Shina Yuma Yize Waliangile Kulilongesa Yinakukwase Ndo Musono?

1. Kuchi yuma yize twalilongesele ku uputukilo yalumwine mwono wetu?

YUMA yize twalilongesele muze twaputukile kulilongesa Mbimbiliya, yalumwine mwono wetu. Ngwe chilweza, muze twalilongesele ngwetu, jina lia Zambi Yehova, yituputuka kukundama kuli iye. (Iza. 42:8) Hanyima lia kulilongesa yize yakulingiwa kuli mutu nyi hafwa, yitwecha kulihula nawa nyi asoko jetu waze hanafu kanamono lamba. (Chilu. 9:10) Muze twanyingikine ngwetu, hashi muhakapwa Paraisu, yichitukwasa hanga tuhone kulipikala hakutwala ku mwono wetu wa kulutwe lia matangwa. Twapwile nawa ni shindakenyo ngwetu, kutuchi katwama wika miaka 70 hanji 80, alioze ku miaka yeswe.—Samu 37:29; 90:10.

2. Kuchi 2 Petulu 1:12, 13 unasolola ngwo, chipwe Akwa-Kristu waze ajama ku ufulielo mahasa kuyuka ha yize alilongesele ku uputukilo?

² Yetu twakununga ni kuwana malongeso ha yuma yize twalilongesele ku uputukilo. Ha mukanda wenyi wamuchiali, postolo Petulu yasonekena Akwa-Kristu waze te ‘hajama mu umwenemwene.’ (Tanga 2 Petulu 1:12, 13.) Alioze ha mashimbu jacho, mu chikungulwila mwapwile atu api waze te akufupa kupiangula mandumbu mu uwayilo wamwenemwene. (2 Petu. 2:1-3) Petulu kazangile kutakamisa mandumbu jenyi ni kwakwasa hanga anyongonone mu kapinda wacho. Chocho, iye yaeulula yuma yize te hanalilongesa kulu. Yuma yacho, te muyaakwasa hanga anunge ni kushishika kuli Yehova ndo kusongo.

3. Chilweza chika chinasolola ngwo chipwe Akwa-Kristu waze ajama no mahasa kuyuka ha yuma yize twalilongesele ku uputukilo?

³ Chipwe ngwe twakuwayila Yehova ha miaka yinji, nihindu mutuhasa kuyuka ha yuma yize twalilongesele ku uputukilo. Tunyongenu ha chilweza chino: umwe mama ni mwanenyi wa pwo yoze machililongesa kuteleka, mahasa kuteleka chimwe kulia ni kusako milungo yimuwika. Alioze, amu mama waputukile kulu kuteleka nawa kali ni yinyingi yinji, mahasa kuteleka kulia ni milungo yoyene chize muchilisa ni cha mwanenyi. Chizechene nawa, mandumbu waze akulingila Yehova ha miaka yinji ni alongi aha a Mbimbiliya, eswe kananyingika malongeso atangu a mu Liji lia Zambi. Alioze, o mahasa kuwana yikuma yalisa ha malongeso jacho. Chize haze atupapachishile, kota mwono wetu ni yiteli yetu mu ululikiso wa Yehova yalumuka ha yisuho yinji. Alioze muze twakupukuna ha umwenemwene uze twalilongesele ku uputukilo, twakuwana majila aha akukawilamo umwenemwene wacho ku mwono wetu. Tutalenu malongeso atatu waze twaliangile kulilongesa mu Mbimbiliya, ni yize Akwa-Kristu waze ajama ku ufulielo mahasa kulilongesaho.

YEHOVA KALI SAKATANGA

4. Kuchi kunyingika ngwo Yehova kali Sakatanga chakwachile ku mwono wetu?

⁴ Tunanyingika ngwetu hashi ni yuma yeswe yize yiliho, kayitangile kuli umwe Sakatanga wa mana yoze ukwete ndundo. Mbimbiliya yakwamba ngwo: “Zambi mwe watangile yuma yeswe.” (Hepre. 3:4) Alioze, mutuhasa kulilongesa yuma yinji ha umwenemwene uno uze hitunanyingika kulu. Amu atutangile, Yehova kananyingika yuma yinji ku mwono wetu. Iye kakulihulumba hali yetu, nawa kananyingika yize yatupemena. Kashika kunyingika ngwo, Yehova kali Sakatanga wetu, chatukwashile kwalumuna mwono wetu ni kunyingika ulemu wa mwono.

