“Haliapwila Chishi Kuzanga Nawa Upupilo”

MASHIMBU JAMI AKUNYIMA

Nasemukinyine mu mbonge ya Calgary, mu chifuchi cha Canadá. Muze napwile kanuke, yisemi jami yalilakula kashika yami ni mama yituya ni kutwama ni akaka. O te kakutuzanga chinji, chikwo nawa, yami te nakuwahilila. Ngunewuluka kanawa mashimbu apema a mu wanuke wami.

Alioze, muze nakumbanyishine miaka shimbiali, mwono wami walumukine chinji. Mama yalimbata cheka ni tata, hachino yituya ni kutwama mu chifuchi cha estados unidos, mu mbonge ya Louis, Missouri. Kwakapalikile mashimbu anji ngunyingike ngwami, tata kali mutu mukalu. Ngwe chilweza, muze nahetele ku zuwo kukatuka ku shikola ha tangwa litangu, tata yanyingika ngwenyi alongi-ni-akwetu te kangusosomba, alioze te chalimikine no. Hachino, tata yapihilila chikolo chocho yangulamba chinji kuhiana chize alongi-ni-akwetu angulambile! Mumu lia chino, yinguputuka kulilamba ni twanuke akwo muze napwile ni miaka shimbiali.

Kupwa cha tata chatwalile mama kunenganyana chinji, kashika ayo te kakuzwela mashimbu anji. Muze nakumbanyishine miaka 11, yinguputuka kunwa walwa unji ni kushipa makanya asasu. Yinguzanga upupilo ni kulilamba ni akwetu mu matapalo. Muze nahwishile shikola, yinguzanga chinji upupilo.

Muze napwile ni miaka 18, yingunjila mu mulimo wa maswalale a mu Estados Unidos, fumbo lize anguhele mu chizavu chacho, liahianyishile upupilo wami mumu nalilongesele kushiha atu. Ha kupalika cha miaka yitano, yingwecha uswalale hanga ngulilongese psicologia, mumu nazangile kukalakala mu chipatulo chize akuvuluka ngwo FBI. Yinguputuka kulilongesa mu chifuchi cha Estados Unidos ni kununga kulilongesa mu Canadá.

Muze napwile ku shikola yinene, te chishi kujikijila nawa hali atu mumu ayo te kakusoloka ngwe kakulizanga wika ene, keshi ni kutalatala, chikwo nawa yuma yipi yize yakulingiwa hano hashi, yakusoloka ngwe kukushi yoze mahasa kuyilulieka. Kashika, te chishi kushimbwila nawa ngwami atu mahasa kupemesa hano hashi.

Yami chakapwile ni nyonga lialita hakutwala ku mwono, chocho yingupuka kunwa walwa unji ni kushipa makanya asasu, chikwo nawa, nanyongene chinji ha mbongo ni ha kulisumbakenya. Te nakuzanga chinji kuya ku yiwanyino ni kupwa ni mapwo eka ni eka. Yami te nakuzanga chinji kulilamba. Chikwo nawa, napwile ni nyonga liami hakutwala ku ululi ni kulitachika ni mutu mweswawo yoze te malinga yuma yipi kuli mukwo. Kwamba umwenemwene, yami hakehe hakehe, yingupwa ndungo wa upupilo.

CHIZE MBIMBILIYA YALUMWINE MWONO WAMI

Tangwa limwe, yami ni sepa liami, twashipile chinji makanya asasu ku zuwo liami ni kwalulieka hanga twatume ku chifuchi cheka ni kwalanjisa. Sepa liami kanguhulile nyi nakufuliela muli Zambi. Yingumukumbulula ngwami: “Nyi ngwe Zambi mwe wakuneha lamba, chamuzangile!” Ha tangwa litangu ku milimo, umwe mutu mukwa-mulimo ni mukwetu Chela cha Yehova, yanguhula ngwenyi” : “Ku nyonga lie, shina Zambi mwe wakuneha lamba? Chihula chino nachizangile chinji. Ha tukweji asambano kulutwe, yinguputuka kumuhula yihula yinji. Iye kangusolwele makumbululo a mu Mbimbiliya hakutwala ku mwono.

Ha mashimbu jacho, pwo yoze te ngunazange kumbata, te kazangile kunyingika yize ngunalilongesa. Tangwa limwe, namulwezele ngwami, nasanyika amwe Yela ja Yehova hanga atulongese Mbimbiliya. Ha tangwa likwo muze nafunyine ku zuwo, yingumona ngwami iye kanguchina. Yami natuhukile haze ni kulila. Nechile Yehova mu yilemba hanga angukwase. Chino chapwile chisuho chitangu kuzachisa jina lia Zambi, Yehova.—Samu 83:18.

