MUTWE WA KULILONGESA 20
MWASO 7 Yehova Iye Tachi Jetu
Yehova Makutakamisa
“Akafumane, Tata ya keke, kanda Zambi ya utakamiso.”—2 KORI. 1:3.
YIZE MUTULILONGESA
Mutumona yize mutuhasa kulilongesa ha chize Yehova atakamishine A-Yunda waze atwalile mu undungo ku Babilonia.
1. Kuchi mwono wa A-Yunda wapwile mu Babilonia?
TUCHINYONGENU chize alivwile A-Yunda waze atwalile mu undungo ku Babilonia. Ayo kamwene chize anongesene mbonge yo. Ha miaka yinji, o kahonene kwononokena Yehova, chocho Yehova yecha hanga A-Babilonia aambate ngwe funge. Mwono mu Babilonia kuchi wapwile? (2 Sango 36:15, 16, 20, 21) Tunanyingika ngwetu mu Babilonia, A-Yunda kapwile ni utuswilo wa kulinga yuma yimwe ya tangwa ni tangwa. (Jere. 29:4-7) Chipwe chocho, mwono kuwakapwile washi kuli ayo. Nyi te kapwile ni uhashi wa kusakula, kachi o kakasakwile kutwama mu Babilonia. Kuchi apwile ni kulivwa ha kupalika mu yuma yacho? Umwe wa kuli ayo, yamba ngwenyi: “Ku njiji ja Babilonia twatwamine; ewa, twalilile muze twewulukile Zaione.” (Samu 137:1) A-Yunda jacho te kanafupu lume utakamiso. Mba kulihi te mawana utakamiso wacho?
2-3. (a) Yika Yehova alingile hali A-Yunda waze apwile mu undungo ku Babilonia? (b) Yika mutumona ha mutwe uno?
2 Yehova kali “Zambi ya utakamiso.” (2 Kori. 1:3) Iye kakuzanga tuvumbi twenyi eswe, kashika kanazange kutakamisa waze eswe akukundama kuli iye. Yehova kanyingikine ngwenyi, A-Yunda amwe waze apwile mu undungo ku Babilonia, te matayiza fumbo lienyi ni kuzanga kumuwayila mu jila yalita. (Iza. 59:20) Kashika, hakupalika cha miaka 100 shimbu te kanda achiya mu undungo ku Babilonia, Yehova yatuma Izaia hanga aalweze umwe uprofeto. Uprofeto wacho uli mu mukanda wa Izaia. Mumu liaka Yehova aatuminyine uprofeto wacho? Izaia yasoneka ngwenyi: “Umbijeka atu jami, umbijeka, chocho anambe Zambi yenu.” (Iza. 40:1) Chochene, kupalikila mu uprofeto uno, Yehova yahana utakamiso kuli A-Yunda jacho.
3 Chizechene ngwe A-Yunda jacho, ni yetu ha mashimbu amwe twakufupiwa utakamiso. Ha mutwe uno, mutumonaho majila atatu waze Yehova atakamishinemo A-Yunda: (1) Iye kalakenyene kukonekena waze malikonyeka, (2) kahanyine kutalatala kuli atu jenyi, ni (3) kaakwashile ahone kwivwa woma. Muze mutuhengwola yikuma yino yitatu, tutalenu chize mutuhasa kuyuka ha maliji waze Izaia ambile.
YEHOVA KAKUTUKONEKENA NI KEKE YESWE
4. Kuchi Yehova asolwele ngwenyi kali Zambi ya keke? (Izaia 55:7)
4 Yehova kali “Tata ya keke.” (2 Kori. 1:3) Iye kasolwele chitanga chacho, muze alakenyene kukonekena A-Yunda waze te malikonyeka. (Tanga Izaia 55:7.) Yamba ngwenyi: “Ni zango lia mutolo mungukakuvwila keke.” (Iza. 54:8) Kuchi Yehova aasolwelele keke? Chipwe ngwe A-Yunda kamwene lamba mu Babilonia ha miaka yinji mumu lia yuma yize alingile, nihindu Yehova yaalakenya ngwenyi, kechi kutwamamo ku miaka yeswe. (Iza. 40:2) Maliji wano kota katakamishine A-Yunda waze alikonyekene.
