MUTWE WA KULILONGESA 35
MWASO 121 Twatamba Kulifunga
Yika Twatamba Kulinga Mba Twehuke Usolo Upi?
“Kanda nutayiza hanga shili yinunge ni kuyula mijimba yenu yize yakufwa, hakunukoka hanga nwononokene usolo wayo.”—ROMA 6:12.
YIZE MUTULILONGESA
Mutumona yize muyitukwasa hanga tuhone kuhonga muze mutupwa ni usolo upi, ni yize twatamba kulinga hanga twehuke usolo wacho.
1. Yika yetu eswe twakupinda nayo?
SHINA hiunapu ni usolo wakulinga chimwe chuma chize Yehova keshi kuzanga? Nyi chenacho, kanda uhonga. Mbimbiliya yinambe ngwo: “Nichimwe cheseko kuchanuwanyine, shina wika chize chakulingiwa kuli atu eswe.” (1 Kori. 10:13)a Chino chinalumbunuka ngwo, usolo weswawo unapinji nawo, ni akwenu newo we anapinji nawo. Kashika, kuushi ukawe, Yehova makukwasa kukumba usolo wacho.
2. Yeseko yika amwe Akwa-Kristu ni alongi a Mbimbiliya akupinda nayo? (Tala nawa yizulie.)
2 Mbimbiliya yinambe nawa ngwo: “Mutu ni mutu kakumweseka muze mecha hanga usolo wenyi umukoke ni kumupiangula.” (Tia. 1:14) Versu yino yinatukwase kunyingika ngwo, yeseko ya mutu ni mutu yalisa. Ngwe chilweza, Akwa-Kristu amwe mahasa kupwa mu cheseko cha kulinga utanji, akwo mahasa kupwa mu cheseko cha kulinga utumwa. Waze echele kutala yizulie ya sonyi (pornografia), mahasa kupwa mu cheseko cha kuyitala cheka. Yeseko yino ye akupinda nayo amwe Akwa-Akristu ni alongi a Mbimbiliya. Ha mashimbu amwe, yetu eswe mutuhasa kulivwa ngwe chize postolo Paulu alivwile muze asonekene ngwenyi: “Muze ngunazange kulinga yuma yalita, yuma yipi muyiza muli yami.”—A-Roma 7:21.
Yeseko yakwiza susumuku ha shimbu lieswalio, ni ku chihela cheswacho (Tala paragrafu 2)d
3. Nyi mutu umwe kakupinda ni usolo upi ha mashimbu anji, yika mahasa kunyonga?
3 Nyi wakupinda ni umwe usolo upi ha mashimbu anji, hanji muhasa kunyonga ngwe, kuuchi kuhasa kuukumba. Mumu lia kupwa ni nyonga lia mutapu au, muhasa nawa kunyonga ngwe, kuushi ni utayizo wa Yehova. Alioze, pwako ni shindakenyo ngwe, manyonga a mutapu au kalitele. Mba tunyingike kanawa mumu liaka manyonga wano kalitele, mutwe uno mukumbulula yihula yino yaali: (1) Iya unazange hanga upwe ni manyonga jacho? (2) Kuchi muhasa kukumba usolo upi?
YIKA SATANA ANAZANGE HANGA TUNYONGE?
4. (a) Mumu liaka Satana anazange hanga tunyonge ngwetu kutuchi kuhasa kukumba usolo upi? (b) Mumu liaka mutuhasa kupwa ni shindakenyo ngwetu mutuhasa kukumba usolo upi?
