“Asanyike Makulwana a mu Chikungulwila”

1. Yika Yehova alingile yize yakusolola ngwo mapanga kali alemu kuli iye?

YEHOVA kakuzanga atu eswe waze akumuwayila ni kwafunga ngwe chize kafunga akufunga mapanga jenyi. Kashika ahanyine Mwanenyi wa wika ni makulwana a mu chikungulwila hanga aafunge ni zango. (Yili. 20:28) Yehova katongwele Yesu hanga apwe mutwe wa chikungulwila. Iye ni Mwanenyi kanazange hanga makulwana afunge mapanga jenyi ni zango. Makulwana kakukaula usongwelo wa Yesu, ha kukwasa mapanga apwe ni usepa upema ni Yehova.—Iza. 32:1, 2.

2. Kulita ni Ezekiele 34:15, 16, hali aya Yehova akulihulumba chinji?

² Yehova kakulihulumba ni kufunga tuvumbi twenyi eswe, chipi-chipi waze anapalika mu lamba. Kupalikila muli makulwana a mu chikungulwila, iye kakwakwasa ku ufulielo. (Tanga Ezekiele 34:15, 16.) Alioze mba makulwana atukwase, twatamba kwalweza ngwo, tunafupu ukwaso wo. Mumu Yehova kazangile wika hanga tulembe kuli iye, alioze kanazange nawa hanga twite ukwaso kuli tufunga ni ‘alongeshi a mu chikungulwila.—Efwe. 4:11, 12.

3. Kuchi yetu eswe mutuhasa kuyuka nyi twanyingika mulimo uze makulwana a mu chikungulwila akulinga?

³ Ha mutwe uno, mutumona chize Yehova akukalakalisa makulwana a mu chikungulwila hanga akwase waze hanazeye ku ufulielo. Mutukumbululaho nawa yihula yitatu. Chitangu, ha shimbu lika twatamba kwita ukwaso kuli makulwana a mu chikungulwila? Chamuchiali, mumu liaka twatamba kwita ukwaso kuli makulwana a mu chikungulwila? Chamuchitatu, kuchi makulwana a mu chikungulwila akutukwasa? Chipwe ngwe ha shimbu lino kutwapalikile mu umwe kapinda, nihindu kunyingika makumbululo a yihula yino, muchitukwasa kusakwilila Yehova ha kutwaha makulwana waze akutukwasa ni kunyingika yize mutuhasa kulinga muze mutufupa ukwaso wo.

HA SHIMBU LIKA TWATAMBA KWITA UKWASO KULI MAKULWANA A MU CHIKUNGULWILA?

4. Mumu liaka tuli ni shindakenyo ngwetu mukanda wa Tiangu 5:14-16, 19, 20, unahanjika ha kuyiza cha ku ufulielo? (Tala nawa yizulie.)

⁴ Kambaji Tiangu, kanatulweze chize Yehova akukalakalisa makulwana a mu chikungulwila hanga atukwase. Iye yamba ngwenyi: “Shina mukachi kenu muli umwe yoze unayiji? Asanyike makulwana a mu chikungulwila.” (Tanga Tiangu 5:14-16, 19, 20.) Maliji wano kanasolola ngwo, Tiangu te kanahanjika ha kuyiza cha ku ufulielo. Ngwe chilweza, iye kambile ngwenyi, mutu yoze unayiji ku ufulielo katamba kusanyika makulwana a mu chikungulwila hi ndotolo ko. Chikwo nawa, tuli ni shindakenyo ngwetu, Tiangu te kanahajika lume ha kuyiza cha ku ufulielo, mumu uukiso wacho te unachingi ukonekeno wa shili. Alioze chipwe chocho tunanyingika nawa ngwetu, yuma yize mutu akulinga hanga aliukise ku ufulielo, yinalifu ni yize akulinga hanga aliukise muze anayiza ku musunya. Mumu liaka tunambe chocho? Mumu mutu yoze unayiza ku musunya, kakuya kuli ndotolo ni kumulweza yize anevu ni kukaula usongwelo uze mamwaha. Yino nawa, ye yakulingiwa kuli mutu yoze unayiza ku ufulielo. Mutu wacho kakusanyika makulwana, maalweza yize anevu ni kukaula yiyulo ya Mbimbiliya yize mamwaha kuli makulwana.

