Chize Yehova Akutukwasa Kunyongonona

1. Mumu liaka twatamba kunyongonona, nawa ukwaso uka tukwete? (1 Petulu 5:10)

MWONO ha matangwa wano a kusula unakale chinji, kashika yetu eswe twatamba kunyongonona. Atu amwe kanapinji ni misongo yize kuyishi kuhwa. Akwo, kananenganyana mumu lia kufwisa mutu yoze azanga. Eka, kanapalika mu yihungumiona kukatuka kuli asoko jo hanji kuli nguvulu. (Mateu 10:18, 36, 37) Muhasa kupwa ni shindakenyo ngwe, chipwe ngwe mupalika mu yipikalo yeswayo ku mwono we, Yehova makwaha tachi jize unafupu hanga unyongonone ndo ku songo.—Tanga 1 Petulu 5:10.

2. Yika yakutukwasa kunyongonona?

² Kunyongonona chinalumbunuka kununga ni kushishika kuli Yehova, ni kumuwayila ni chiseke chipwe muze mutupalika mu yipikalo, muze matuhungumiona hanji kutweseka hanga tulinge shili. Uhashi tuli nawo wa kunyongonona, kuushi kwiza ku tachi ja yetu ene, alioze wakwiza ku ukwaso wa Yehova yoze wakutwaha “ndundo jahiana.” (2 Kori. 4:7) Ha mutwe uno, mutumonaho majila awana a chize Yehova akutukwasa kunyongonona. Mutumona nawa chize mutuhasa kuyuka ha majila jacho.

KULEMBA

3. Mumu liaka mutuhasa kwamba ngwetu, kulemba chili chimwe chikomokeso cha kuli Yehova?

³ Yehova kalingile chimwe chuma cha kukomwesa hanga atukwase kunyongonona. Chipwe ngwe twakuvulumuna, nihindu iye yapwisa chashi hanga tuhanjike nenyi mu yilemba ni kutupanjika. (Hepre. 4:16) Tunyongenu ha chino: Mutuhasa kulemba kuli Yehova ha shimbu lieswalio ni ha chikuma cheswacho mutuzanga. Mutuhasa nawa kuhanjika nenyi mu limi lieswalio ni ku chihela cheswacho tuli, chipwe ngwe tuli kwa ukawetu hanji mu zuwo lia ususu. (Yona 2:1, 2; Yili. 16:25, 26) Nyi tunasakalala chinji, hanji tunahongo chakuhona kunyingika yize mutuhanjika, nihindu Yehova kakunyingika yize tunazange kumulweza. (Roma 8:26, 27) Chochene, kulemba chili yimwe jila ya kukomwesa yize twakuhanjikilamo ni Yehova.

4. Shindakenyo yika tuli nayo ngwetu muze twakulemba kuli Yehova atukwase kunyongonona iye kakuchilinga?

⁴ Mu Mbimbiliya, Yehova kanatulweze ngwenyi, “yeswayo mutumwita kulita ni upale wenyi, iye matwivwa.” (1 Yoa. 5:14) Shina mutuhasa kulemba kuli Yehova ni kumwita hanga atukwase kunyongonona? Ewa mutuhasa! Chino chinalite ni upale wenyi. Kuchi tunachinyingika? Tunachinyingika mumu muze twakunyongonona mu yeseko, twakukwasa Yehova hanga ahane kumbululo kuli yoze wakumuchoka, Satana Ndiapu. (Yishi. 27:11) Chikwo nawa, Mbimbiliya yakwamba ngwo, Yehova kanazange chinji ‘kusolola tachi jenyi kuli waze ali ni mbunge yingunu kuli iye.’ (2 Sango 16:9) Kashika, mutuhasa kupwa ni shindakenyo ngwetu, Yehova kali ni ndundo ja kutukwasa kunyongonona, nawa kanazange kuchilinga.—Iza. 30:18; 41:10; Luka 11:13.