4 Satana kanazange hanga tunyonge ngwetu, kutuchi kuhasa kukumba yeseko. Yesu kasolwele zwalala ngwenyi, Satana mafupa majila eka ni eka a kutwesekelamo. Kashika alongesele tumbaji twenyi kulemba ngwo: “Kanda nututwala kama mu cheseko, alioze tulamwinenu kuli mwe mupi.” (Mateu 6:13) Satana kambile ngwenyi, atu keshi kuhasa kwononokena Yehova nyi mapwa mu cheseko. (Yombi 2:4, 5) Mumu liaka Satana ambile yuma ya mutapu au? Satana kali mutu mutangu yoze wechele hanga usolo wenyi umukoke alinge yuma yipi ni kwecha kushishika kuli Yehova. Kashika akunyonga ngwenyi, mutwimbulula chilweza chenyi ni kwecha kushishika kuli Yehova muze mutupwa mu cheseko. Satana kanyongene ngwenyi, te mahasa kutwala chipwe lume Mwana mungunu wa Zambi kulinga yuma yipi. (Mateu 4:8, 9) Achinyonga ha chino: Shina kutuchi kuhasa lume kukumba usolo upi? Hi chocho ko. Yetu tuli ni shindakenyo ngwe yize postolo Paulu apwile nayo, muze asonekene ngwenyi: “Mu yuma yeswe nguli ni tachi mumu lia yoze wakungwaha ndundo.”—Fwili. 4:13.
5. Kuchi tunanyingika ngwetu Yehova kali ni shindakenyo ngwenyi mutuhasa kukumba usolo upi?
5 Kulisa ni Satana, Yehova kali ni shindakenyo ngwenyi, mutuhasa kukumba usolo upi. Kuchi tunachinyingika? Tunachinyingika mumu Yehova kaliangile kwamba ngwenyi, mbunga yinene ya atu ashishika, makapalika ni mwono ha luyinda munene. Nyonga ha ulumbunwiso wa maliji wano. Yehova, yoze keshi kulionga kanambe ngwenyi, mbunga yinene ya atu makanjila alinanga mu chifuchi chaha, ha ‘kukosa mazalo jo asuku ni kwatomesa mu manyinga ja Mwana-panga.’ (Uso. 7:9, 13, 14) Chochene, Yehova kali ni shindakenyo ngwenyi, mutuhasa kukumba usolo upi.
6-7. Yika nawa Satana anazange hanga tutayize?
6 Satana kanazange nawa tutayize ngwetu, mumu lia kupwa ni usolo upi, Yehova kechi katwecha hanga tukazuke mwono wa mutolo. Mumu liaka Satana anazange hanga tunyonge chocho? Mumu iye kechi keza kapwa ni utayizo wa Yehova, kechi kapwa ni mwono wa mutolo nawa makamunongesa liakulu. (Uputu. 3:15; Uso. 20:10) Satana kakupihilila chinji mumu kananyingika ngwenyi, yetu tuli ni kutalatala cha mwono wa mutolo. Kashika, kakusa tachi jinji hanga tunyonge ngwe iye ni kutokesa kutalatala chetu. Mbimbiliya yakutwaha shindakenyo ngwo, Yehova kanazange kutukwasa hanga tukapwe ni mwono wa mutolo. Iye “kazangile hanga mutu niumwe atoke, alioze kanazange hanga eswe alikonyeke.”—2 Petu. 3:9.
7 Nyi mutunyonga ngwetu, kutuchi kuhasa kukumba usolo wetu upi, acho tunakwase Satana yoze unazange hanga tupwe ni nyonga lia mutapu au. Kunyonga cha mutapu au, kuchichi kutukwasa kumana nguu ni kulimika ni Satana.—1 Petu. 5:8, 9.
CHIZE MUTUHASA KULIVWA MUMU LIA KUPWA YIHENGE
8. Kuchizako upi uze twakulinga, yika shili yinalumbunuka nawa? (Samu 51:5) (Tala nawa “Ulumbunwiso wa Amwe Maliji.”)
8 Kuchizako Satana, kuli chuma chikwo chize muchihasa kututwala tulivwe ngwe kutuchi kuhasa kukumba usolo upi. Chuma chika chenacho? Chili shili yize yetu eswe twahingile kuli yisemi jetu atangu, Alama ni Eva.b—Yombi 14:4; tanga Samu 51:5.
9-10. (a) Kuchi Alama ni Eva alivwile muze alingile shili? (Tala nawa chizulie.) (b) Kuchi twakulivwa musono mumu lia kusemuka ni shili?
9 Tuchinyongenu ha chize Alama ni Eva alivwile muze alingile shili. Muze ehukile Yehova, ayo yaswama ni kufuka mijimba yo. Hakutwala ku chikuma chino, mukanda Estudo perspicaz das Escrituras wakwamba ngwo: “Alama ni Eva, te kechi kupwa nawa ni usepa upema ni Yehova. Chipwe ngwe te malinga yeswayo, nihindu te manunga ni kulihisa, kwivwa sonyi ni kulipikala. Mumu te hapwa kulu akwa-shili.”