5. Kuchi mutuhasa kunyingika ngwetu ufulielo wetu unayi ni kukeketela?

⁵ Maliji waze Tiangu ambile ha kapitulu 5, kanatukolweza hanga tufupe ukwaso wa makulwana ha shimbu lieswalio mutumona ngwetu, ufulielo wetu unayi ni kukeketela. Mutuhasa kusolola mana ha kulianga kwita ukwaso shimbu kanda tuchilinga chuma cheswacho chize muchihasa kupihisa usepa wetu ni Yehova. Twatamba nawa kukeya hanga tuhone kulionga yetu ene ha kunyonga ngwo tuli kanawa ku ufulielo, muze chamwenemwene ufulielo wetu unakeketela. (Tia. 1:22) Yino ye yalingiwile kuli Akwa-Kwistu a mu chikungulwila cha Sarte. Kashika Yesu aalwezele ngwenyi, ayo te keshi kuvwisa Yehova kuwaha. (Uso. 3:1, 2) Mba tunyingike chize tuli ku ufulielo, twatamba kulihengwola hanga tumone nyi uwayilo wetu kuli Yehova uchili ngwe chize wapwile ku uputukilo. (Uso. 2:4, 5) Mutuhasa kulihula ngwetu: Shina nakuwahilila ha kutanga Mbimbiliya ni kuyipukuna ngwe chize napwile ni kulinga kunyima? Shina nakuya ha kukunguluka cheswe ni kululieka kukunguluka chacho? Kutala munguchinunga ni kuzanga mulimo wa kwambujola ngwe chize napwile ku uputukilo? Kuchi nakukalakalisa mashimbu jami, shina ha kulinga yiheho ni kufupa mbongo? Nyi wakumbulula ngwe ewa ha yihula yino, nyingika ngwe, usepa we ni Yehova kuushi kanawa uli mu ponde. Alioze nyi ngwe hiunalingi yimwe hanga ululieke ufulielo we mba kuwahashile, nyingika ngwe Yehova kanazange hanga ufupe ukwaso wa makulwana a mu chikungulwila.

6. Yika atu waze alinga shili yinene atamba kulinga?

⁶ Atu waze alinga shili yinene, keshi kuhasa kululieka usepa wo ni Yehova ukawo. Mumu shili yacho, muyihasa kwatwala hanga aachize mu chikungulwila, kashika katamba kufupa ukwaso wa makulwana. (1 Kori. 5:11-13) Mba Yehova aakonekene kupalikila mu ukuule, ayo katamba kusolola “yitanga yakulita ni kulikonyeka.” (Yili. 26:20) Yitanga yacho yinachingi kusanyika makulwana a mu chikungulwila nyi malinga shili yinene.

7. Kuchizako waze alinga shili yinene, aya nawa anafupu ukwaso wa makulwana a mu chikungulwila?

⁷ Makulwana a mu chikungulwila keshi kukwasa wika atu waze alinga shili yinene, alioze kakukwasa nawa atu waze anazeye ku ufulielo. (Yili. 20:35) Ngwe chilweza, hanji unalihulumba ngwe kuuchi kuhasa kukumba usolo upi, mumu muze te kanda uchinyingika umwenemwene, wapwile ni kunwa droga, kutala yizulie ni yinema ya sonyi hanji kulinga upangala. Alioze kuwatambile kukumba kapinda yono ukawe. Muhasa kuhanjika ni mukulwana yoze makupanjika kanawa ni kukwaha yiyulo yize muyihasa kukukwasa kupwa ni shindakenyo ngwe, muhasa kuvwisa Yehova kuwaha ha kukumba usolo upi. (Chilu. 4:12) Nyi ngwe muchinunga ni kunenganyana mumu lia kupinda ni usolo upi ha mashimbu anji, makulwana a mu chikungulwila makukwasa kumona ngwo, chinyengo chize unevwu chinasolola ngwo wakulemesa usepa we ni Yehova nawa wakulikehesa.—1 Kori. 10:12.

