“Jita ya Mbala ya Yehova”

Ha 1999, nguvulu wa ku França kambile ngwo, Mbetele yatamba kuhana lijimu ha milambu yize mandumbu ahanyine kukatuka ha 1993 ndo 1996. Chocho yitweseka kuhwisa kapinda wacho kupalikila mu yota ya usopeselo mu França, alioze kutwakahashile. Amu kutwakasambile ha usopeso wacho, nguvulu yatambula mbongo kuhiana 4,5 milhões ya euros (ndolar 6,300,000) jize japwile ku banco mu conta ya Mbetele. Kutalatala chetu cha kasula, chapwile ku chota chinene cha ku Europa. Alioze, shimbu te kanda achihengwola chikuma chetu, akwa-chota chacho yatwita hanga tulikungulule ni ngaji a nguvulu ni umwe wa ku chota chinene. Chikuma twalikungulwilile chapwile ngwo, chitangu eswe tulitese mba tutwale chikuma chacho ku chota chinene.

Yetu twanyongene ngwetu, mutu yoze te unamanyinako chota chinene matushinjila hanga tufwete kuli nguvulu wa França chihanda cha mbongo jize atwichile. Alioze, twanyingikine pundu ngwetu, nyi twafweta chipwe lume euro yimuwika, te muchilimika ni shimbi ja mu Mbimbiliya. Mandumbu jetu kahanyine milambu yacho hanga akwase Wanangana wa Zambi, kashika mbongo jacho te hi ja nguvulu wa França ko. (Mateu 22:21) Chipwe chocho, yitutayiza kuliwana hanga tulinge yize atwichile ku chota chinene.

Twalikungulwilile mu chimwe chipatulo chipema cha chota chacho. Ku uputukilo, yuma kuyakendele kanawa. Mukwa-kumanyinako Chota chinene yaputuka kuhanjika ngwenyi, Yela ja Yehova te katamba kufweta chihanda cha lijimu lize etele nguvulu wa ku França. Hazehene yitumuhula ngwetu: “Shina unanyingika ngwe nguvulu wa França hatutambula mbongo mu conta yetu ya banco kuhiana 4,5 milhões ya euro?”

Mukwa-kumanyinako chota chinene, yapihilila ha kwivwa chocho. Muze ngaji a nguvulu atayijile yize o alingile, chocho nyonga lienyi yilialumuka. Iye yaahisa ni kuhwisa usopeso wacho ha ola yizeyene. Yami yingunyingika ngwami, Yehova kalumuna chikuma chacho mu mutapu uze te kutushi ni kunyonga. Yitutuhuka mu chihela chacho ni uwahililo. Chapwile chikalu kutayiza yize yalingiwileko.

Ha 30 ya Junho 2011, chota chinene cha ku Europa chize chakukalila ulite wa atu yichitusambisa. Chiyulo chacho chambile ngwo, lijimu lize atwichile kuliakalitele, chocho yashinjila nguvulu hanga afunyise mbongo jize atambwile. Chikwo nawa, ayo te katamba kutufweta mbongo jikwo helu. Musono, chiyulo chacho chakufunga uwayilo walinanga mu França. Chihula twahulile chize kutwakapwile ni kunyonga, chapwile ngwe liwe lize atondekezele ku mutwe wa Ngoliate. Chihula chacho, chalumwine jita yize twapwile ni kwasa mu chota cha usopeselo. Mba mumu liaka twakumbile? Twakumbile, mumu ngwe chizechene Ndawichi alwezele Ngoliate, “jita ya mbala ya Yehova.”—1 Samue. 17:45-47.

Alioze chino hi chisuho chitangu ko chize twakumbile mu chota cha usopeselo. Chipwe ngwe musono kakutuhungumiona kuli akwa-mafwefwe ni akwa-mayingeleja, nihindu yota yinene-yinene ya mu yifuchi 70, ni yota yikwo yatala yuma hashi heswe, hiyinasambisa Yela ja Yehova ha milonga 1,225. Kukumba chino, chakutukwasa kufunga ulite wetu wa kuwayila Yehova, kwambujola, kwehuka kuya ha yiwanyino ya kulemesa yifuchi ni kwehuka kuhana hanji kutambula manyinga.