5. Kuchi kulemba chakutukwasa kupwa ni sambukila ya ku mbunge? (Izaia 26:3)

⁵ Mbimbiliya yakwamba ngwo, nyi twalemba kuli Zambi ni mbunge yeswe, ‘sambukila ya Zambi yize yahiana kunyonga cheswe, muyikafunga mbunge jetu ni kunyonga chetu.’ (Fwili. 4:7) Chino chili kuyuka chinene. Atu waze keshi kuwayila Yehova, no kakupalika mu yipikalo yinji. Alioze ayo kakufupa majila anji a kuwanyinamo sambukila ya ku mbunge. Ngwe chilweza, amwe kakweseka kuvulama manyonga eswe hanga ahone kulipikala chinji. Nyi mutu keshi kusongwela manyonga jenyi, muchihasa kupwa ponde yinene kuli iye, mumu andemoniu mahasa kumusongwela. (Tala nawa Mateu 12:43-45.) Chikwo nawa, sambukila yize Zambi akutwaha muze twakulemba kuli iye, yinahiane sambukila yize mutu mahasa kupwa nayo nyi mafupa kuvulama manyonga eswe. Muze twakulemba, twakusolola ngwetu tunajikijila muli Yehova ni mbunge yeswe, chino chakutukwasa kununga kupwa ni sambukila. (Tanga Izaia 26:3.) Kuchi iye akutwaha sambukila yacho? Jila yimwe akuchilingila, yili muze akutukwasa kwiuluka yisoneko yize yakutwaha shindakenyo ngwo, iye kakutuzanga nawa kanazange upeme wetu. Kwiuluka yisoneko yino, chakutukwasa kulihumikiza ku manyonga ni ku mbunge.—Samu 62:1, 2.

6. Yuma yika muhasa kwita mu yilemba? (Tala nawa chizulie.)

⁶ Yize muhasa kulinga. Muze mupalika mu chimwe cheseko ku ufulielo, “mbila chiteli che hali Yehova” ni kulemba hanga umwite sambukila. (Samu 55:22) Eta nawa malinjekela hanga uhase kukumba cheseko chacho. (Yishi. 2:10, 11) Kuchizako yino, muze mulemba kanda uvulama kusakwilila Yehova. (Fwili. 4:6) Nyonga ha chize Yehova akukukwasa tangwa ha tangwa hanga unyongonone, ni kumusakwilila ha ukwaso wacho ni ha yuma yipema yize akukwaha. Kanda wecha hanga yipikalo yikukinde kumona yiwape yize wakutambula kuli Yehova.—Samu 16:5, 6.

MBIMBILIYA

7. Kuchi kulilongesa Mbimbiliya chakutukwasa kunyongonona?

⁷ Yehova katuhele Liji lienyi hanga litukwase kunyongonona. Muze twakulilongesa Mbimbiliya, twakuwana yisoneko yinji yize yakutwaha shindakenyo ngwo, Yehova matukwasa. Tutalenu chimwe chilweza. Mukanda wa Mateu 6:8, wakwamba ngwo: “Tatenu kananyingika yize nunafupu, shimbu kanda nuchimwitayo.” Yesu mwe wambile maliji wano, chikwo nawa kukushi mutu niumwe yoze unanyingika kanawa Yehova kuhiana Yesu. Kashika muze tunapalika mu yipikalo, mutuhasa kupwa ni shindakenyo ngwetu, Yehova kananyingika yize tunapalika nawa matufunga. Mu Mbimbiliya munazale too ni yisoneko ngwe yino, yize yakutwaha tachi hanga tunyongonone.—Samu 94:19.

8. (a) Kuchi shimbi ja mu Mbimbiliya mujihasa kutukwasa kunyongonona? Hana chilweza. (b) Yika muyitukwasa kwiuluka yisoneko ya mu Mbimbiliya muze mutuyifupa?

⁸ Shimbi ja mu Mbimbiliya mujihasa kutukwasa kunyongonona, mumu jakutwaha mana hanga tukwate yiyulo yipema. (Yishi. 2:6, 7) Ngwe chilweza, Mbimbiliya yakutukolweza hanga tweche kulipikala ni yize muyihasa kulingiwa kulutwe lia matangwa. Yakutukolweza nawa ngwo, twatamba kufuliela muli Yehova matangwa eswe. (Mateu 6:34) Nyi mutupwa ni chako cha kutanga Mbimbiliya ni kuyipukuna, muchipwa chashi kwiuluka yisoneko muze mutuyifupa.

9. Kuchi sango ja mu Mbimbiliya jakutwaha shindakenyo ngwetu Yehova matukwasa?

⁹ Mu Mbimbiliya twakuwanamo nawa sango ja atu waze ajikijilile muli Yehova ni chize Yehova aakwashile. (Hepre. 11:32-34; Tia. 5:17) Kupukuna ha sango jino, chakukolesa ujikijilo wetu muli Yehova ngwetu, “Zambi iye uchinyino wetu ni tachi jetu; iye katwama hehi ni yetu chikwashi mu lamba.” (Samu 46:1) Muze twakunyonga ha chize tuvumbi twa Yehova asolwele ufulielo wo ni kununga kumuwayila chipwe ha mashimbu akalu, chino chakutukolweza hanga twimbulule chilweza cho.—Tia. 5:10, 11.