5. Umwenemwene uka wa mu Mbimbiliya uze wakutukwasa kupwa akwa-kulikehesa? (Izaia 45:9-12)

⁵ Kunyingika ngwo Yehova mwe Sakatanga, chakutukwasa kupwa akwa-kulikehesa. Ngwe chilweza, ha mashimbu amwe, Yombi kalihulikilile chinji hali mwene ni hali akwo. Mba amukwase, Yehova yeulula Yombi ngwenyi, Iye kali Sakatanga wa ndundo jeswe. (Yombi 38:1-4) Muze amwiulwile chikuma chino, Yombi yanyingika ngwenyi, yuma yeswe yize Yehova akulinga yalita. Kulita ni maliji jacho, profeta Izaia yasoneka ngwenyi: “Te uma muwamba kuli mukwa kuwumba ngwenyi, Yika unatenge?”—Tanga Izaia 45:9-12.

6. Ha mashimbu aka chakupwa chilemu kupukuna ha mana ni ha ndundo ja Sakatanga wetu? (Tala nawa yizulie.)

⁶ Muze Mukwa-Kristu anayi ni kujama ku ufulielo, iye mahasa kuputuka kujikijila chinji ha manyonga jenyi, kuhiana kufupa usongwelo wa Yehova ni wa mu Mbimbiliya. (Yombi 37:23, 24) Nyi chino muchilingiwa, chili chilemu Mukwa-Kristu kumana ni kupukuna ha mana ni ha ndundo jahiana ja Sakatanga wetu. (Iza. 40:22; 55:8, 9) Hachino, umwenemwene uze aliangile kulilongesa, muumukwasa anunge ni kulikehesa ni kutayiza ngwenyi, manyonga a Yehova kali alemu chinji kuhiana manyonga jenyi.

7. Yika ndumbu Rahela alingile mba atayize usongwelo waha?

⁷ Kwiuluka ngwo Yehova kali Sakatanga, chakwashile ndumbu Rahela, yoze watwama ku Eslovênia, kutayiza chimwe kwalumuka chize chalingiwile mu ululikiso wetu. Yamba ngwenyi: “Ha mashimbu amwe, chakungukalila kutayiza yiyulo yize akukwata kuli mandumbu waze akutusongwela. Ngwe chilweza, natalile Sango Jaha Kukatuka ku Chizavu Cha Tusongo ja 2023 #8 jize jambile ngwo, mandumbu mahasa kufunga wevu. Chipwe chocho, napinjile muze namwene ha chisuho chitangu, ndumbu uli ni wevu malinga pande. Chocho yingulemba kuli Yehova ni kumwita angukwase hanga ngutayize kwalumuka chacho.” Ndumbu Rahela yanyingika ngwenyi, amu Yehova ali Sakatanga wa malilu ni hashi, iye kali ni uhashi wa kusongwela ululikiso wenyi mu jila yalita. Shina ni yena chakukukalila kutayiza usongwelo waha? Nyi chenacho, chuma chilemu kulinga chili kupwa mukwa-kulikehesa ni kusa mashimbu hanga upukune ha mana ni ha ndundo ja Sakatanga wetu.—Roma 11:33-36.

HI ZAMBI KO WAKUTUMWESA LAMBA

8. Kuchi kunyingika ngwo, hi Yehova ko wakutumwesa lamba chakutuyukisa?

⁸ Mumu liaka Zambi akwecha atu hanga amone lamba? Mumu lia kuhona kunyingika kumbululo lia chihula chino, atu anji kakuvwila Zambi uli ni kwamba ngwo, katwamineko. (Yishi. 19:3) Alioze, yena walilongesele ngwe shili yize twahingile ye yakutunehena lamba, hi Yehova ko. Walilongesele nawa ngwe, kulihumikiza cha Yehova chinakwase atu anji kumunyingika ni kunyingika chize makahwisa lamba lieswe. (2 Petu. 3:9, 15) Umwenemwene uno, wakukolesa ni kutakamisa usepa we ni Yehova.

9. Ha yuma yika chili chilemu kwiuluka ngwo hi Yehova ko wakutunehena lamba?

⁹ Tunanyingika ngwetu, twatamba kulihumikiza ni kushimbwila muli Yehova hanga ahwise lamba. Alioze, nyi mutupalika mu kapinda hanji atu waze twazanga mamona lamba, matulinga yuma yipi hanji mutufwisa mutu yoze twazanga, mutuhasa kuputuka kunyonga ngwetu, Yehova kanashimbula kuhwisa lamba. (Haba. 1:2, 3) Ha yikuma ngwe yino, muchilita kwiuluka yize yakutwala Yehova mba eche atu apema apalike mu kapinda wacho.a (Samu 34:19) Mutuhasa nawa kupukuna ha upale wa Yehova hakutwala ku chize makahwisa lamba lieswe.