10 Kwamba pundu, mwono wetu unalisa ni wa Alama ni Eva. Mumu ayo kechi kayuka ha chawana cha ukuule. Alioze yetu, Zambi kakutukonekena shili yetu kupalikila mu ukuule. Chikwo nawa, ukuule wakutukwasa kupwa ni usepa upema ni Yehova. (1 Kori. 6:11) Tunanyingika ngwetu, twahingile shili, kashika kutushi kukomoka muze twakusakalala, kulihisa, hanji muze twakwivwa sonyi. Mbimbiliya yakwamba ngwo, shili yakukwata ha mwono wa atu eswe, chipwe waze kakalingile shili ngwe yize Alama alingile. (Roma 5:14) Alioze, kutwatambile kunyonga ngwetu, mumu lia kusemuka ni shili, kutuchi kuhasa kulinga yuma yalita, hanji ngwetu kutushi ni kutalatala cha mwono wa mutolo. Twatamba kwehuka manyonga wano api. Kuchi mutuhasa kuchilinga?
Shili yatwalile Alama ni Eva alihise, asakalale, alivwe ngwe keshi ni ufunge ni kwivwa sonyi (Tala paragrafu 9)
11. Kulita ni A-Roma 6:12, yika mutuhasa kulinga nyi mutunyonga ngwetu kutuchi kuhasa kukumba usolo upi, mumu liaka?
11 Mumu lia kupwa yihenge, ha mashimbu amwe mutuhasa kunyonga ngwetu, kutuchi kuhasa kwehuka usolo upi mumu chili chuma chikalu kulinga. Alioze, kutwatambile kutayiza manyonga jacho. Mumu liaka? Mumu Mbimbiliya yakulongesa ngwo, kutwatambile kwecha shili hanga “yinunge ni kutuyula.” (Tanga A-Roma 6:12.) Chino chinalumbunuka ngwo, mutuhasa kusakula kwehuka usolo upi. (Ngala. 5:16) Yehova kali ni shindakenyo ngwenyi, mutuhasa kukumba yeseko yeswayo, kashika akutukolweza hanga tuchilinge. (Shimbi 30:11-14; Roma 6:6; 1 Tesa. 4:3) Chochene, yetu eswe mutuhasa kukumba usolo upi.
12. Nyi mutuhona kutalatala yika twatamba kwiuluka, nawa mumu liaka?
12 Nyi mutuhona kutalatala ni kuputuka kunyonga ngwetu, Yehova kanatuhisa mumu lia usolo upi tukwete, twatamba kwiuluka ngwetu shili ye “yinatutwala” kunyonga chocho. Kashika kutwatambile kulipikala. Mumu liaka? Mumu Mbimbiliya yakwamba ngwo, Yehova kananyingika ngwenyi, tuli yihenge. (Samu 103:13, 14) Iye kanatunyingika kanawa, nawa kananyingika chize shili yize twahingile yakukwata hali umwe ni umwe wa kuli yetu. (1 Yoa. 3:19, 20) Kashika, nyi twasa tachi hanga tukumbe usolo upi, mutupwa alinanga kumeso ja Yehova. Mumu liaka twatamba kupwa ni shindakenyo yino?
13-14. Shina kupwa ni usolo upi chinalumbunuka ngwo kutushi ni utayizo wa Yehova? Lumbununa.
13 Mbimbiliya yakusolola ngwo, kulinga yuma yipi yize mutuhasa kwehuka, chalisa ni usolo upi uze wakulijila wene. Ngwe chilweza, ku sekulu yitangu, amwe Akwa-Kristu mu chikungulwila cha Korindu kapwile ni kulinga utumwa. Paulu kasonekene ngwenyi: “Ni amwe a kuli yenu che apwile.” Shina chino chinalumbunuka ngwo, ayo te keshi kwivwa nawa usolo wa kulinga utumwa? Kutushi ni shindakenyo. Mumu kanji-kanji, chakupwa chikalu kwecha usolo upi. Alioze, Akwa-Kristu waze te akusa tachi hanga akumbe usolo wacho, kapwile ni utayizo wa Yehova. Iye te kakwamona ngwenyi ‘hanaasanyisa ni kwapwisa asandu.’ (1 Kori. 6:9-11) Yino muyihasa kulingiwa ni kuli yetu.