5. Mumu liaka mutuhasa kwamba ngwetu, tuli ni yuma yinji kuhiana A-Yunda yize yakututwala kusakwilila Yehova ha keke yenyi?
5 Yika twalilongesa? Twalilongesa ngwetu, Yehova kakuzanga chinji kukonekena atu jenyi. Musono, kuli yuma yinji yize yakututwala kusakwilila Yehova ha ukonekeno wenyi. Mumu liaka? Mumu tunanyingika kanawa yuma yeswe yize Yehova alingile hanga akonekene shili yetu. Muze te hikwapalika miaka yinji chize haze Yehova atumine Izaia kusoneka uprofeto wacho, iye yatuma Mwanenyi yoze azanga hano hashi, hanga atufwile ni kuhana mwono wenyi ngwe ukuule hali atu eswe waze malikonyeka. Mumu lia chitapo cha ukuule wa Yesu, Yehova mahasa “kujimuna” shili yetu yeswe, hanji ngwetu, kutukonekena liakulu. (Yili. 3:19; Iza. 1:18; Efwe. 1:7) Pundu lume, twakuwayila Yehova, Zambi ya keke!
6. Kuchi kunyonga ha keke ya Yehova chakututakamisa? (Tala nawa chizulie.)
6 Maliji a Yehova waze ali ha Izaia 55:7, mahasa kututakamisa hanga twehuke manyonga akulilamikiza. Anji a kuli yetu, twakununga ni kulilamikiza ha upi uze twalingile chipwe ngwe hitunalikonyeka kulu, chipi-chipi nyi tunamono lamba mumu lia upi wacho. Alioze, nyi hitunalikonyeka ni kwecha kulinga yuma yipi, mutuhasa kupwa ni shindakenyo ngwetu, Yehova hanatukonekena. Chikwo nawa, muze Yehova akutukonekena, iye keshi kwiuluka nawa shili yetu. (Tala nawa Jeremia 31:34.) Kashika, amu Yehova keshi kwiuluka shili yetu, ni yetu kutwatambile kuyiuluka nawa. Yehova kakulihulikila ha yuma yize tunamulingila haliapwila, hi ha shili yize ko twalingile kunyima. (Eze. 33:14-16) Kwasala hakehe, Tata yetu ya keke mahwisa kapinda mweswe yoze wakwiza ku yuma yipi yize twakulinga.
Yehova keshi kulihulikila ha shili yize twalingile kunyima, alioze ha yuma yipema yize tunalingi haliapwila (Tala paragrafu 6)
7. Nyi twalinga shili yinene, yika muyitukwasa mba tufupe ukwaso wa makulwana a mu chikungulwila?
7 Yika twatamba kulinga nyi ngwe tunaleme ku mbunge mumu lia kusweka yimwe shili? Mbimbiliya yakutukolweza hanga tufupe ukwaso wa makulwana a mu chikungulwila. (Tia. 5:14, 15) Alioze, muchihasa kupwa chikalu kwalweza yize twalinga. Chuma muchitukwasa chili kwiuluka ngwo, Yehova hanase malunga wano ashishika hanga atukwase. Chizechene ngwe Yehova, no matusolwela keke. Nyi tweuluka yikuma yino ni kulikonyeka, muchipwa chashi kuhanjika ni makulwana. Tutalenu chilweza cha ndumbu Artur.a Iye te kakulilamikiza mumu lia shili yize alingile, alioze yawana utakamiso ha keke ya Yehova. Yamba ngwenyi: “Chize haze naputukile kutala yizulie ya sonyi (pornografia) te ngunayi ni kukumbanyisa mwaka umuwika. Muze nevwile pande jize jahanjikile ha shimbi ya mbunge, yingulweza mukwetu-pwo yize napwile ni kulinga ni kuyilweza nawa makulwana a mu chikungulwila. Muze nalingile chino, nalivwile kanawa. Chipwe chocho, te nakulema ku mbunge mumu lia yize nalingile. Alioze makulwana kangukwashile kwiuluka ngwo, Yehova kakangwehukile; nguchili ni ulemu. Iye kangufumbile mumu kakunguzanga. Maliji a makulwana kangukwachile ku mbunge ni kungukwasa kumona ngwo, Yehova hanangukonekena.” Musono, Artur kanakalakala ngwe pionelu wa shimbu lieswe, nawa kali kavumbi mu chikungulwila. Chili utakamiso unene kunyingika ngwetu, nyi twalikonyeka Yehova matukonekena.