10. Yika yakwashile ndumbu Anne kunyongonona muze afwishile naye?

¹⁰ Kunyingika mumu liaka Zambi akwecha atu hanga amone lamba, muchihasa kutukwasa kunyongonona. Ndumbu Anne, yoze watwama ku tungu lia Mayotte, ku Kalunga-lwiji Índico, kanambe ngwenyi: “Ha yimwe miaka kunyima nafwishile mama, chino changunehenene yikola yinji ku mbunge. Alioze nakusa tachi hanga ngwiuluke ngwami, hi Yehova ko wakutunehena lamba. Iye kanazange chinji kuhwisa lamba lieswe ni kuhindwisa ku ufwe atu waze te twazanga. Kupukuna ha umwenemwene uno, chakungukwasa kupwa ni sambukila yize chishi kuhasa kulumbununa.”

11. Kuchi kunyingika mumu liaka Yehova akwecha atu amone lamba chakutukwasa tununge ni kwambujola?

¹¹ Kunyingika mumu liaka Yehova akwecha atu amone lamba, muchihasa kutukwasa hanga tununge ni kulihana chinji mu mulimo wa kwambujola. Postolo Petulu kalumbunwine ngwenyi, Yehova kakulihumikiza mumu kanazange hanga atu alikonyeke ni kwalamwina. Yasoneka ngwenyi: “Nyongenu ha mutapu wa atu waze nwatamba kupwa. Nwatamba kupwa atu a yitanga yisandu, ni kulinga milimo yize yinasolola ngwo nwakuwayila Zambi.” (2 Petu. 3:11) Mulimo wetu wa kwambujola, uli umwe wa ku ‘chitanga chize chakusolola ngwo twakuwayila Zambi.’ Chizechene ngwe Tata yetu Yehova, ni yetu twakuzanga atu. Tunazange hanga akatwame ni mwono mu chifuchi chaha. Ni kulihumikiza cheswe, Yehova kanahane kuli atu a mu njiza yetu uhashi wa kumuwayila. Kashika shimbu songo kanda lichiza, yena uli ni uhashi wa kukalakala hamuwika ni Zambi hanga ukwase atu anji amunyingike.—1 Kori. 3:9.

TULI “HA MATANGWA AKUSULA”

12. Kunyingika ngwo tuli “ha matangwa akusula” chakutukwasa ha yika?

¹² Mbimbiliya yakulumbununa mu yimako-yimako, yitanga yize te atu mapwa nayo “ha matangwa akusula.” (2 Timo. 3:1-5) Muze twakumona chize yitanga ya atu waze twatunga no yinayi ni kupihia, twakupwa ni shindakenyo ngwetu, uprofeto uno unamanunuka. Kunyingika umwenemwene uno, chakutukwasa kujikijila ha Liji lia Zambi.—2 Timo. 3:13-15.

13. Kuchi chishima cha Yesu chili ha Luka 12:15-21, muchihasa kutukwasa?

¹³ Kunyingika ngwo tuli ha matangwa akusula, chakutukwasa nawa kulihulikila ha yuma yahiana ulemu. Ha Luka 12:15-21, Yesu katele chishima chize chakutukwasa kunyingika yuma yize yahiana ulemu. (Tanga.) Mumu liaka lunga wacho amuvulukile ngwo “chihepuke”? Kamuvulukile chocho, hi mumu liakupwa ko ni yuma yinji, alioze mumu kasele yuma yize kuyalitele ha chihela chitangu ku mwono wenyi. Iye ‘kalikungilile upite, alioze kakapwile pichi kumeso ja Zambi.’ Mumu liaka kulinga chino chapwile upi unene? Mumu Zambi kalwezele lunga wacho ngwenyi: “Ufuku uno makutambula mwono we, iya mba masala ni yuma yize unakunga?” Yika chishima chino chinatulongesa? Chinatulongesa ngwo, mashimbu akehe asalako a kunongesa chifuchi chino chipi. Kashika, twatamba kulihula ngwetu: ‘Yuma yize ngunatese kulinga ku mwono wami, shina yakusolola ngwo, nakusa yuma yahiana ulemu ha chihela chitangu? Yika nakukolweza ana jami hanga atese kulinga ku mwono wo? Shina nakusa tachi ni kukalakalisa mashimbu ni yikumba yami hanga ngulikungile upite? Nyi nakuchilinga hanga ngutulike upite mu malilu?’