10. Yika muhasa kulinga mba upwe ni ukwaso wa Mbimbiliya?

¹⁰ Yize muhasa kulinga. Tanga Mbimbiliya matangwa eswe ni kusoneka yisoneko yize muyihasa kukukwasa. Atu anji, kakulivwa kanawa muze akuhengwola chisoneko cha ha tangwa ha chimene, mumu chino muchihasa kwakwasa anyonge ha chimwe chuma chize muchaatakamisa ha kupalika cha tangwa. Yino ye ndumbu Mariea apwile ni kulinga muze tato ni naye aawanyine ni musongo wa cancer. Yika yamukwashile kunyongonona muze te akufunga yisemi jenyi ha tukweji akasula ha mwono wo? Iye yamba ngwenyi: “Matangwa eswe, napwile ni kuhengwola chisoneko cha ha tangwa ni kuchipukuna. Kulinga chino, te chakungukwasa kupachikila chimwe chisoneko cha Mbimbiliya ni kuhona kulihulikila hali yami mwene ni ha yipikalo yize te ngunapalika.”—Samu 61:2.

MANDUMBU JETU

11. Kuchi kunyingika ngwo mandumbu jetu no kanapalika mu yipikalo chakutukwasa kunyongonona?

¹¹ Yehova kakutukwasa kunyongonona kupalikila muli mandumbu jetu. Kunyingika ngwo, mandumbu jetu “hashi heswe no kanapalika mu lamba lino liene,” chakutwaha shindakenyo ngwetu, kutushi ukawetu. (1 Petu. 5:9) Hashi heswe, mandumbu kakupalika mu yipikalo yize ni yetu tunapalika, nihindu ayo kakunyongonona. Chino chinasolola ngwo, chipwe mutupalika mu yipikalo yeswayo, ni yetu mutuhasa kunyongonona.—Yili. 14:22.

12. Kuchi mandumbu jetu akutukwasa nawa yika yetu twakulinga muze ayo akufupa ukwaso wetu? (2 A-Korindu 1:3, 4)

¹² Mandumbu jetu mahasa nawa kutukwasa kunyongonona kupalikila mu yize akuhanjika ni yize akulinga. Yino ye yalingiwile kuli postolo Paulu. Ha yisuho yinji, ha mikanda yize te akusoneka iye te kakusakwilila mandumbu ha ukwaso uze apwile ni kumwaha muze apwile mu zuwo lia ususu, ni kwatongola ha majina. Mandumbu yamulembejeka, yamutakamisa ni kumwaha yize te anafupu. (Fwili. 2:25, 29, 30; Kolo. 4:10, 11) Yino ye yakulingiwa nawa musono. Muze twakufupa ukwaso hanga tunyongonone, mandumbu jetu kakupwa ku sali lietu. Mba muze o akufupa ukwaso, ni yetu twakupwa ku sali lio.—Tanga 2 A-Korindu 1:3, 4.

13. Yika yakwashile ndumbu Maya kunyongonona?

¹³ Ha mwaka 2020, amwe maswalale mu Rússia yaya ni kuhengwola mu zuwo lia ndumbu Maya. Ayo yamutwala mu chota cha usopelo mumu lia kuhanjika ni akwo hakutwala ku yize afuliela. Ha mashimbu jacho, mandumbu kapwile chishina cha utakamiso kuli ndumbu Maya. Iye yamba ngwenyi: “Kwapwile mashimbu waze te nakuhonga chinji. Muze yino te yakulingiwa, mandumbu kapwile ni kungusanyika ni kungusonekena mesaje ni kungulweza ngwo, kakunguzanga chinji. Yami te nanyingika ngwami, nguli ni usoko unene uze wakunguzanga. Alioze kukatuka ha 2020, nakumona zango lino mu majila alipwila.”

14. Kuchi kukwasa mandumbu jetu muchihasa kutukwasa kunyongonona? (Tala nawa chizulie.)

¹⁴ Yize muhasa kulinga. Nyi unapalika mu yipikalo, pwako hakamwihi ni mandumbu. Kanda wivwa sonyi ja kwita ukwaso kuli makulwana a mu chikungulwila. Mumu ayo mahasa kupwa “chiswamo ha fuji, uchinyino ha kangonga.” (Iza. 32:2) Iwuluka nawa ngwe, mandumbu no kanapalika mu yipikalo. Muze mukwasa ndumbu yoze unafupu ukwaso, muhasa kumwena yuma mu jila yeka ni kupwa ni manyonga alita, chino nawa muchikukwasa kunyongonona.—Yili. 20:35.

