Umwe mukweze wa pwo kanalulieka kutanga chenyi cha Mbimbiliya ha kuzachisa linha do tempo, jw.org, ni mapa yize mwene afunjeka

YIZE AKWEZE AKUHULA

Kuchi Mbimbiliya Muyihasa Kungukwasa?—Chihanda 2: Livwise Kuwaha ha Kutanga Mbimbiliya

Umwe mukweze avuluka ngwo Will yamba ngwenyi: “Kutanga Mbimbiliya muchihasa kutuvwisa uswelele. Alioze chino chakulingiwa wika nyi kuwanyingikine chize muyitanga.”

Shina unazange kunyingika yize watamba kulinga mba ulivwise kuwaha ha kutanga Mbimbiliya? Mutwe uno muuhasa kukukwasa.

Linjise mu sango jize unatange

Linjise mu sango jize unatange. Eseka kulinga chino:

Sakula lusango yoze unazange kulilongesa. Muhasa kusakula umwe lusango wa mu Mbimbiliya hanji Evanjelu. Muhasa nawa kupanjika yiheho ya mu Mbimbiliya ya maliji wika yize yili ha site jw.org.
Tanga sango. Muhasa kutanga ukawe hanji hamuwika ni asoko je chipwe ni masepa je. Mutu umwe mahasa kupwa mukwa-kuta-lusango, akwo mahasa kupwa atu waze anatongola mu lusango wacho.
Eseka kukaula ukwaso uno:
- Funjeka yuma yize unalilongesa hanga usolole lusango yoze unatange kulita ni chize alingiwile. Soneka yimwe yize muyisolola yuma yize yinalingiwa ha lusango yoze unatange.
- Funjika yimwe gráfico. Chakutalilaho, muze unatange hakutwala kuli umwe mutu washishika, solola chize yitanga ni yilinga yenyi yinalite ni yiwape yize atambwile.
- Alumuna lusango yoze unatange hanga apwe ngwe yihujola. Muze unatange nyonga ha lusango wacho kulita ni hita mutu yoze anatongola mu lusango wacho. “Yihujola” atu waze unatange no lusango wacho.
- Nyi umwe mutu kakwachile chiyulo chipi, nyonga ha chize yuma yapwile ku mwono wenyi hamukunda wa chiyulo chacho. Chakutalilaho, achinyonga hali Petulu muze alikalile Yesu. (Marku 14:66-72) Yika Petulu atambile kulinga muze apwile mu cheseko?
- Nyi muzanga, muhasa kusoneka lusango we kulita ni umwe lusango wa Mbimbiliya. Muhasa kuwezaho nawa yuma yize walilongesa ha sango ja Mbimbiliya.—A-Roma 15:4.
  
  Muhasa kulinjisa mu lusango yoze unatange!

Hengwola!

Nyi muhengwola kanawa umwe lusango, muhasa kuwana kakanga mulemu. Kanji-kanji, muze unatange umwe lusango, liji limuwika hanji maliji aali maahasa kukukwasa kunyingika yuma yinji.

Chakutalilaho, tesa Mateu 28:7 ni Marku 16:7.

Mumu liaka Marku awezelele nyonga lia kwamba ngwo, Yesu te masoloka kuli tumbaji twenyi ni “Petulu”?
Yize muhasa kulinga: Muze yuma yacho yalingiwile, Marku te keshiho. Chinasoloka ngwe, Petulu mwe wamulwezele sango jacho.
Kakanga yoze twawana: Yesu kazangile kumona Petulu cheka nawa. Shina chino chavwishile Petulu kuwaha? (Marku 14:66-72) Kuchi Yesu asolwele ngwenyi kali sepa mupema wa Petulu? Kuchi mutuhasa kwimbulula Yesu ni kupwa sepa mupema?

Nyi wasa mwono ha sango jize unatange ni kuhengwola, mwivwa kuwaha chinji muze unatange Mbimbiliya.

Yize masepa je akwamba

“Mashimbu amwe, nakutanga ni kulilongesa umwe kapitulu ndo muze mungupwa ni ulumbunwiso wa kapitulu wacho. Muze nakulinga chino, nakulilongesa chimwe chuma chaha ni kushishika ha yuma yikehe-yikehe. Hita tangwa muze nakutanga Mbimbiliya nakulilongesa chuma chaha.”—Bonnie.

“Nalilongesele mukanda wa Rute ni kuzachisa Watchtower Library hanga nguhengwole ni kupwa ni ulumbunwiso wa mukanda wacho. Muchipema nyi mandumbu akwo no mazachisa chikwata chino. Chino chinakangukwasa kumona chize chili chipema kutanga Mbimbiliya.”—Timothy.

“Chili chipema chinji kutanga Mbimbiliya mu chizavu. Hita mutu mu chizavu, mahasa kutanga mutu yoze anatongola mu lusango yoze tunatange. Nakuzanga nawa kupanjika maliji a kukopa wika waze ali ha site jw.org. Mumu maliji jacho kakukwasa chinji kulinjisa mu sango jacho!”—Isabel.