14. Ngwe chize twamona ha chilweza cha Miki, mumu liaka chili chilemu kwiuluka ngwo tuli ha matangwa akusula?

¹⁴ Nyi twapukuna ha yuma yize yakusolola ngwo, tuli ha matangwa akusula, mutuhasa kwalumuna mutapu uze twakutwama ku mwono wetu. Yino ye yalingiwile kuli ndumbu Miki. Yamba ngwenyi: “Muze nahwishile shikola, nazangile chinji kulinga mulimo wa kunyingika mwono wa tushitu. Nazangile nawa kupwa pionelu wa shimbu lieswe ni kuya kuze te kunafupiwa ukwaso wa akwa-kwambujola. Alioze masepa jami waze te ajama ku ufulielo, yangukwasa ngumone nyi munguhasa lume kulinga mulimo wacho, aku nawa ngunalingi yuma ya ku ufulielo. Ayo yangwiulula ngwo, songo lia hano hashi linakundama, nawa ngwo, mu chifuchi chaha mungukapwa ni mashimbu anji a kulilongesa yuma yeswayo munguzanga. Chocho yingukwata chiyulo cha kulilongesa milimo yize te kuyichi kungumbata mashimbu anji. Ha kulinga chino, yinguhasa kununga mu mulimo wa pionelu, mba kulutwe yingwalukila ku Equador, kuze te kunafupiwa ukwaso.” Musono, Miki ni mukwo-lunga, kanalingi mulimo wa kumeneka yikungulwila mu chifuchi chacho.

15. Kuchi chilweza cha Tiangu chinasolola ngwo, kutwatambile kulitwamina kwambujola kuli atu waze keshi kutayiza sango jipema? (Tala nawa yizulie.)

¹⁵ Kwiuluka ngwo tuli ha matangwa akusula, chakutukwasa kulihana chinji mu mulimo wa kwambujola chipwe ngwe atu waze mutwambulwila malituna sango jipema. Umwenemwene uli ngwo, atu mahasa kwalumuka. Tutalenu chilweza cha Tiangu, mwanakwo ya Yesu. Iye kamwene chize Yesu akolele ni kupwa Mesaya, nawa longeshi mupema. Alioze, kwapalikile miaka yinji, mba Tiangu apwe kambaji ka Yesu. Iye kachilingile wika hanyima lia uhindukilo wa Yesu, chocho yalihana chinji mu mulimo wa kwambujola.b (Yoa. 7:5; Ngala. 2:9) Kashika, kanda tulitwamina kwambulwila asoko ni atu a mu njiza yetu waze keshi kutayiza sango jipema. Twiulukenu ngwetu tuli ha matangwa akusula, kashika twatamba kusa mulimo wa kwambujola ha chihela chitangu ku mwono wetu. Nyi twachilinga, hakupalika cha mashimbu, atu mahasa kunyonga ha yize twalwezele ni kuyikaula ku mwono wo. Yino hanji muyikalingiwa chipwe ha mashimbu a luyinda munene.c

NUNGA NI KULEMESA MALONGESO A YEHOVA

16. Kuchi wayukile ha malongeso a Yehova? (Tala nawa mushete, “Kwasa Akwenu Kupalikila mu Umwenemwene wa mu Mbimbiliya.”)

¹⁶ Kulia chimwe cha ku ufulielo chize twakutambula, kakuchiluliekela atu waze kanyingikine yuma yinji hakutwala ku Mbimbiliya. Ngwe chilweza, pande ja mbunga jize twakwivwa ku songo lia poso, Kaposhi wa Kutalila wa mbunga, yinema yize yili mu jw.org ni yikuma yikwo, kanji-kanji kakuyilingila atu waze hi Yela ja Yehova ko. Chipwe chocho, ni yetu twakuyuka ha malongeso jacho. Kakutukwasa kuzanga chinji Yehova, kukolesa ufulielo wetu hakutwala ku Mbimbiliya ni kupwa alongeshi apema.—Samu 19:7.

17. Ha yikuma yika twatamba kupukuna ha malongeso atangu a mu Mbimbiliya?

¹⁷ Yetu Yela ja Yehova, twakuwahilila chinji muze twakutambula ulumbunwiso waha hakutwala ku umwenemwene wa mu Mbimbiliya. Twakulemesa nawa malongeso atangu waze atunehene mu umwenemwene. Nyi tukwete chako cha kulikwachilila ha manyonga jetu shimbu tukaule usongwelo wa mu ululikiso, twatamba kupwa akwa-kulikehesa ni kwiuluka ngwetu, Yehova Sakatanga wetu wa mana nawa mukwa-ndundo-jeswe, mwe unasongwela ululikiso wenyi. Nyi yetu hanji mutu yoze twazanga mapalika mu kapinda, muchipema kulihumikiza ni kunyonga mumu liaka Yehova echa kapinda wacho. Chikwo nawa, muze mutusakula chize mutukalakala ni yikumba ni mashimbu jetu, twatamba kusa yuma yahiana ulemu ha chihela chitangu ni kwiuluka ngwetu, tuli ha matangwa akusula. Nyi twachilinga, malongeso a Yehova manunga ni kutukolweza, kututakamisa ni kutukwasa hanga tupwe ni mana.