Kwasa ni Kawashi Waze Anazange Kwivwa Sango Jipema

1. Yika atu akulinga muze twakwambulwila sango jipema? (Yilinga 13:47, 48; 16:14, 15)

KU SEKULU yitangu, atu amwe katayijile umwenemwene ha chisuho chitangu chize evwile sango jipema. (Tanga Yilinga 13:47, 48; 16:14, 15.) Chipwe musono, atu amwe kakuwahilila ni kutayiza sango jipema muze akujivwa ha chisuho chitangu. Alioze akwo, ku uputukilo kakusolola ngwe kazangile kutupanjika, mba ha kupalika cha mashimbu mazulula mbunge jo ni kutayiza sango jipema ja Wanangana. Mba yika mutulinga nyi mu mulimo wa kwambujola mutuwana akwa-kulikehesa waze anazange kulilongesa umwenemwene?

2. Mumu liaka mutuhasa kwamba ngwetu mulimo wa kutayisa tumbaji walifwa ni mulimo uze njimi akulinga?

² Tutalenu chilweza chino. Mulimo wa kutayisa tumbaji walifwa ni mulimo wa njimi. Muze akumona ngwenyi ku mutondo umwe mihuko hiyahia, njimi kakuyihela ni kawashi. Alioze iye kakununga ni kulima ni kululieka mitondo yikwo nawa yize mihuko kanda yichihia. Chizechene nawa, nyi twawana mutu mu mulimo wa kwambujola yoze unazange kwivwa sango jipema, twatamba kusa tachi jinji hanga kawashi-washi, tumukwase apwe kambaji ka Yesu. Alioze, twatamba nawa kununga ni kwambujola kuli atu waze akumbata mashimbu anji mba anyingike ulemu wa sango jipema jize twakwambujola. (Yoa. 4:35, 36) Muze twakunyingika nyi mutu kanazange kwivwa sango jipema nyi ka, chakupwa chashi kuwana jila yalita ya kumukwashilamo. Kashika ha mutwe uno, mutumona yize mutuhasa kulinga hanga tukwase mutu yoze matayiza sango jipema ha chisuho chitangu. Mutumona nawa yize mutuhasa kulinga hanga tukwase mutu wacho asenye kulutwe.

KUCHI MUTUHASA KUKWASA MUTU YOZE WATAYIZA SANGO JIPEMA?

3. Yika mutuhasa kulinga nyi mu mulimo wa kwambujola mutuwana atu waze anazange kulilongesa umwenemwene? (1 A-Korindu 9:26)

³ Mu mulimo wa kwambujola, twakuwana atu waze anazange kwivwa sango jipema. Twatamba kusa tachi hanga twakwase alilongese hakutwala kuli Yehova ni kukundama kuli iye. Chikwo nawa, muze mutuhanjika no ha chisuho chitangu, twatamba kwalweza ngwo tunazange kulilongesa no Mbimbiliya, ni kwasanyika hanga aye ku kukunguluka.—Tanga 1 A-Korindu 9:26.

4. Shina mutu mahasa kulilongesa Mbimbiliya ha chisuho chitangu lume mutuhanjika nenyi? Hana chilweza.

⁴ Chize mutuhasa kuputuka longeso lia Mbimbiliya. Atu amwe waze twakuhanjika no mu munda, kakutayiza kuputuka kulilongesa Mbimbiliya ha shimbu lizeliene. Ngwe chilweza, umwe mwana-pwo mu Canadá, yakundama ku temba lia mikanda ni kwanda kamukanda Wahilila ku Mwono ku Miaka Yeswe!. Ndumbu yoze wapwile ni kukalakala ni temba liacho yamulweza ngwenyi, muhasa kulilongesa kamukanda kano, nawa mutuhasa kukulongesa Mbimbiliya chawana. Mwana-pwo wacho yawahilila, chocho yaaliaha numero ja telefone. Ha tangwa lizeliene, mwana-pwo yatumina ndumbwetu mesage ni kumuhula hakutwala ku longeso lia Mbimbiliya. Ndumbu yamuhula ngwenyi, Shina mutuhasa kulilongesa kusongo lia poso? Mwana-pwo yamukumbulula ngwenyi, “chipwe hamene nguli ni shimbu.” Chocho yaaputuka kulilongesa ha tangwa lize liahachileho, yaya ku kukunguluka ha chisuho chenyi chitangu, nawa yanunga ni kukola kawashi-washi ku ufulielo.