Mba mumu liaka nayile ku Europa ni kukwasa chikuma cha usopelo, se yami te nakukalakala ku Chishina chinene cha Yela ja Yehova ku Nova York, Estados Unidos?

YISEMI JAMI TE KAKUZANGA CHINJI UMWENEMWENE

Yisemi jami, George ni Lucille, kayile ku shikola ya Ngileate mu kalasa 12, chocho yaya ni kukalakala ku Etiópia, kwe kuze nasemukinyine ha 1956. Ayo yanguluka jina lia Philip mumu lia Fwilipe, mukwa-kwambujola wa ku sekulu yitangu. (Yili. 21:8) Ha mwaka wakawileko, nguvulu yakanjisa mulimo wa Yela ja Yehova. Chipwe ngwe napwile kanuke, nihindu nguneuluka kanawa chize yisemi jami apwile ni kulinga yuma ya ku ufulielo mu usweke. Kuli umwe kanuke, kumona yuma yacho chapwile chipema! Chaluyinda, ha mwaka 1960 yatuhuma mu chifuchi.

Muze usoko wetu walukilile ku Wichita, mu Kansas, Estados Unidos, yisemi jami nihindu yanunga ni spiritu ya mishionaliu. Katusemene tuli atatu, yami, ndumbwami wa pwo wa mukulwana Judy ni mwanakwetu Leslie. Yetu eswe atatu twasemukine ku Etiópia. Yisemi jetu te kakutwama kulita ni umwenemwene, chocho yatulongesa kuzanga Yehova ni kumulingila ni mbunge yeswe. Kangupapachishile muze napwile ni miaka 13. Ha kupalika cha miaka 3, usoko wetu yiwalukila ku Arequipa, mu Peru, hanga akwase kuze te kunafupiwa ukwaso.

Ha 1974, muze napwile wika ni miaka 18, Mbetele ya ku Peru yiyingutongola hamwe ni mandumbu akwo awana, hanga tupwe mapionelu alipwila.Yituya ni kwambujola ku chimwe chihela cha Mikinda ku Andes, kuze te kanda achambujolako. Njiza yetu te yinachingi yihunda ya Quéchua ni Aimará. Te twakulingila wenyi mu mashinyi waze te twakuvuluka ngwo, “Ulungu,” mumu kapwile ni kusoloka ngwe ulungu. Nguneuluka ngwami, te nakusolwela atu yilakenyo ya mu Mbimbiliya ni kwalweza ngwo, kwasala hakehe Yehova mahwisa uswale, misongo ni kufwa. (Uso. 21:3, 4) Anji a kuli atu jacho yapwa Yela ja Yehova.

YANGUSANYIKA KU CHISHINA CHINENE

Ha 1977, muze ndumbu Albert Schroeder wa mu Chizavu cha Tusongo cha Yela ja Yehova te anameneka Peru, yangukolweza hanga ngusoneke petisau ya kuya ni kukalakala ku Chishina chinene. Yino ye nalingile lume. Ha kupalika cha mashimbu akehe, ha 17 ya Junho 1977, yinguputuka kukalakala ku Mbetele ya Brooklyn. Nakalakalile ha miaka yiwana ku chipatulo cha kukomba-komba ni cha kululieka yuma.

Ha Junho 1978, yingunyingika Elizabeth Avallone, ha chimwe kukunguluka cha hashi heswe mu Nova Orleans, ku Louisiana. Chizechene ngwe yami, neye kamulelele kuli yisemi waze te akuzanga chinji Yehova. Elizabeth te kanakalakala ngwe pionelu wa shimbu lieswe ha miaka yiwana, iye kazangile kulingila Yehova mu mulimo wa shimbu lieswe ku mwono wenyi weswe. Chocho yituputuka kulinyingika, mba yitulizanga. Ha 20 ya Outubro 1979, yitulimbata ni kukalakala hamuwika ku Mbetele.