14 Chipwe ngwe unapinji ni usolo weswawo, nyingika ngwe muhasa kuukumba. Nyi mumona ngwe kuuchi kuhasa kuukumba, nihindu sako tachi hanga wehuke kulinga ‘upale wa mujimba ni wa kunyonga che.’ (Efwe. 2:3) Mba yika muyihasa kukukwasa kukumba usolo upi?
YIKA MUYITUKWASA KUKUMBA YESEKO?
15. Nyi tunazange kukumba usolo upi mumu liaka chili chilemu kunyingika kanawa ulelu wetu?
15 Mba uhase kukumba usolo upi, watamba kunyingika kanawa ulelu we. Kanyama hanga uhone kulionga yena mwene ni “manyonga a mahuza.” (Tia. 1:22) Ngwe chilweza, mutu yoze wakunwa walwa unji mahasa kunyonga ngwenyi, yami chishi kuzengewa ngwe chize akwetu akwo akulinga. Akwo waze akutala yinema ya sonyi mahasa kulikalila ha kwamba ngwo, nyi te pwo liami kakungusolwela zango, kachi yami chishi kutala yinema ya sonyi. Nyi mutu mapwa ni manyonga a mutapu au, muchihasa kupwa chikalu kwehuka yeseko. Kashika, kanda ufupa kaliongelo hanga ulinge yuma yipi. Chuma watamba kulinga chili kutayiza ngwe, wahengesa.—Ngala. 6:7.
16. Yika muyihasa kutukwasa kununga ni kulinga yuma yalita?
16 Kuchizako kutayiza ulelu wetu, twatamba nawa kusa tachi hanga twehuke kulinga yuma yipi. (1 Kori. 9:26, 27; 1 Tesa. 4:4; 1 Petu. 1:15, 16) Nyingika kanawa yuma yize yakukusa mu cheseko, ni mashimbu waze wakunyonga ha yuma yacho. Kota wakupwa mu cheseko ha yimwe ola hanji muze wakulinga yimwe. Ngwe chilweza, ha shimbu lika chakukupwila chikalu kukumba cheseko, shina muze unahongo chinji nyi ha ufuku? Lianga kunyonga ha cheseko chacho ni yize muhasa kulinga hanga uchehuke. Muchilita kuchilinga shimbu kanda uchipwa mu cheseko chacho.—Yishi. 22:3.
17. Yika mutuhasa kulilongesa ha chilweza cha Yosefwe? (Uputukilo 39:7-9) (Tala nawa yizulie.)
17 Tutalenu yize Yosefwe alingile muze pwo lia Potifwa azangile kulinga nenyi utanji. Ha shimbu lizeliene, Yosefwe yalituna. (Tanga Uputukilo 39:7-9.) Yika mutuhasa kulilongesa ha chilweza chino? Muze te kanda achimweseka kuli pwo lia Potifwa, Yosefwe te hananyingika kulu ngwenyi, hi chipema ko kulimona ni pwo liambala. Chizechene nawa, ni yena muhasa kutesa kulinga yuma yalita shimbu kanda uchipwa mu cheseko. Nyi wachilinga, muchipwa chashi kwehuka yeseko mumu hiunalilulieka kulu.
Ehuka yeseko ni kawashi-washi ngwe chize Yosefwe alingile (Tala paragrafu 17)
‘NUNGA NI KULIHENGWOLA’
18. Yika muyikukwasa kukumba manyonga api? (2 A-Korindu 13:5)
18 Mba ukumbe manyonga api, watamba ‘kununga ni kulihengwola’ yena mwene ha shimbu ni shimbu hanga umone chize uli. (Tanga 2 A-Korindu 13:5.) Mashimbu eswe, hengwola yitanga ni manyonga je hanga umone yize watamba kwalumuna. Ngwe chilweza, chipwe ngwe ha yihuso yimwe wakuhasa kukumba yeseko, nihindu lihule ngwe: ‘Shina nakupalikisa mashimbu anji mba ngulitune cheseko? Nyi mumona ngwe wakupalikisa mashimbu anji mba ulitune chimwe cheseko, kanda ulihisa. Shimbu uchilinge, nyonga ha yize mukalinga ha chisuho chikwo. Lihule ngwe: ‘Yika munguhasa kulinga hanga ngulitune cheseko ha shimbu lizeliene muchisoloka? Shina nakusakula yiheho yize yakungukwika kwehuka yeseko? Nakuteulula meso jami kawashi-washi ku yuma ya luchisa? Kutala ngunanyingika ngwami, shimbi ja Yehova jakunguyukisa mashimbu eswe chipwe ngwe natamba kusa tachi mba ngujikaule?’—Samu 101:3.