8. Shina twatamba kwita ukwaso wa makulwana a mu chikungulwila ha yuma yeswayo muyilingiwa? Lumbununa.

⁸ Kutwafupile kusanyika makulwana a mu chikungulwila hanga atukwase ha yuma yeswayo muyilingiwa. Ngwe chilweza, tuchinyongenu ngwetu mutwamba yimwe yize muyilemeka ndumbwetu ku mbunge. Shimbu tusanyike makulwana a mu chikungulwila, mutuhasa kukaula chiyulo cha Yesu cha kulivwashana ni ndumbwetu. (Mateu 5:23, 24) Mutuhasa nawa kuhengwola ha yitanga ya muhuko wa ku spiritu ngwe kushimbika, uhomboloji ni kulihumikiza hanga tuhase kuyisolola ha chisuho chikwo. Nyi hanyima lia kuhengwola nihindu kutwahashile kuhwisa kapinda wacho, mutuhasa kusanyika mukulwana wa mu chikungulwila hanga atukwase. Ha mukanda wa A-Fwilipu uze Paulu asonekene, iye yeta kuli umwe ndumbu mu chikungulwila hanga akwase Evotia ni Sentiki alivwashane. Ni yetu nawa, nyi ngwe mutupalika mu kapinda yono, mutuhasa kwita kuli umwe mukulwana wa mu chikungulwila hanga atukwase.—Fwili. 4:2, 3.

MUMU LIAKA TWATAMBA KWITA UKWASO KULI MAKULWANA A MU CHIKUNGULWILA?

9. Mumu liaka kutwatambile kwivwa sonyi ja kwita ukwaso kuli makulwana a mu chikungulwila? (Yishima 28:13)

⁹ Twatamba kupwa ni ufulielo ni hamu mba twite ukwaso kuli makulwana a mu chikungulwila, muze mutulinga shili yinene hanji muze mutulivwa ngwetu, kutuchi kuhasa kukumba umwe usolo upi. Kutwatambile kwivwa sonyi ja kwita ukwaso kuli makulwana a mu chikungulwila. Mumu liaka? Mumu Yehova katuhele makulwana hanga atukwase kukolesa usepa wetu ni iye. Kusanyika makulwana chakusolola ngwo, twakujikijila muli Yehova nawa tunazange kumwononokena. Muze twakwita ukwaso wa makulwana twakusolola nawa ngwo, kutwazangile kulinga yuma yize kuyalitele. (Samu 94:18) Nyi twalingile yimwe shili yinene, mutuhasa kupwa ni ukonekeno wa Yehova ha kulweza makulwana yize twalingile ni kwecha kuyilinga.—Tanga Yishima 28:13.

10. Yika muyihasa kulingiwa nyi mutusweka shili yize twalinga?

¹⁰ Muze twakulweza makulwana a mu chikungulwila shili yize twalinga, Yehova kakutukonekena. Mwanangana Ndawichi kesekele kusweka shili yize alingile, chocho yapinda ku manyonga, ku ufulielo ni kumusunya. Ni yetu nawa, nyi mutusweka shili yize mutulinga, chino muchitunehena lamba linji. (Samu 32:3-5) Chizechene ngwe musongo wa ku musunya wakwoka chinji nyi ngwe kauukile, ni yetu nawa kapinda wetu wa ku ufulielo, mahasa kwoka chinji nyi kutwafupile ukwaso ni kawashi-washi. Yehova kananyingika kanawa chikuma chino, kashika akutukolweza hanga tulivwashane nenyi kupalikila mu ukwaso uze atuhele, makulwana a mu chikungulwila.—Iza. 1:5, 6, 18.

11. Nyi twasweka shili, kapinda muka mutuhasa kuneha kuli mandumbu?

¹¹ Nyi twalinga shili yinene ni kuyisweka, mutuhasa kuneha kapinda kuli akwetu. Mumu liaka? Mumu mutukwika ndundo ja spiritu yisandu mu chikungulwila ni kusa mu ponde sambukila yize yatwama hakachi ka mandumbu. (Efwe. 4:30) Chikwo nawa, nyi mutunyingika ngwetu ndumbwetu kalinga shili yinene, kutwatambile kuyisweka, alioze twatamba kumukolweza hanga alweze makulwana a mu chikungulwila.a Nyi iye kaalwezele, yetu twatamba kwalweza hanga tuhone kupihisa usepa wetu ni Yehova. (Levi 5:1) Zango ni ushishiko wetu kuli Yehova, ye muyitukwasa kulweza makulwana umwenemwene uze tunanyingika. Kulinga chino, chakukwasa chikungulwila chipwe chalinanga ni kukwasa nawa mutu yoze walingile shili kupwa cheka ni usepa upema ni Yehova.