KUTALATALA CHETU

15. Kuchi kutalatala cha kulutwe lia matangwa chakwashile Yesu, ni yetu kuchi chakutukwasa? (A-Hepreu 12:2)

¹⁵ Kutalatala chize Yehova akutwaha, chakutukwasa kunyongonona. (Roma 15:13) Yino ye yalingiwile kuli Yesu. Iye kanyingikine ngwenyi, nyi manunga ni kushishika, makwasa kupemesa lufuma wa jina lia Yehova. Yesu nawa te kanatwaminyina shimbu lize mapwa cheka ni Tato mu malilu, mba ha kupalika cha mashimbu akayule hamwe ni mandumbu jenyi. Kutalatala chino, chamukwashile kunyongonona ha tangwa likalu chinji ku mwono wenyi hano hashi. (Tanga A-Hepreu 12:2.) Chizechene nawa, kutalatala chetu cha kutwama ku miaka yeswe mu chifuchi chaha, chakutukwasa kunyongonona mu yipikalo yeswayo twakupalika mu chifuchi chino cha Satana.

16. Kuchi kutalatala chakwashile ndumbu Alla kunyongonona, nawa yika walilongesa ha maliji jenyi?

¹⁶ Tutalenu chize kutalatala cha kutwama mu chifuchi chaha, chakwashile ndumbu Alla yoze watwama mu Rússia. Lunga lienyi kamusele mu zuwo lia ususu ha mashimbu akehe muze te anashimbwila usopeso. Muze chino chalingiwile, Alla yamba ngwenyi: “Kulemba ni kupukuna ha kutalatala chetu cha kulutwe lia matangwa, chakungukwasa nguhone kuhonga chinji. Ngunanyingika ngwami, yeseko yino kwasala hakehe muyihwa. Yehova makakumba, ni yetu nawa mutukakumba.”

17. Kuchi mutuhasa kusolola usakwililo wetu ha kutalatala chize Yehova atuhele? (Tala nawa chizulie.)

¹⁷ Yize muhasa kulinga. Sako mashimbu hanga unyonge ha yilakenyo ya Yehova ya kulutwe lia matangwa. Nyonga ngwe uli mu chifuchi chaha, ni kushinginyeka ha yuma yipema yize mukapwa nayo, yize muyikakukwasa kuwahilila. Chino muchikukwasa kumona kapinda mweswawo unapalika ngwe kali wa ‘mashimbu akehe nawa mulelu.’ (2 Kori. 4:17) Chikwo nawa, linga yize muhasa hanga uhanjike ni akwenu ha kutalatala chino. Nyonga ha chize muchihasa kupwa chikalu kuli atu kupalika mu yipikalo mu chifuchi chino cha Satana, chize kuchishi kutalatala chize Zambi akutwaha. Kuhanjika no ha mashimbu akehe, muchihasa kwakwasa hanga azange kutupanjika muze mutuhanjika hakutwala ku kutalatala chacho.

18. Mumu liaka twatamba kujikijila ha yilakenyo ya Yehova?

¹⁸ Muze te hanyongonona mu yipikalo yinji, Yombi yalweza Yehova ngwenyi: “[Haliapwila] ngunanyingika nunahase kulinga yuma yeswe, nichimwe chuma muchifuwa chize munupala kulinga.” (Yombi 42:2) Yombi kalilongesele ngwenyi, kukushi nichimwe chuma chize muchihasa kukwika Yehova kumanununa upale wenyi. Umwenemwene uno, muuhasa kutwaha tachi hanga tunyongonone. Tuchinyonenu ha chilweza chino. Umwe pwo wayiza kananenganyana mumu hapalika ku moko ja mandotolo anji, alioze niumwe kahashile kumuuka. Mba mukusoloka umwe ndotolo yoze ukwete yinyingi yinji nawa ajikijila, mamulweza ngwenyi kananyingika musongo wenyi nawa mahasa kumuuka. Chipwe ngwe kananyingika ngwenyi mukupalika mashimbu mba alivwe kanawa, nihindu iye mawahilila. Kutalatala chize pwo wacho ali nacho, che muchimukwasa kunyongonona ha kunyingika ngwenyi malivwa kanawa. Chizechene nawa, kupwa ni shindakenyo ngwetu, kutalatala chetu cha kulutwe lia matangwa muchikamanunuka, chakutukwasa kunyongonona.

19. Yika twatamba kulinga mba tunyongonone?

¹⁹ Ngwe chize twamona, kulemba, Mbimbiliya, mandumbu jetu ni kutalatala cha kulutwe lia matangwa, yili ukwaso uze Yehova akutwaha hanga tunyongonone. Nyi mutukalakalisa kanawa ukwaso uno, mutumona ngwetu, Yehova kanatukwase mu yipikalo yeswayo. Mutuhasa nawa kunyongonona ndo ha tangwa lize lamba lieswe twakumona mu chifuchi chino cha Satana mulikahwa.—Fwili. 4:13.