19. Kuchi kukwata yiyulo yipi mu yuma yikehe-yikehe muchihasa kutukwika kukumba usolo upi?
19 Muze unalihengwola, kanda ufupa kulikalila ha yitanga ye yipi. Mbimbiliya yakwamba ngwo: “Mbunge kuyakwonga kuhiana yuma yeswe, ni kupiha chikolo.” (Jere. 17:9) Yesu kambile ngwenyi: “Ku mbunge kwe kwakukatuka manyonga api.” (Mateu 15:19) Ngwe chilweza, mutu yoze wechele kutala yizulie ya sonyi, ha shimbu limwe mahasa kunyonga ngwenyi, “hi chipi” ko kutala yizulie yimwe, nyi kuyasolwele atu waze ali uselesele. Iye mahasa nawa kwamba ngwenyi, hi chipi ko kunyonga ha yuma yipi, chipi kuyilinga. Nyi chino muchilingiwa, mbunge ya mutu yono ‘yinatese kumanununa usolo wa musunya.’ (Roma 13:14) Kuchi muhasa kwehuka manyonga wano api? Kanyama ha yiyulo yize wakukwata. Mumu nyi wakwata yiyulo yipi ha yuma yikehe-yikehe, muchipwa chashi kukwata nawa yiyulo yipi ha yuma yinene-yinene, ngwe kupwa ni usolo upi.c Ehuka manyonga eswawo waze mahasa kukutwala kulikalila ha yimwe ndako yipi.
20. Yika tunashimbwila kulutwe lia matangwa, nawa ukwaso uka tuli nawo haliapwila?
20 Ngwe chize twamona, Yehova kakutwaha ndundo hanga tukumbe yeseko. Chikwo nawa, mumu lia ukuule, shili yetu mahasa kutukonekenayo, nawa mutuhasa kupwa ni kutalatala cha mwono wa mutolo mu chifuchi chaha. Muchikawaha chinji kuwayila Yehova chakuhona kupinda ni usolo upi. Alioze muze shimbu liacho kanda lichiheta, yetu tuli ni shindakenyo ngwetu, nyi twasa tachi hanga tukumbe jita yize twakwasa ni usolo wetu upi, Yehova matuwahisa.
MWASO 122 Jikizenu, Kanda Nukokoloka!
a Maliji a versu yino mu Mbimbiliya Mukanda Usandu, kalumbunwine ngwo: “Nichimwe cheseko kuchanuwanyine shina chize chakulita ni chisemewa cha atu.”
b ULUMBUNWISO WA AMWE MALIJI: Mu Mbimbiliya, liji “shili” linalumbunuka chimwe chuma chipi chize mutu alinga, ngwe upangala, utanji, wiji hanji kushiha mutu. (Kutuhu. 20:13-15; 1 Kori. 6:18) Alioze mu yisoneko yimwe, liji shili liakulumbunuka uhenge uze twakusemuka nawo, chipwe ngwe kutwalingile chuma chipi nichimwe.
c Tutalenu mwana-lunga yoze anatongola ha Yishima 7:7-23 yoze waputukile kukwata yiyulo yipi mu yuma yikehe-yikehe, mba kulutwe, yakwata chiyulo chipi chize chamutwalile kulinga upangala.
d ULUMBUNWISO WA YIZULIE: Ku umama: Muze anatwame mu limwe zuwo lia kulanjishila cafe, ndumbu kanatale malunga aali waze analisolwela zango. Ku utata: Ndumbu wa pwo kanatale atu aali waze anashipa.