YEHOVA KAKUTWAHA KUTALATALA
8. (a) Kutalatala chika Yehova ahanyine kuli A-Yunda waze apwile mu undungo ku Babilonia? (b) Kulita ni Izaia 40:29-31, kuchi kutalatala chakwashile A-Yunda waze alikonyekene?
8 Kunyonga lia atu, A-Yunda te kakusoloka ngwe keshi ni kutalatala. Babilonia te kayinyingika ngwe mbonge yize kuyishi kutusula funge jamo, alioze Yehova yahana kutalatala kuli atu jenyi. (Iza. 14:17) Iye kalakenyene kwatusula, kashika te kukushi chuma nichimwe chize muchimukinda. (Iza. 44:26; 55:12) Kuli Yehova, Babilonia yapwile wika ngwe fufuta, yize mahasa kufuza ni mwiku ukehe wika. (Iza. 40:15) Kuchi kutalatala chino chakwashile A-Yunda? Ayo katakamine! Alioze hi kutakama wika ko, te muchaayukisa nawa ha yuma yinji. Izaia kasonekene ngwenyi: “Waze matwaminyina Yehova, kumakaahuzulula tachi jo.” (Tanga Izaia 40:29-31.) Chizechene ngwe pupa unazezuka, kutalatala chakwashile A-Yunda kulivwa ngwe kanahumuka.
9. Yuma yika A-Yunda amwene yize yaakwashile kujikijila ha yilakenyo ya Yehova?
9 Yehova kalingile nawa yuma yikwo yize yakwashile A-Yunda kujikijila ha yilakenyo yenyi. Kuchi achilingile? Tuchinyongenu chize A-Yunda evwile muze amwene kumanunuka cha uprofeto uze te anyingika. Ayo kamwene chize Asuria akumbile wanangana wa minyachi kumi ya Izalele ni kutwala atu mu ufunge. (Iza. 8:4) Kamwene chize A-Babilonia anongesene Yerusaleme ni kutwala atu mu undungo. (Iza. 39:5-7) Ayo nawa kamwene chize mwanangana wa Babilonia apwishile Mwanangana Zedekia kapuputa ni kumutwala mu undungo. (Jere. 39:7; Eze. 12:12, 13) Yuma yino yeswe, yamanunukine ngwe chize Yehova ambile. (Iza. 42:9; 46:10) Kunyonga ha yino yeswe, kota chakolesele ufulielo wa A-Yunda ni kwaha shindakenyo ngwo, yize Yehova aalakenyene te muyimanunuka.
10. Yika muyihasa kutukwasa kukolesa kutalatala chetu ha matangwa wano a kusula?
10 Yika twalilongesa? Twalilongesa ngwetu, muze mutunenganyana, kutalatala muchihasa kututakamisa ni kutwaha tachi. Tuli ha mashimbu akalu chinji, chikwo nawa, twakulimika ni akwa-kole waze akwete ndundo jinji. Alioze kutwatambile kwivwa woma, mumu tuli ni chimwe kutalatala chipema chinji; mwono wa mutolo ni sambukila. Kashika, twatamba kukolesa kutalatala chetu. Mumu nyi kutwachilingile, muchihasa kutepuluka. Kuchi mutuhasa kukolesa kutalatala chetu? Mutuhasa kuchilinga ha kusa mashimbu hanga tunyonge ha chize mwono muukapwa mu paraisu. Mutuhasa kutanga mikanda, kutala yinema ni kwivwa miaso yize yakuhanjika ha kutalatala chetu. Mutuhasa nawa kulemba kuli Yehova ni kumulweza yilakenyo yize tunazange hanga yimanunuke.
