Yika Mbimbiliya Yakwamba Hali Pwo ni Lunga Waze Atwama Chimuwika Chakuhona Kulimbata Kulita ni Shimbi?
Kumbululo lia mu Mbimbiliya
Mbimbiliya yakwamba ngwo Zambi kanazange hanga atu ‘achine utanji.’ (1 A-Tesalonika 4:3) Mu Mbimbiliya liji “utanji” linatale ha upangala, utumwa, kulisumbakenya cha lunga ni pwo waze kalimbachile kulita ni shimbi.
Mumu liaka Zambi akulihulumba nyi atu waze atwama chimuwika kalimbata kulita ni shimbi?
Zambi mwe watangile umbachiso. Iye kalingile umbachiso wacho muze anungine pwo ni lunga mutangu. (Uputukilo 2:22-24) Kashika, te hi nyonga lia Zambi ko pwo ni lunga kutwama chimuwika chakuhona kulilakenya kununga chimuwika ha kulimbata kulita ni shimbi.
Zambi kananyingika kanawa yize atu akufupiwa. Iye kalingile umbachiso hanga upwe wa mutolo, mumu kanyingikine ngwenyi chino te muchikwasa atu eswe mu usoko. Achinyonga ha chilweza chino: Chizechene ngwe mukwa-kutunga yuma akuhana usongwelo wa chize chuma chacho atamba kuchisokeka kanawa, usongwelo wa Zambi newo wakutulongesa chize mutuhasa kupwa ni uwahililo mu usoko. Mutu yoze wakwononokena shimbi ja Zambi, keshi kuliseha, alioze kakuyuka chinji.—Izaia 48:17, 18.
Chizechene ngwe mukwa-kutunga yuma akuhana usongwelo wa chize chuma chacho atamba kuchisokeka kanawa, usongwelo wa Zambi newo wakutulongesa chize mutuhasa kupwa ni uwahililo mu usoko
Atu waze akulisumbakenya ni atu waze kalimbachile no, kanji-kanji kakupwa ni kapinda munji. Chakutalilaho, mahasa kwaka ufumba uze te keshi ni kushimbwila, kukwachika misongo hanji kupwa ni manyonga api.a
Zambi kahanyine kuli pwo ni lunga uhashi wa kusema ana kupalikila mu kulisumbakenya. Kuli Zambi, mwono wapwa usandu. Kashika uhashi wa kupwa ni ana uli chawana chinene chinji. Zambi kanazange hanga atu waze alimbata kulita ni shimbi e atamba kulisumbakenya. Muze twakwononokena shimbi yino, twakusolola ngwetu twakulemesa chawana chacho.—A-Hepreu 13:4.
Mba yika mutwamba ha chikuma cha atu kutwama chimuwika chakuhona kulimbata kulita ni shimbi hanga amone nyi muchilita kununga?
Kupwa ni uwahililo mu usoko kuchatalile ha kutwama chimuwika chakuhona kulimbata kulita ni shimbi. Alioze, pwo ni lunga katamba kulilakenya kutwama chimuwika ha kulimbata kulita ni shimbi ni kusa tachi hanga ahwise kapinda mukachi ko mba apwe ni uwahililo.b Yilakenyo yo yakwakwasa kununga chimwika.—Mateu 19:6.
Kuchi waze alimbata mahasa kuwahilila mu ulo wo?
Kukwatwamine ulo ungunu. Alioze pwo ni lunga mahasa kupwa ni uwahililo mu ulo nyi makaula shimbi ja mu Mbimbiliya. Tala yimwe yilweza:
Lihulumbe chinji hali yoze walimbata nenyi kuhiana hali yena mwene.—1 A-Korindu 7:3-5; A-Fwilipu 2:3, 4.
Pwenu ni zango ni vumbi kuli umwe ni mukwo.—A-Efwesu 5:25, 33.
Lilongese kulihumikiza muze unahanjika.—Yishima 12:18.
Pwako ni uhomboloji ni mukwa-kukonekena ni kawashi.—A-Kolosu 3:13, 14.
a Tala chikuma chakwamba ngwo: “Yika Munguhasa Kulinga Nyi Mangushinjila Hanga Ngulinge Utanji?”
b Tala chikuma chakwamba ngwo: “Muyikwasa Asoko Kupwa ni Uwahililo—Chilakenyo.”