Umwe mukweze kanatale atu waze ananjila mu Zuwo lia Wanangana

YIZE AKWEZE AKUHULA

Mumu Liaka Chili Chipema Kuya ku Kukunguluka mu Zuwo lia Wanangana?

Yela ja Yehova kakulikungulwila mu yihela ya uwayilo yize avuluka ngwo Mazuwo a Wanangana, kaali ha poso. Yika yakulingiwa ha kukunguluka chacho? Mumu liaka chili chipema kuya ha kukunguluka chacho?

Yika yakulingiwa mu Zuwo lia Wanangana?

Zuwo lia Wanangana chili chihela chize atu akulikungulwila hanga alilongese chize Mbimbiliya muyihasa kwakwasa tangwa ha tangwa. Ha kukunguluka chacho muhasa:

kunyingika umwenemwene hakutwala kuli Zambi.
kunyingika mumu liaka yuma yimwe yinalingiwa musono.
kupwa mutu mupema.
kuwana masepa apema.

Unachinyingika nyi? Yihela yize Yela ja Yehova akulikungulwila kakuyivuluka ngwo Mazuwo a Wanangana, mumu Wanangana che chikuma akuhanjikila chinji mu yihela yacho.—Mateu 6:9, 10; 24:14; Luka 4:43.

Mumu liaka chili chipema kuya ha kukunguluka chacho?

Yuma yize mulilongesaho muyikuyukisa chinji. Shimbi ja mu Mbimbiliya jize akushimutwina ha kukunguluka cha Yela ja Yehova mujikukwasa kupwa ni “mana.” (Yishima 4:5) Chino chinalumbunuka ngwo, Mbimbiliya muyihasa kukukwasa kukwata yiyulo yipema ku mwono. Chikwo nawa muchikukwasa kunyingika makumbululo a yihula yilemu ya ku mwono, ngwe:

Ayi yili yikuma yimwe yize akukumbulula mu pande ja mbunga ku songo lia poso:

Mumu liaka Mbimbiliya yatamba kutusongwela?
Kulihi mutuhasa kuwana ukwaso ha mashimbu a lamba?
Yika Wanangana wa Zambi unalingi hali yetu musono?

“Tangwa limwe umwe longi-ni-mukwetu yeza ha kukunguluka. Yatwama hamuwika ni usoko wami, mba yitumwaha mikanda yetu hanga akawileho kukunguluka. Hanyima, yangulweza ngwenyi kazanga chinji makumbululo waze atu ahana ha kukunguluka. Yamba nawa ngwenyi, mu yingeleja yenyi kumwatwamine mikanda ya kulilongesa nayo ngwe ya yetu.”—Brenda

Unachinyingika nyi? Mu Mazuwo a Wanangana keshi kwitamo mbongo.

Atu ha kukunguluka makutakamisa. Mbimbiliya yakwamba ngwo, chuma chimwe chize akwa-Kristu akulikungulwila chili kulitakamisa ‘umwe ni mukwo.’ (A-Hepreu 10:24, 25) Chili kuyuka chinene kupwa hamwe ni atu waze akusa upale wa Zambi ni wa akwo kulutwe mu chifuchi chino chipi.

“Kusongo lia tangwa munguhasa kuhonga chinji, alioze kupwa hamwe ni mandumbu ku Zuwo lia Wanangana chakungukwasa kulivwa kanawa. Muze nakufuna ku zuwo nakuwahilila ni kupwa ni tachi ja kukumba tangwa likwo.”—Elisa.

Unachinyingika nyi? Kwatwama unji wa yikungulwila ya Yela ja Yehova kuhiana 120,000, waze akulikungulwila mu unji wa Mazuwo a Wanangana kuhiana 60,000, hashi heswe. Hita mwaka kakutunga unji wa Mazuwo a Wanaganga 1,500 hanga atu alikungulwilemo.a

Yize akweze akwo akwamba

“Muze te nguchili ku shikola, umwe longi-ni-mukwetu yaya ni kukunguluka ni yami. Iye kakomokene chinji ha kumona atu a miaka yalisa kanalilongesa Mbimbiliya hamuwika. Matangwa wanoene mwata wami wa ku milimo neye kanakaya ha chimwe kukunguluka, kanakazanga chinji kumona chize atu akuzachisa Mbimbiliya. Muze namwene chize iye azangile kukunguluka, yichingukwasa chinji ni yami kuzanga kukunguluka!”—Jessica.

“Kuli yami kukunguluka chakungukwasa kukumba yipikalo ni kusakalala. Twakulilongesa chize mutuhasa kupwa ni uwahililo wamwenemwene, kupwa atu apema ni yuma yikwo. Matangwa eswe muze ngunakatuka ku Zuwo lia Wanangana nakuwahilila.”—Timothy.

“Umwe lunga nasanyikine eze ha kukunguluka yamba mgwenyi: ‘Yami neza wika hanga ngupwe ni shindakenyo ngwami yuma yize nwakufuliela yili ya mahuza. Alioze namona ngwami kuma nyonga liami lie kulialitele!’ Iye kakomokene chinji ha kumona zango lia Yela ja Yehova. Yamba ngwenyi: ‘Haliapwila twalinyingika, alioze zango lize nwangusolwela, kafa chili ngwe twalinyingikine kulu!’”—Jacob.

“Kwapwile mashimbu amwe te nakunyonga ngwami: ‘Muze kukunguluka muchihwa mungutuhuka ni kawashi.’ Alioze shimbu nguchili ha kukunguluka, manyonga jacho mapatwoka. Muze kukunguluka muchihwa, munguputuka kuhanjika ni atu anji ni kuvulama ngwami nazanganga kuya kwami. Nyi chishi kupwa ha kukunguluka, kachi chishi ni masepa apema.”—Madison.

a Pola ha chikuma “Kukunguluka,” hanga uwane Zuwo lia Wanangana lize lili hakamwihi ni kuze watwama, hanyima pola nawa ha chikuma “Fupa Chihela Chili Hakamwihi.”