Mandumbu amu chikungulwila chetu chitangu cha Espanhola Brooklyn, katutambwile kanawa. Hakupalika cha miaka, yitukalakala mu yikungulwila yikwo yitatu, nemo mandumbu katutambwile kanawa ni kukwasa mulimo wetu wa ku Mbetele. Twakusakwilila chinji mandumbu wano, masepa ni asoko jetu, ha chize atukwashile kufunga yisemi jetu waze te hapwa tushinakaji.

KUKALILA ULITE WETU KU YOTA YA USOPESELO

Ha 1982, nakomokene chinji ha kutambula chiteli cha kukalakala mu chipatulo cha Jurídico ku Mbetele. Ha kupalika cha miaka yitatu, mandumbu yazanga kunyingika nyi munguzanga kuya ku shikola yinene hanga ngupwe ngaji. Muze te ngunalilongesa, nawahililile chinji ha kunyingika ngwami, shimbi jize akukaula atu mu Estados Unidos ni mu yifuchi yikwo, jinakatuka ha kukumba cha Yela ja Yehova mu yota ya usopeselo. Kukumba chacho, che te twakulilongesa chinji mu kalasa.

Ha 1986, muze napwile ni miaka 30, yangutongola ngupwe kalayi wa mu chipatulo cha Jurídico. Chino chapwile chiwape chinene kuli yami, mumu chipwe ngwe te nguchili mukweze, namwene ngwami, mandumbu ku Mbetele te kakungujikijila. Chipwe chocho, ni yami namwene ulemu wa chiteli chacho mumu te hi chashi ko, nawa te kanda nguchinyingika yuma yinji.

Napwile ngaji (advogado) ha 1988. Alioze, ponde yapwile ngwo, chakanyingikine chize shikola yinene yakwachile hali yami ni ha usepa wami ni Yehova. Shikola yinene muyihasa kutwala mutu apwe ni manyonga akufupa lufuma ni kutwala akwo amumone ngwe kali mulemu chinji mumu lia chinyingi chize akwete. Elizabeth mwe wangulamwinyine. Iye mwe wangukwashile kufunyina yuma yize napwile ni kulinga shimbu te kanda nguchiya ku shikola yinene, hanga ngukolese cheka usepa wami ni Yehova. Kwapalikile mashimbu mba ngupwe cheka ni usepa upema ni Yehova. Kulita ni yize napalika ku mwono wami munguhasa kwamba ngwami, kupwa ni yinyingi yinji hi chuma chilemu ko ku mwono. Yize yakusolola ulemu wa mwono yili kupwa ni usepa ukolo ni Yehova ni kuzanga chinji mandumbu jetu.

KUKALILA NI KUKOLESA SANGO JIPEMA KULITA NI SHIMBI

Muze nahwishile shikola yinene, yingulihulikila ha kukwasa yuma ya usopeselo ku Mbetele ni kukalila sango jipema ku yota ya usopeselo. Mulimo wami te upema, alioze wapwile nawa ni kapinda, mumu yuma mu ululikiso te yinayi ni kwalumuka kawashi-washi. Ngwe chilweza, kunyima te tukwete chako cha kwita milambu muze mutuhana mikanda kuli atu. Alioze mu miaka 1990, mandumbu yeta usongwelo ku chipatulo cha Jurídico hanga tumone nyi mutuhasa kwecha kwita milambu. Kukatuka haze, Yela ja Yehova yaputuka kuhana mikanda chakuhona kwita falanga. Chino chakwashile kwashiwisa mulimo ku Mbetele ni mu munda. Ndo musono, kwalumuka chacho chakufunga mulimo wetu ku kapinda yoze wakwiza ku lijimu. Amwe kanyongene ngwo, kwalumuka chacho te muchitutepulula mbongo ni kupihisa mulimo wetu wa kwambujola. Alioze yino kuyakalingiwile. Kukatuka ha 1990, Yela ja Yehova yoka chinji kuhiana. Musono atu mahasa kupwa ni kulia chinji cha ku ufulielo chakuhona kufweta nichimwe. Nalilongesele ngwami, kwalumuka chize twakupwa nacho mu ululikiso, chakulingiwa mumu lia ukwaso wa Yehova ni usongwelo uze twakutambula kuli ndungo washishika.—Kutuhu. 15:2; Mateu 24:45.

