhasa kuyitanga tangwa ha tangwa? (Tala paragrafu 6)
PUKUNA HA YIZE WAKUTANGA
7-8. Yika muyihasa kututwala tuhone kuyuka ha yize tunatange mu Mbimbiliya? Hana chilweza.
7 Kwamba umwenemwene, ha mashimbu amwe mutuhasa kutanga yuma yinji chakuhona kukwata nichimwe. Shina hiunatange kama yimwe mba hanyima lia mashimbu akehe, yiumona ngwe wavulama yize watanga? Yino yakulingiwa kuli yetu eswe, kashika muyihasa kulingiwa nawa muze tunatange Mbimbiliya. Yena hanji mutesa kutanga tupitulu anji a Mbimbiliya tangwa ni tangwa. Lino lili nyonga lipema. Chili chilemu kutesa yimwe ni kusa tachi hanga tuyilinge. (1 Kori. 9:26) Kutanga Mbimbiliya chili chipema, alioze chili wika uputukilo. Twatamba kulinga yuma yinji mba tuyuke ha yize twakutanga mu Mbimbiliya.
8 Tuchinyongenu ha chilweza chino: Vula kapwa mulemu chinji kuli akwa-mwono eswe hano hashi. Alioze, nyi vula manoka chinji, mwalwa kuushi kupwako. Muze yino yakulingiwa, vula yoze wakununga ni kunoka keshi kupwa nawa ni ulemu. Kwakufupiwa mashimbu mba hashi hakoke meya waze akukwasa mwambu ni mitondo yisokoloke. Chizechene nawa, kutwatambile kutanga Mbimbiliya kawashi-washi, che kwamba, kafuji-fuji chakuhona kukwata niyimwe hanji kuvulama yize twatanga.—Tia. 1:24.
Ngwe chizechene kwakupalika mashimbu mba mavu akoke meya a vula, ni yetu twatamba kusa mashimbu mba tupukune ha yize twakutanga mu Mbimbiliya (Tala paragrafu 8)
9. Yika twatamba kulinga nyi mutumona ngwetu, twakutanga Mbimbiliya kafuji-fuji?
9 Shina hichinalingiwa kama kuli yena unatange Mbimbiliya, mba yiumona ngwe wachilinga kafuji-fuji? Ha chikuma ngwe chino, yika muhasa kulinga? Tanga hakehe-hakehe hanga upwe ni uhashi wa kunyonga ha yize unatange. Kulinga chino, hi chikalu ko. Nyi nyonga lia kumana hanga upukune ha yize unatange mulisoloka ngwe likalu kuli yena, mwona wika kupuna ngwe kunyonga ha yize unatange. Muhasa kuwezela amwe mashimbu muze unalilongesa hanga upukune. Hanji muhasa kutanga versu jikehe wika hanga usale ni mashimbu anji a kupukuna. Victor yoze twatongola ku uputukilo, yamba ngwenyi: “Muze nakutanga Mbimbiliya, kanji-kanji nakutanga kapitulu umuwika. Amu nakutanga ha chimene, chakupwa chashi kunyonga ha yize natanga ha kupalika cha tangwa.” Chipwe ngwe musakula mutapu weswawo wa kutangilamo Mbimbiliya, chuma chilemu chili kuyuka ha yize unatange.—Samu 119:97; tala mushete, “Yize Mutuhasa Kulihula.”
10. Hana chilweza cha chize muhasa kukaula yize unalilongesa. (1 A-Tesalonika 5:17, 18)
10 Chipwe ngwe mututanga Mbimbiliya ha shimbu lieswalio hanji kumbata maola eswawo, nihindu twatamba kumana hanga tunyonge ha yize tunatange. Muze mutanga umwe lusango wa mu Mbimbiliya, lihule ngwe: ‘Kuchi lusango yono mangukwasa haliapwila ni kulutwe lia matangwa?’ Ngwe chilweza, uchinyonga ngwe unatange 1 A-Tesalonika 5:17, 18. (Tanga.) Hanyima lia kutanga versu jino jaali, mumana ni kunyonga ha unji wa yisuho yize wakulemba. Muhasa nawa kunyonga ha yuma yize wakusakwilila chinji, hanji mutesa kusakwilila Yehova ha yuma yitatu. Nyi mumana ha minutu yikehe hanga unyonge ha malongeso a mu Mbimbiliya, chino muchikukwasa kunyingika kanawa Liji lia Zambi ni kukaula malongeso jamo. Nyonga ha yiwape yize muzuka ha kulinga chino tangwa ha tangwa ni ha yisoneko yikwo yize mutanga. Nyi wachilinga, mwopwa mukwa-kulinga yize Liji lia Zambi liakwamba. Mba yika mulinga nyi munyingika ngwe, kuli yuma yinji yize watamba kwalumuna?
TESA KULINGA YUMA YIZE MUHASA KUMANUNUNA
11. Mumu liaka ha mashimbu amwe muhasa kuhonga? Hana chilweza.
11 Muze muputuka kutanga Mbimbiliya, ha mashimbu amwe muhasa kuhonga ha kunyingika ngwe, kuli yuma yinji yize watamba kwalumuna. Ngwe chilweza, uchinyonga ngwe unatange mukanda wa Tiangu, kapitulu umuwika ha tangwa. Hachino, mutanga hakutwala ku kwehuka katonde, mba mumona ngwe watamba kwalumuna mutapu uze wakutwama ni akwenu. (Tia. 2:1-8) Chino chili chipema! Mba tangwa likwo, mutanga chisoneko chikwo chinahanjika hakutwala ku utowezo wa kukeya ha yize wakuhanjika. (Tia. 3:1-12) Chocho mwiuluka ngwe, tangwa limwe wahanjikile yize te kuyalitele, mba mutesa kupwa ni kuhanjika yuma yalita yize muyitakamisa akwenu. Tangwa likwo lize mulihataho, mutanga ha utowezo wa ponde ya kulikata ni akwa-hashi. (Tia. 4:4-12) Hachino, mumona ngwe watamba kukeya ni yuma yize wakutanga, wakutala ni yize wakupanjika. Mba ha kupalika cha matangwa awana, mumona ngwe kuli yuma yinji yize watamba kwalumuna.