KUCHI MAKULWANA A MU CHIKUNGULWILA AKUTUKWASA?

12. Kuchi makulwana a mu chikungulwila akukwasa waze anazeye ku ufulielo?

¹² Mbimbiliya yakukolweza makulwana a mu chikungulwila hanga akwase waze anazeye ku ufulielo. (1 Tesa. 5:14) Nyi walinga shili yinene, ayo hanji mahasa kukuhula hanga walweze chize unalivu ni yize unanyongo. (Yishi. 20:5) Kota kuhajika chize unalivu muchihasa kupwa chikalu mumu lia chize akulelele, chize wapwa hanji mumu lia sonyi ha yize walinga. Chipwe chocho, kanda wivwa woma ngwo hanji muhanjika yuma yize kuyalitele. (Yombi 6:3) Nyingika ngwe, makulwana a mu chikungulwila makupanjika kanawa ni kwivwa yeswe yize muwalweza shimbu kanda achikwata chiyulo. (Yishi. 18:13) Ayo kananyingika ngwo, kufunga mapanga ja Yehova chakumbata mashimbu. Kashika, kechi kushimbwila ngwo mahwisa kapinda yoze uli nenyi ha kuhanjika ni yena ha chisuho chimuwika.

13. Kuchi kulemba ni kukaula yiyulo yize makulwana a mu chikungulwila akutwaha muyihasa kutukwasa? (Tala nawa yizulie.)

¹³ Makulwana masa tachi muze mahanjika ni yena hanga ahone kuhanjika yuma yize muyihasa kukutwala hanga wivwe chinyengo. Ayo nawa malemba hamwe ni yena. Muhasa kukomoka ha chize yilemba yo muyihasa kukukwasa. Ukwaso wo nawa muuhasa kuchinga ‘kukuwahisa ni maji mu jina lia Yehova.’ (Tia. 5:14-16) Maji kanalumbunuka umwenemwene wa mu Mbimbiliya. Kupalikila mu ukwaso wa mu Mbimbiliya, ayo mahasa kukutakamisa ni kukukwasa upwe cheka ni usepa upema ni Yehova. (Iza. 57:18) Yiyulo ya mu Mbimbiliya yize makwaha, muyikukwasa kulinga yuma yalita. Kupalikila mu ukwaso wo, muhasa kwivwa liji lia Yehova linambe ngwo: “Ye jila yino; endelenumo.”—Iza. 30:21.

14. Kulita ni A-Ngalashia 6:1 kuchi makulwana akukwasa mutu yoze ‘watalinga’? (Tala nawa yizulie.)

¹⁴ Tanga A-Ngalashia 6:1. Mukwa-Kristu yoze ‘watalinga’ keshi kulinga yuma kulita ni shimbi ja Yehova. Liji kutalinga mulihasa kulumbunuka kukwata yiyulo yize kuyalitele, hanji kulinga yimwe shili yinene. Mumu lia zango, makulwana a mu chikungulwila kakweseka kukwasa “mutu wacho ni spiritu ya kushimbika.” Liji lia Ngregu lize analumbununa ngwo “kukwasa,” mulihasa nawa kutala ha yize ndotolo akulinga hanga afunyise chimwe chifwaha mu chihela chacho chakuhona kuweza yikola kuli mutu. Ngwe chizechene Ndotolo akusa tachi hanga afunyise chifwaha cha mutu mu chihela chacho chakuhona kumukokela yikola yinji, makulwana no kakusa tachi hanga akwase mutu yoze walinga shili chakuhona kumuwezela yikola mumu lia yize mamba hanji malinga. Mbimbiliya yakwamba ngwo, makulwana a mu chikungulwila no katamba kukanyama hanga achine kuholokela mu cheseko cha kulinga yuma yipi. Kashika muze makwasa mutu umwe yoze walinga shili, ayo katamba kwiuluka ngwo, no kali yihenge. Katambile kulimona ngwo kali alemu chinji kuhiana akwo. Shimbu achilinge, katamba kusa tachi hanga asolole ngwo, kali akwa-kulikehesa nawa kakulisa mu chihela cha akwo.—1 Petu. 3:8.