Ha kupalika cha matangwa atatu, yinguputuka longeso liami lia Mbimbiliya ni amwe Yela ja Yehova waze alimbata. Muze ayo akatukile, yami yingununga kutanga mukanda Poderá Viver Para Sempre no Paraíso na Terra ni kuuhwisa ufuku uzewene.a Yize nalilongesele hakutwala kuli Yehova ni mwanenyi Yesu Kristu, yangukwachile ku mbunge. Namwene ngwami, Yehova kali Zambi ya zango, chikwo nawa, iye kakwivwa yinyengo muze twakumona lamba. (Izaia 63:9) Chuma chize changukwachile chinji ku mbunge chili, zango lia Zambi hali yami ni kulihana cha Yesu hanga atufwile. (1 Yoano 4:10) Yingunyingika ngwami, Yehova kangusolwele uhomboloji mumu iye “kazangile niumwe kutoka, alioze eswe alikonyeke.” (2 Petulu 3:9) Nalivwile ngwami, Yehova te kanangukoka.—Yoano 6:44.

Ha poso yizeyene, yinguputuka kuya ni kukunguluka. Napwile ni kambu jisuku, te nakusa yingeliengelie ku matwi, chikwo nawa, atu te kakunguvwila woma mumu lia chize te nakusoloka. Chipwe chocho, Yela ja Yehova te kakungusolwela zango ngwe nguli mu usoko wo. Ayo kasolwele ngwo kali Akwa-Kristu amwenemwene. Nalivwile ngwe nafunyine mu zuwo lia akaka, alioze mu chihela chipema.

Ha shimbu likehe wika, yuma yize napwile ni kulilongesa mu Mbimbiliya, yiputuka kwalumuna mwono wami. Kashika, yinguteta kambu jami, yingwecha kulinga yuma yaluchisa ni kunwa makanya asasu ni walwa. (1 A-Korindu 6:9, 10; 11:14) Nazangile kuvwisa Zambi kuwaha. Kashika, muze nalilongesele ngwami Zambi keshi kuzanga yimwe yuma yize napwile ni kulinga, yingwecha kuyilinga. Te nakulihanjikisa ngwami, ‘kunguchi kununga ni mwono wa mutapu awu.’ Kashika, yingwalumuna yitanga ni kunyonga chami. Chocho yinguzuka yiwape ya kulinga yuma ngwe chize yehova akuzanga. Ha 29 ya Julho, 1989—ha kupalika wika tukweji asambano, chize muze naputukile kulilongesa Mbimbiliya—kangupapachishile ngwe Chela cha Yehova.

KUYUKA CHIZE NAWANA

Mbimbiliya yangukwashile kwalumuna mwono wami. Ha mashimbu akunyima, te nakuzanga chinji kulilamba muze atu akunguvwisa uli. Alioze, haliapwila nakusa tachi hanga ngupwe ni “sambukila ni atu eswe.” (A-Roma 12:18) Ngunanyingika ngwami, chalumukine ku tachi jami, alioze Yehova mwe wangukwashile ni liji lienyi ni spiritu yenyi yisandu.—A-Ngalashia 5:22, 23; A-Hepreu 4:12.

Shimbu ngupwe nawa ndungo wa makanya asasu, upupilo ni kulinga yuma ya luchisa, haliapwila nakusa tachi hanga nguhalise Yehova ni kulihana chinji mu mulimo wenyi. Chino chinachingi kukwasa atu akwo kumunyingika kanawa. Hanyima lia kungupapachisa, nalukile ku chifuchi chikwo hanga ngukwase kuze kunafupiwa chinji akwa-kwambujola. Hakupalika cha miaka, napwa ni uwahililo wa kulongesa atu anji ni kumona chize Mbimbiliya yakwakwasa ku mwono wo. Nakuwahilila nawa, mumu mama neye hapwa Chela cha Yehova. Chuma chamukwashile chili kumona chize yami nalumwine mwono wami.

Ha mwaka 1999, yinguhwisa shikola yize musono akusanyika ngwo, shikola ya akwa-kwambujola Wanagana wa Zambi mu mbonge ya El Salvador. Shikola yino, yanguhele fumbo hanga ngulinge mulimo wa kwambujola, kulongesa ni kutakamisa mandumbu mu chikungulwila. Ha mwaka uzewene, yingulimbata ni mukwetu-pwo Eugenia. Twakalakalile ngwe akwa-kwambujola a shimbu lieswe mu Guatemala.

Haliapwila, shimbu ngupihilile ni mwono, yami nakuwahilila chinji. Kukaula yize Mbimbiliya yakwamba, changukwashile kwehuka utanji ni upupilo ni kungwaha mwono uze unazale too ni zango hamwe ni sambukila.