5. Kuchi mutuhasa kusolola mana ha kuputuka longeso lia Mbimbiliya? (Tala nawa chizulie.)

⁵ Kutwatambile kushimbwila ngwetu, atu eswe matayiza kulilongesa Mbimbiliya ha shimbu lizeliene mutuhanjika no. Kuli amwe, kwakupalika mashimbu mba aputuke kusolola zango ha umwenemwene wa mu Mbimbiliya. Atu ngwe wano, twatamba kuhanjika no ha sango jize ayo akuzanga kwivwa. Kashika nyi twapwa ni nyonga lialita ni kusolola ngwetu twakulihulumba hali ayo, ha kupalika cha mashimbu akehe, ayo mahasa kutayiza kulilongesa Mbimbiliya. Yika mutuhasa kwamba muze mutuputuka longeso lia Mbimbiliya? Tutalenu yize ambile mandumbu anji waze chakwapwila chashi kuputuka malongeso a Mbimbiliya.

6. Yika mutuhasa kwamba hanga tukwase atu anunge ni kuhanjika ni yetu?

⁶ Akwa-kwambujola ni mapionelu amwe waze ahulile hakutwala ku kuputuka malongeso a Mbimbiliya kambile ngwo, mu yifuchi yimwe chili chipema kwehuka kwamba maliji ngwe, “kulilongesa” “kulilongesa Mbimbiliya” ni “kukulongesa” muze anahanjika hakutwala ku longeso lia Mbimbiliya. Shimbu achilinge, ayo kakuvuluka maliji ngwe, “kuhanjika” “kushimutwina’ ni “kunyingika Mbimbiliya.” Mba mutu anunge ni kuhanjika ni yena, muhasa kwamba ngwe, “Mbimbiliya yili yipema chinji, mumu yakukumbulula yihula yilemu ya ku mwono. Hanji kwamba nawa ngwe, ‘Mbimbiliya hi wika ko ya atu waze akufuliela, muli yiyulo yipema ya tangwa ni tangwa.” Chikwo nawa, muhasa kwamba ngwe, “kutushi kumbata mashimbu anji, mutuhasa kuhanjika wika minutu 10 hanji 15. Alioze ha minutu yino, mutuhasa kulilongesa yuma yinji yize muyihasa kwalumuna mwono wetu.” Mba tuhone kwaevwisa woma, mutuhasa kwehuka kwalweza ngwo, “twatamba kulemesa tangwa lize twalitesa” lia kulilongesa hanji kwalweza ngwo, mutupwa ni kulilongesa “poso ha poso.”

7. Kuchi mutuhasa kukwasa alongi a Mbimbiliya akole ku ufulielo ni kawashi? (1 A-Korindu 14:23-25)

⁷ Kusanyika atu ha kukunguluka. Ha mashimbu ja postolo Paulu, chakusoloka ngwe atu anji katayijile umwenemwene ni kusenya kulutwe mumu lia kupwa ha kukunguluka. (Tanga 1 A-Korindu 14:23-25.) Ni musono nawa, yino ye yakulingiwa. Alongi anji a Mbimbiliya kakusenya kulutwe ni kawashi-washi muze akupwa ha kukunguluka. Mba ha shimbu lika lialita twatamba kusanyika atu hanga aye ha kukunguluka? Mukanda Wahilila ku Mwono ku Miaka Yeswe! ha longeso 10, wakukolweza alongi a Mbimbiliya hanga aye ku kukunguluka. Alioze, kutwatambile kushimbwila ndo muze mutuheta ha longeso liacho mba tusanyike alongi a Mbimbiliya aye ku kukunguluka. Mutuhasa kwasanyika ha chisuho chitangu muze mutuhanjika no hanga aye ku kukunguluka cha kusongo lia poso. Mutuhasa nawa kwalweza hakutwala ku mutwe wa pande jize makahanjika hanji kutongola chimwe chikuma chilemu cha mu Kaposhi wa Kutalila.