12. Mumu liaka kutwatambile kuhonga muze mututanga Mbimbiliya ni kumona ngwetu, twatamba kwalumuna yimwe? (Tala nawa maliji mushi lia lifwo.)
12 Nyi mumona ngwe, kuli yuma yinji yize watamba kwalumuna, kanda uhonga. Kulinga chino, muchisolola ngwo wakulikehesa, chikwo nawa unazange kwalumuka. Mutu wamwenemwene nawa walikehesa, kakutanga Mbimbiliya ni nyonga lia kuwana haze mahasa kwalumuna.a Kutwatambile kuvulama ngwetu, kuzala “utu waha” chili chuma chize twatamba kulinga mashimbu eswe, mumu yetu eswe tuli ni haze twatamba kwalumuna. (Kolo. 3:10; tala nawa nota ya estudo, “hanaupwisa waha.”) Yika muyikukwasa kupwa mukwakulinga yize Liji lia Zambi liakwamba?
13. Jila yika yipema muhasa kukawilamo yize wakulilongesa? (Tala nawa chizulie.)
13 Shimbu ufupe kwalumuna yuma yeswe ha chisuho chimuwika, eseka kukaula chuma chimuwika hanji yaali ha yize walilongesa. (Yishi. 11:2) Eseka kulinga chino: Linga katalilo wa yikuma yize muhasa kwalumuna. Hanyima, sakula chikuma chimuwika hanji yaali yize muhasa kulihulikila. Yikuma yikwo yize muyisala ha katalilo muhasa kuyikaula hakehe-hakehe. Mba nyi kuli yikuma yinji yize watamba kwalumuna, chikuma chika muhasa kuputuka nacho?
Muze unatange Mbimbiliya, nyi mumona ngwe kuli yimwe yize unafupu kwalumuna, kanda ulinga yeswe ha chisuho chimuwika, muhasa kuputuka ni chize chinafupiwa. Lihulikile ha chikuma chimuwika hanji yaali. (Tala maparagrafu 13-14)
14. Chikuma chika muhasa kuputuka nacho?
14 Muhasa kuputuka ni chikuma chize muchikupwila chashi kwalumuna, hanji chize chinafupiwa ni kawashi. Muze muwana yitanga yize watamba kwalumuna, hengwola mu mikanda yetu. (Índice das Publicações ni Chikwata cha Yela ja Yehova cha Kuhengwola Nacho.) Lemba kuli Yehova hakutwala ku yize hiunatese, mwite ‘akwehe tachi ja kulinga yuma yeswe yize iye akuzanga.’ (Fwili. 2:13) Hanyima, kaula yuma yize walilongesa. Nyi wamanununa chuma chitangu chize watesele, chino muchikukwasa kumanununa yikwo yize yasalako. Muze mumona ngwe wahasa kwalumuna yimwe ni kululieka chimwe cha ku yitanga ya Akwa-Kristu, muzanga kwalumuna yuma yikwo. Chikwo nawa, muchipwa chashi kumanununa yikwo yize watesele.
ECHA LIJI LIA ZAMBI HANGA ‘LIKUKWASE’
15. Mumu liaka tuvumbi twa Yehova alisa ni atu akwo waze no akutanga Mbimbiliya? (1 A-Tesalonika 2:13)
15 Atu amwe kakwamba ngwo, hanatange Mbimbiliya ha yisuho yinji. Alioze, shina o kakufuliela lume ha yize yakwamba? Shina kakukaula yize akulilongesa kulita ni yize Mbimbiliya yakwamba? Kanji-kanji yino kuyishi kulingiwa. Alioze, tuvumbi twa Yehova kalisa. Chizechene ngwe Akwa-Kristu ku sekulu yitangu, yetu twakutayiza Mbimbiliya “ngwe chize yapwa, lie liji lia Zambi.” Chahiana ulemu, twakukaula ku mwono wetu yize twakulilongesa.—Tanga 1 A-Tesalonika 2:13.
16. Yika muyitukwasa kupwa akwa-kulinga yize Liji lia Zambi liakwamba?
16 Hi chashi ko kutanga Liji lia Zambi mashimbu eswe ni kukaula yize twalilongesa. Kapinda umwe mahasa kupwa, kuwana mashimbu hanga tutange hanji lume tukwete chako cha kutanga kafuji-fuji, hachino mutukwata yuma yikehe wika muze tunatange. Chikwo nawa, hanji mutuhasa kulipikala ha kumona yikuma yinji yize twatamba kwalumuna. Kapinda mweswawo uli nenyi, muhasa kumukumba ni ukwaso wa Yehova. Kashika, tayiza ukwaso wa Yehova ha kwehuka kupwa mukwa-kwivwa yoze wakuvulama ni kawashi, alioze mukwa-kulinga yize Liji lia Zambi liakwamba. Chochene, nyi mututanga Mbimbiliya matangwa eswe ni kukaula yize tunatange, mutuyuka chinji.—Tia. 1:25.
MWASO 94 Tunasakwilila Chinji ha Liji lia Zambi
a Tala chinema ha jw.org, Yize Masepa Je Akwamba—Kutanga Mbimbiliya.