11. Yika yakukwasa ndumbu Joy kupwa ni tachi?
11 Tutalenu chize kutalatala chakutakamisa ndumbu Joy, yoze wakupinda chinji ni musongo uze kuushi kuhwa. Iye yamba ngwenyi: “Muze nakulipikala chinji mumu lia musongo wami, nakulemba kuli Yehova ni kumulweza chize ngunalivu. Ngunanyingika ngwami, iye kananyingika chize nakulivwa. Muze akuchilinga, nakwivwa ngwami, Yehova kanangwehe ‘ndundo jahiana.’” (2 Kori. 4:7) Joy kakunyonga nawa ha chize mwono muukapwa mu paraisu, muze ‘niumwe yoze watungako makamba ngwenyi, Ngunayiji.’ (Iza. 33:24) Ni yetu mutuhasa kupwa cheka ni tachi, nyi twazulula mbunge yetu kuli Yehova ni kulihulikila ha kutalatala chetu.
12. Yuma yika yakutukwasa kujikijila ha yilakenyo ya Yehova? (Tala nawa chizulie.)
12 Ngwe chizechene alingile kuli A-Yunda waze apwile mu undungo ku Babilonia, ni yetu Yehova kakutwaha yuma yinji yize yakutukwasa kujikijila ha yilakenyo yenyi. Tuchinyongenu ha uprofeto uze unamanunuka musono. Ngwe chilweza, tunamono umanunuko wa uprofeto wa wanangana wa ndundo ja hashi heswe, uze uli “kanda ukolo kanda ulelu.” (Danie. 2:42, 43) Twakwivwa nawa sango ja ‘minyiko ku yihela yeka ni yeka.’ Twakwambujola sango ja Wanangana ku “mavungu eswe.” (Mateu 24:7, 14) Uprofeto uno ni ukwo nawa, wakukolesa chinji ufulielo wetu muli Yehova ngwo, yilakenyo yenyi yeswe muyikamanunuka. Yehova kakutukwasa kulihumikiza muze tunasakalala.
Uprofeto uze unamanunuka ha mashimbu jetu, unatukwase kujikijila ha yilakenyo ya Yehova (Tala paragrafu 12)
YEHOVA MATUKWASA KULIHUMIKIZA MUZE MUTWIVWA WOMA
13. (a) Yipikalo yika A-Yunda te mapalika shimbu kanda achaatusula? (b) Kulita ni Izaia 41:10-13, kuchi Yehova atakamishine A-Yunda?
13 Yehova kanyingikine ngwenyi, A-Yunda te manunga ni kupalika mu yipikalo hanyima lia kutuhuka mu Babilonia. Yehova kambile ngwenyi, muze te mapwa hakamwihi ni kwatusula mu undungo, umwe mwanangana mukwo wa ndundo te malukukila mavungu waze ajingilika Babilonia ni kwaevwisa woma. (Iza. 41:2-5) Shina A-Yunda te katamba kulipikala? Ha yimwe miaka kunyima, Yehova katakamishine atu jenyi ha kwamba ngwenyi: “Kanda wivwa woma, nguli hamwe ni yena, kanda ulishimwoka, nguli Zambi ye.” (Tanga Izaia 41:10-13.) Yika Yehova azangile kwamba muze ambile ngwenyi: “Nguli Zambi ye”? Iye te keshi kwiulula A-Yunda ngwo katamba kumuwayila, mumu ayo te kanyingika kanawa chikuma chino. Kwamba umwenemwene, Yehova kapwile ni kwiulula A-Yunda ngwenyi, iye te kali sali lio.—Samu 118:6.
14. Yika Yehova alingile hanga akwase A-Yunda ahone kwivwa woma?
14 Yehova kakwashile nawa A-Yunda waze apwile ni woma hanga alihumikize ha kwaeulula ngwo, iye kali ni ndundo ni mana anji. Iye kechile kuli A-Yunda hanga atale mwilu ni kuhengwola tutongonoshi. Yaalweza ngwenyi, kuchizako kutanga tutongonoshi, iye kananyingika majina jo. (Iza. 40:25-28) Nyi Yehova kananyingika jina lia katongonoshi mweswe, pundu lume, kananyingika nawa jina lia kavumbi kenyi mweswe. Chikwo nawa, nyi Yehova kapwile ni ndundo ja kutanga tutongonoshi, pundu lume, kali nawa ni ndundo ja kukwasa atu jenyi. Chochene, A-Yunda jacho te katambile kulipikala hanji kwivwa woma.