8. Yika mutuhasa kulweza longi yetu muze mutumusanyika aye ha kukunguluka? (Izaia 54:13)

⁸ Muze mutusanyika alongi jetu ha kukunguluka, twatamba kwalumbunwina ngwo, kukunguluka chetu chalisa ni cha akwa-mayingeleja. Muze umwe longi wa Mbimbiliya ayile ha kukunguluka ha chisuho chitangu, yamona ngwenyi ndumbu yoze unasongwela longeso lia Kaposhi kanatongola mandumbu ha majina jo. Chocho yahula longeshi yenyi ngwenyi: “Ndumbu yono kananyingika majina a mandumbu eswe?” Longeshi yenyi yamukumbulula ngwenyi, ngwe chizechene tunanyingika majina ja asoko jetu, ni yetu twakusa tachi hanga tunyingike majina ja mandumbu jetu. Longi yamona ngwenyi, kukunguluka chetu chalisa chinji ni cha ku yingeleja yenyi. Chuma chikwo chize mutuhasa kulinga muze mutusanyika mutu ha kukunguluka, chili kumulweza ulemu wa kukunguluka chacho. (Tanga Izaia 54:13.) Mutuhasa kumulweza ngwo, yetu twakukunguluka hanga tuwayile Yehova, tulilongese hakutwala kuli iye ni kulitakamisa umwe ni mukwo. (Hepre. 2:12; 10:24, 25) Kashika kukunguluka chetu kakuchilulieka hanga tulilongese hali Yehova, hi ha mianda ya akwa-mayingeleja ko. (1 Kori. 14:40) Zuwo lietu lia Wanangana lili lia kululieka kanawa mumu mwe twakulilongesela hakutwala kuli Yehova. Yetu nawa, kutushi kulinjisa mu yuma ya mafwefwe chipwe kukalila chimwe chizavu cho. Kutushi kulihangujola chipwe kuhana limwe nyonga hakutwala ku yimwe yize ayo anambe. Chuma chikwo chize muchihasa kutukwasa, chili kusolwela alongi jetu chinema, Yika Yakupwa mu Zuwo lia Wanangana? Kulianga kutala chinema chino ni longi ye, muchimukwasa anyingike yize makamona mu Zuwo lia Wanangana.

9-10. Yika mutuhasa kulweza mutu yoze twasanyika ha kukunguluka hanga ahone kwivwa woma wa kupwa ha kukunguluka chetu? (Tala nawa chizulie.)

⁹ Atu amwe keshi kuzanga kuya ku kukunguluka mumu kakunyonga ngwo, nyi maya ha kukunguluka mapwa Yela ja Yehova. Kashika muze musanyika mutu aye ha kukunguluka chetu watamba kumulweza ngwe, kutushi kushinjila mutu hanga apwe Chela cha Yehova chipwe kumulweza hanga ambe hanji alinge yimwe muze tunakunguluka. Asoko eswe mahasa kupwa ha kukunguluka chetu kuchingako twanuke. Ha kukunguluka chetu, twanuke keshi kwahandununa ni yisemi jo hanga aalongese kwa ukawo. Alioze yisemi kakutwama ni ano hanga eswe alilongese hamuwika. Kulinga chino, chakukwasa yisemi kunyingika ngwo ana jo kali kanawa, ni kunyingika yize analilongesa. (Shimbi 31:12) Chikwo nawa ha kukunguluka chetu, kutushi kwitaho hanga atu ahane mbongo chipwe kupalikisa lwalo haze masa mbongo. Mumu twakukaula yize Yesu ambile ngwenyi: “Yuma yino Zambi kanwahayo yawana, ni yenu yihanenu yawana.” (Mateu 10:8) Munuhasa nawa kulweza mutu yoze maya ha kukunguluka ngwo, katambile kupwa ni mazalo a ndando yinji mba apwe ha kukungulula. Mumu Zambi kakutala chize twapwa mu mbunge hi chize ko twakusolola.—1 Samue. 16:7.

¹⁰ Muze umwe mutu maya ha kukunguluka ha chisuho chitangu, twatamba kusa tachi hanga tumukwase alivwe kanawa. Mutu yoze wamusanyikanga mahasa kumusolola kuli makulwana a mu chikungulwila hanji kuli mandumbu akwo. Mumu nyi mutu wacho mamona ngwenyi mandumbu kalihulumba nenyi ni kumusolwela zango, chino muchimukwasa akakunguluke ha chisuho chikwo. Nyi mutu wacho kambachile Mbimbiliya, muhasa kumukundama hanga umukwase kukaula yisoneko ha Mbimbiliya ye. Chikwo nawa musolwele ngwe, wakulemesa yize yakulingiwa ha kukunguluka muze mukaula kanawa pande jize analingi hanji longeso lia kaposhi wa kutalila.