15. Yika mutuhasa kulinga muze mutupwa ni umwe kapinda?

¹⁵ Mutuhasa kujikijila makulwana a mu chikungulwila. Mumu liaka? Mumu Yehova kakwafumba hanga afunge sango jambala chakuhona kujimwanga, hanga ajikijile ha yiyulo ya mu Mbimbiliya chakuhona kulikwachilila ha manyonga jo ene ni kutukwasa kunyongonona. (Yishi. 11:13; Ngala. 6:2) Hita mukulwana wa mu chikungulwila kalisa ni mukwo. Mumu mutu ni mutu kakwete yitanga yenyi. Amwe Kali ni yinyingi yinji kuhiana akwo. Chipwe chocho, kutwatambile kupalika kuli mukulwana ni mukulwana ndo haze mutuwanyina yoze matulweza yize tunazange kwivwa. Nyi twalinga chocho, mutupwa ngwe mutu yoze wakuzanga ‘kumukula-kula ku matwi,’ shimbu azange kwivwa “malongeso apema” waze akukatuka mu Liji lia Zambi. (2 Timo. 4:3) Muze mutusanyika umwe mukulwana wa mu chikungulwila hanga tumulweze kapinda yoze tuli nenyi, shimbu iye kanda achitwaha chiyulo, katamba kutuhula hanga anyingike nyi hitwahanjika ni umwe mukulwana mukwo, ni kunyingika chiyulo chize mukulwana wacho atwahanga. Kulikehesa muchimukwasa hanga afupe chiyulo cha umwe mukulwana mukwo shimbu kanda achitwaha chiyulo.—Yishi. 13:10.

YIZE TWATAMBA KULINGA

16. Chiteli chika mutu ni mutu ali nacho?

¹⁶ Chipwe ngwe makulwana a mu chikungulwila kali ni chiteli cha kufunga mapanga ambala a Yehova, nihindu o katambile kutukwachila chiyulo ha yize twatamba kulinga. Mutu ni mutu, kali ni chiteli cha kumbata mwono wenyi kulita ni yize alakenyene kuli Yehova. Mutuhasa kusolola ngwetu twakuzanga Yehova, kupalikila mu yize twakwamba ni yize twakulinga tangwa ha tangwa. Ni ukwaso wa Yehova, mutuhasa kukwata yiyulo yipema ni kununga kushishika kuli iye. (Roma 14:12) Kashika shimbu makulwana a mu chikungulwila atulweze yize twatamba kulinga, ayo kakutwaha yiyulo ya mu Mbimbiliya yize yakutukwasa kupwa ni mana ha kusa chinyingi hakachi ka chipi ni chipema hanga tukwate yiyulo ya mana.—Hepre. 5:14.

17. Yika yetu eswe twatamba kulinga?

¹⁷ Chili chiwape chinene kupwa mapanga ja Yehova. Iye katumine “kafunga mupema” Yesu, ahane mwono wenyi hali yetu hanga tukapwe ni mwono wa mutolo. (Yoa. 10:11) Chikwo nawa, Yehova katuhele makulwana a mu chikungulwila hanga atufunge. Ha kulinga chino, iye yamanununa chilakenyo chenyi chinambe ngwo: “Mungukanwaha tufunga ni kulita ni mbunge yami waze manulisa ni mana ni chinyingi.” (Jere. 3:15) Kashika muze mutuzeya ku ufulielo hanji mutuyiza ku spiritu, kanda tuyambashana kusanyika makulwana a mu chikungulwila hanga atukwase. Yetu eswe twatamba kuyuka ha chawana chize Yehova atuhele cha kupwa ni makulwana a mu chikungulwila.