Yetu kutushi kukumba mu yota ya usopeselo mumu lia kupwa ni ngaji apema. Ha yisuho yimwe, yize yakutwala manguvulu azange kutukwasa yili yitanga yetu yipema. Ngwe chilweza, ha 1998, mandumbu atatu amu Chizavu cha Tusongo ni mapwo jo kayile ha kukunguluka chalipwila mu Cuba. Ayo kasolwele vumbi ni umbovu kuli atu eswe. Chilweza cho chapwile chilemu chinji kuhiana yisuho yeswe yize twaliwanyine ni akwa-nguvulu hanga twasolwele ngwo, yetu kutushi kulinjisa mu yuma ya mafwefwe.

Alioze, muze kutushi kuhasa kuhwisa kapinda mu jila yalita, twakusa tachi hanga tukalile ni kukolesa sango jipema ku yota ya usopeselo. (Fwili. 1:7) Ngwe chilweza, ha miaka yinji, manguvulu a mu Europa ni Coreia do Sul, te keshi kutayiza ulite wetu wa kulituna mulimo wa uswalale. Mumu lia chino, mandumbu 18,000 mu Europa ni akwo kuhiana 19,000 mu Coreia do Sul, yaasa mu mazuwo a ususu, mumu lia kuhona kupwa maswalale hamukunda wa shimbi yo ya mbunge.

Alioze, ha 7 ya Julho 2011, Chota Chinene cha mu Europa yichikwata chiyulo chalipwila ha chikuma cha Bayatyan ni Armênia. Chota yichikwata chiyulo ngwo, mu yifuchi yeswe ya mu Europa, mwatamba kupwa milimo yize kuyatalile ha uswalale. Chiyulo cha mutapu au, kachikwachile nawa ku chota chinene cha mu Coreia do Sul ha 28 ya Junho 2018. Kukumba chino twachihashile mumu lia mandumbu jetu akweze waze alitunyine kulinjisa mu yuma ya mafwefwe.

Chipatulo cha jurídico ku Chishina chinene ni yikwo ya ku Mambetele a hashi heswe, yinase tachi yinji hanga yikalile ulite wetu wa kuwayila Yehova ni wa kwambujola sango jipema. Chili chiwape chinene kuli yami, kumanyinako mandumbu jetu a malunga ni a mapwo waze akuhungumiona kuli manguvulu. Chipwe muze kutushi kukumba ha yisuho yimwe, nihindu twakuhana uchela upema kuli manguvulu, kuli mianangana ni ku mavungu eswe. (Mateu 10:18) Akwa-shimbi, akwa-kumanyinako manguvulu, akwa-sango hamwe ni atu akwo, kakumona yisoneko yize twakusa ha mikanda yize twakutuma ku yota, ni kwivwa chize twakuyitongola muze tunahanjika no. Atu anji a mbunge yipema, kakunyingika Yela ja Yehova ni haze hakukatuka ufulielo wo. Amwe a kuli ayo hanapu mandumbu jetu.

TWASAKWILA CHINJI YEHOVA!

Ha miaka 40 yapalika, napwa ni chiwape chakukalakala ni Mambetele eswe a hashi ha yuma ya usopeselo ni kuyaya ku yota yinene-yinene ni kuli atu a lufuma. Nakuzanga ni kukomoka chinji mandumbu waze nakukalakala no ku chipatulo cha Jurídico, ku chishina chinene ni mu yipatulo yikwo ya Jurídico ya hashi heswe. Nakulivwa kanawa, mumu nazuka yiwape yinji ku mwono wami.

Elizabeth kali chikwashi washishika nawa wa zango yoze wakungukwasa ha mashimbu apema ni api ha miaka 45. Nakumukomoka, mumu iye kakungukwasa chipwe ngwe kali ni musongo uze wakumuhongesa chinji.

Ku mwono wetu, twalilongesa ngwetu, tachi jize tukwete ni kukumba chize twakuzuka, kuyishi kukatuka ku utotombo wetu. Ngwe chizechene Ndawichi ambile, “Yehova iye tachi ja atu jenyi.” (Samu 28:8) Chochene, “jita ya mbala ya Yehova.”