15. Kuchi Yehova aluliekele A-Yunda ha yipikalo yize te muyiza kulutwe?
15 Yehova kaliangile nawa kululieka atu jenyi ha yipikalo yize te muyiza kulutwe. Ha chihanda chimwe cha mukanda wa Izaia, Yehova yalweza atu jenyi ngwenyi: “Njilenu mu yipatulo yenu, nukaliajile ni mapito jenu. Swamenu kashimbu ndo ufwatulo hiwapalika.” (Iza. 26:20) Kota maliji jacho kaputukile kumanunuka muze Babilonia ayikumbile kuli Mwanangana Siru. Umwe Ka-Ngregu mukwa-kuhengwola sango ja ku shakulu, kambile ngwenyi: “Muze Siru anjilile mu Babilonia, iye katumine [maswalale jenyi] ashihe atu eswe waze mawana haze lia zuwo.” Achinyonga woma uze evwile atu waze atwamine mu Babilonia! Kota A-Yunda kahashile kulilamwina, mumu lia kwononokena usongwelo wa Yehova.
16. Mumu liaka kutwatambile kwivwa woma wa yuma yize muyikalingiwa ha luyinda munene? (Tala nawa chizulie.)
16 Yika twalilongesa? Twalilongesa ngwetu, kwasala hakehe mutupalika mu luyinda munene yoze kanda achilingiwa kama. Muze luyinda munene maputuka, atu anji makayambashana ni kwivwa woma, alioze tuvumbi twa Yehova kechi kevwa woma. Yetu tunanyingika ngwetu, Yehova kali Zambi yetu. Mutununga ni kujikijila muli iye ni kupwa ni shindakenyo ngwetu, ‘ulamwino wetu unakundama.’ (Luka 21:28) Chipwe muze chizavu cha akwa-mavungu muchikatulukukila, yetu mutukamana nguu, ni kujikijila muli Yehova. Yehova makatuma angelo hanga atufunge ni kutwaha usongwelo uze muukalamwina mwono wetu. Kuchi mutukatambula usongwelo wacho? Twatamba kushimbwila hanga tukalimwene yetu ene. Alioze, kota mutukautambula kupalikila mu yikungulwila. Mu maliji akwo, yikungulwila muyikapwa ngwe ‘yipatulo muze mutukachinyina.’ Kuchi mutuhasa kulilulieka ha yuma yize muyikalingiwa kulutwe? Twatamba kukundama chinji kuli mandumbu jetu aku ufulielo, kwononokena usongwelo uze twakutambula mu ululikiso wa Yehova, ni kufuliela ni mbunge yeswe ngwetu, iye manunga ni kusongwela ululikiso wenyi.—Hepre. 10:24, 25; 13:17.
Kupukuna ha ndundo ja Yehova ni ha uhashi wenyi wa kutulamwina, muchitukwasa hanga tukahone kusakalala chinji ha luyinda munene (Tala paragrafu 16)b
17. Kuchi muhasa kuchinyina kuli Yehova hanga uwane utakamiso?
17 Chipwe ngwe mwono wapwile ukalu chinji kuli A-Yunda mu Babilonia, nihindu Yehova kaehele utakamiso uze afupile. Chino che Yehova makalinga nawa hali yetu. Kashika, chipwe ngwe kulutwe mukulingiwa yuma yeswayo, nihindu nunga ni kuchinyina kuli Yehova hanga uwane utakamiso. Jikijila ha keke yenyi. Kolesa kutalatala che ni kwiuluka ngwe: kuwatambile kwivwa woma wa chuma nichimwe mumu Yehova kali Zambi ye.
MWASO 3 Tachi Jetu, Ufulielo Wetu, Ujikijilo Wetu
a Majina amwe kapwa kwalumuna.
b ULUMBUNWISO WA CHIZULIE: Chizavu chikehe cha mandumbu kanalikungulula mu chimwe chihela. Ayo kali ni shindakenyo ngwo, Yehova kali ni ndundo ni uhashi wa kufunga atu jenyi kweswako atwama.