Tenga Mbimbiliya Ngwe Katalilo

Kambaji Tiango katesele Mbimbiliya ni katalilo yoze wakutukwasa kumona kanawa chize tuli kumeso. (Tia. 1:22-25) Kuchi mutuhasa kutenga Mbimbiliya ngwe katalilo?

Yitange makoke-makoke. Nyi mutulitala ha katalilo kafuji-fuji, hanji kutuchi kuhasa kumona chuma chipi chize chili kumeso jetu. Chizechene nawa, nyi mututanga Mbimbiliya kafuji-fuji, kutuchi kuhasa kumona yitanga yipi yize tuli nayo ku mbunge ni kusa tachi hanga tuyehuke. Kashika, twatamba kutanga Mbimbiliya makoke-makoke.

Limone yena mwene ha katalilo, kanda umonaho akwenu. Nyi twatalila katalilo mu mbango, mutumona yifwa ya akwetu yize kuyishi kanawa. Chino chakulingiwa nawa muze twakutanga Mbimbiliya ni kunyonga ha yize akwetu mahasa kululieka. Kulinga chino, kuchichi kutukwasa kululieka haze twatamba kululieka.

Pwako ni nyonga lialita. Nyi mutulitala ha katalilo ni kulihulikila wika ha yuma yize kutushi kuzanga, mutuhasa kunenganyana. Muze tunatange Mbimbiliya, twatamba nawa kupwa ni nyonga lialita. Kutwatambile kushimbwila yuma yinji hali yetu ene kuhiana yize Yehova anashimbwila hali yetu.—Tia. 3:17.