Mumu Liaka Yela ja Yehova Akwalumuna Amwe Malongeso Waze Akufuliela?

Yize twakufuliela yakukatuka mu Mbimbiliya. Kashika, Twakwalumuna yize twakufuliela muze twakunyingika kanawa Yisoneko.a

Kwalumuna cha amwe malongeso chize Yela ja Yehova akulinga, chinalite ni shimbi ya mu Mbimbiliya yize yili ha Yishima 4:18 yinambe ngwo: “Jila ya mukwa ululi yapwa ngwe kutemuka cha kucha; chakuliwezela tachi ndo tangwa ha muchima.” Ngwe chizechene tangwa liakutuhuka hakehe-hakehe ni kusolola hashi, Zambi neye kakutusolwela ulumbunwiso wa Yisoneko hakehe-hakehe ha mashimbu alita. (1 Petulu 1:10-12) Ngwe chize Mbimbiliya yaprofetezele, chino te muchilingiwa chinji ha ‘matangwa akusula.’—Daniele 12:4.

Kwalumuka chino kuchatambile kutukomwesa chipwe kutupinjisa. Tuvumbi twa Yehova akunyima no ha mashimbu amwe kapwile kunyonga ni kushimbwila yuma yeka, alioze kulutwe yamona ngwo te katamba kwalumuna manyonga jo.

• Muze Mose akumbanyishine miaka 40, iye yalihana ngwe mukwa-kupulula A-Izalele shimbu te mashimbu alita a Zambi kanda aheta.—Yilinga 7:23-25, 30, 35.

• Apostolo kakahashile kunyingika uprofeto uze te unatale ha kufwa ni uhindukilo wa Mesaya.—Izaia 53:8-12; Mateu 16:21-23.

• Amwe Akwa-Kristu ku mashimbu akunyima kakapwile ni manyonga alita hakutwala ku “tangwa lia Yehova.”—2 A-Tesalonika 2:1, 2.

Kulutwe Zambi yaakwasa kunyonga mujila yalita, kashika ni yetu tunalembe hanga iye anunge ni kutukwasa.—Tiangu 1:5.