KUCHI MUTUHASA KUKWASA MUTU YOZE WAPUTUKA KULILONGESA MBIMBILIYA?

11. Kuchi muhasa kusolola ngwe wakuvumbika mashimbu a longi ye?

¹¹ Muze tunalilongesa Mbimbiliya ni umwe mutu, yikuma yika yilemu twatamba kwiuluka? Twatamba kwiuluka ngwetu, mutu yoze tunalilongesa nenyi Mbimbiliya neye kali ni yuma yinji ya kulinga, kashika twatamba kuvumbika mashimbu jenyi. Nyi twalitesanga kulilongesa ha limwe shimbu, twatamba kusa tachi hanga tuhete ha shimbu liacho chipwe ngwe kuze twatwama atu keshi kuvumbika mashimbu. Chikwo nawa, chili chipema kuhona kushimbula ha longeso litangu. Amwe akwa-kwambujola kakwamba ngwo, chili chipema kuhwisa longeso nikawashi chipwe ngwe longi kanazange kununga. Chili chilemu nawa longeshi kuhona kuhanjika chinji, alioze kwecha longi hanga ahanjike yize ali nayo ku mbunge.—Yishi. 10:19.

12. Yika mutuhasa kulinga muze mutuputuka kulilongesa Mbimbiliya ni mutu?

¹² Muze mutuputuka kulilongesa Mbimbiliya ni umwe longi, chitangu twatamba kumukwasa anyingike Yehova ni Yesu ni chize mahasa kwazanga. Mutuhasa kuchilinga ha kwehuka kumulweza manyonga jetu, alioze kumusolwela yize Mbimbiliya yakwamba. (Yili. 10:25, 26) Postolo Paulu kali chilweza chipema ha chikuma chino. Mumu muze apwile ni kulongesa, iye kapwile ni kutalikisa malongeso jenyi hali Yesu Kristu, yoze wejile hano hashi hanga akwase atu kunyingika ni kuzanga Yehova. (1 Kori. 2:1, 2) Paulu kakwashile nawa tumbanji aha kunyingika ulemu wa kupwa ni yitanga yipema yize akutesa ni oru, prata, ni mawe a ndako yipema. (1 Kori. 3:11-15) Yitanga yacho yinachingi ufulielo, mana, malinjekela ni kuvwila woma Zambi. (Samu 19:9, 10; Yishi. 3:13-15; 1 Petu. 1:7) Mutuhasa kwimbulula chilweza cha Paulu, ha kukwasa alongi jetu apwe ni ufulielo ukolo ni usepa upema ni Yehova, ni kukundama kuli Tata yetu wa zango.—2 Kori. 1:24.

13. Kuchi mutuhasa kusolola ngwetu tuli akwa-kulihumikiza nawa twakulisa mu chihela cha longi yetu? (2 A-Korindu 10:4, 5) (Tala nawa chizulie.)

¹³ Muze unalongesa, kaula chilweza cha Yesu ha kupwa chihomboloji ni kulisa mu chihela cha akwenu. Ehuka kuhula longi yuma yize muyimuvwisa sonyi. Nyi longi kanapinda ni chimwe chikuma, nungenu ni longeso mba kulutwe muhasa kusunga cheka ha chikuma chacho. Shimbu ushinjile longi hanga atayize limwe longeso, mwehe shimbu hanga umwenemwene utande miji mu mbunge yenyi. (Yoa. 16:12; Kolo. 2:6, 7) Mumu mu Mbimbiliya, malongeso a mahuza kakwatesa ni yipanga yize tuneseka kupuzula. (Tanga 2 A-Korindu 10:4, 5; tala maliji “kupuzula yipanga” mu Mbimbiliya ya estudo.) Kashika, shimbu kanda tuchilweza longi ngwetu yize afuliela yili ya mahuza, chitangu twatamba kumukwasa atunge chipanga chaha hanji ngwetu, akolese ujikijilo wenyi kuli Yehova ni kumupwisa uchinyino wenyi.—Samu 91:9.

KUCHI MUTUHASA KUKWASA MUTU YOZE WAPUTUKA KUKUNGULUKA?

14. Yika twatamba kulinga hali atu waze aputuka kulikungulula ni yetu?

¹⁴ Yehova kanazange hanga twehuke katonde. Alioze kanazange hanga tusolole umbovu kuli atu eswe, chipwe ngwe kali a ku minyachi yalisa, kakwete mbongo hanji ka, hanji kakatukile ku chihela cheswacho. (Tia. 2:1-4, 9) Mba kuchi mutuhasa kusolwela zango atu waze aputuka kulikungulula ni yetu?

15-16. Kuchi mutuhasa kukwasa atu waze eza ha chisuho chitangu ha kukunguluka alivwe kanawa?

¹⁵ Atu amwe kakuya ha kukunguluka mumu kanazange wika kunyingika yize twakulinga ku Zuwo lia Wanangana. Eka, kakuya ha kukunguluka mumu kaakolwezele kuli umwe ndumbu wa ku chihela chikwo. Kashika muze mutumona umwe ngeji mu Zuwo lia Wanangana, tuhanjikenu nenyi ni kumutambwisa. Alioze, twatamba kukeya hanga tuhone kuhanjika nenyi yuma yize muyimuvwisa sonyi. Chikwo nawa, mutuhasa kumwita hanga tutwame nenyi, kumukwasa kuwana yisoneko ya mu Mbimbiliya ni kumwaha mikanda yize tunalilongesa ha kukunguluka chacho. Musolwele nawa ngwe, unalihulumba hali iye. Umwe lunga yoze wayile ha kukunguluka ha chisuho chitangu, yalweza ndumbwetu ngwenyi, kalivwile kanawa mumu mazalo jenyi kalitele. Ndumbwetu yamukwasa kulivwa kanawa ha kumulweza ngwenyi, yetu Yela ja Yehova tuli ngwe atu eswawo. Yize ndumbu ambile yakwashile lunga wacho, chocho ha kupalika cha mashimbu yamupapachisa. Iye keshi kuvulama kumbululo lize ndumbwetu amuhele. Kashika, muze mutusanyika umwe mutu ha kukunguluka ha chisuho chitangu, twatamba kwiuluka ngwetu, tunazange kusolola ngwetu twakulihulumba hali iye. Alioze twatamba kukeya hanga tuhone kulinjisa mu yuma ya ku mwono wenyi.—1 Petu. 4:15.

¹⁶ Kuli yuma yikwo yize twatamba kulinga, yize muyikwasa ngeji hanji atu waze ali ha kukunguluka ha chisuho chitangu alivwe kanawa. Ngwe chilweza, twatamba kusolola vumbi ha yize twakwamba, chize twakukumbulula ni yize twakuhanjika hali atu waze keshi kuwayila Yehova ni ha yize o afuliela. Twatamba kwehuka kuhanjika maliji waze mevwisa chinyengo atu waze meza ha kukunguluka ha chisuho chitangu. (Titu 2:8; 3:2) Ngwe chilweza, kutwatambile kwamba yuma yipi ha yize ayo afuliela. (2 Kori. 6:3) Mandumbu waze akulinga pande, no katamba kusa tachi hanga ahone kuhianyisa muze anahanjika ha yikuma yacho. Ayo nawa katamba kunyonga hali atu waze hi Yela ja Yehova ko muze analumbununa maliji amwe ni yikuma yikalu yize ngeji kanyingikine.

17. Yika mutuhasa kulinga nyi twawana akwa-kulikehesa waze anazange kulilongesa umwenemwene?

¹⁷ Amu tunakundama ku songo lia hano hashi, mulimo wa kupwisa atu tumbaji twatamba kuulinga ni kawashi-washi. Kashika twatamba kununga ni kufupa akwa-kulikehesa, waze anazange kupwa ni mwono wa mutolo. (Yili. 13:48) Muze mutuwana atu a mutapu au, kutwatambile kuyambashana kuputuka malongeso a Mbimbiliya, chipwe kuyambashana ha kwasanyika hanga aye ku kukunguluka. Nyi twachilinga, mutwakwasa endele mu ‘jila yize muyatwala ku mwono wa mutolo.’—Mateu 7:14.