Mumu Liaka Yesu Akumuvuluka Ngwo Mwana wa Zambi?

Kumbululo lia mu Mbimbiliya

Mbimbiliya kanji-kanji yakuvuluka Yesu ngwo ‘Mwana wa Zambi.’ (Yoano 1:49; Usolwelo 4:11) Maliji “Mwana wa Zambi” kakusolola ngwo Zambi iye Sakatanga hanji ngwetu Chishina cha mwono weswe. Chino chinatale nawa ha mwono wa Yesu.

Mbimbiliya yakuvuluka nawa angelo ngwo, “ana a Zambi.” (Yombi 1:6) Chikwo nawa, Mbimbiliya yakuvuluka Alama ngwo, kapwile ‘mwana wa Zambi.’ (Luka 3:38) Yesu kapwile chitangiwa chitangu chize Zambi atangile shimbu te uchili ukawenyi. Mbimbiliya yakusolola Yesu ngwe Mwana mulemu wa Zambi.

• Shina Yesu kapwile mu malilu shimbu te kanda achisemuka hano hashi?

• Yika Yesu apwile ni kulinga shimbu te kanda achiza hashi?

Shina Yesu kapwile mu malilu shimbu te kanda achisemuka hano hashi?

Ewa. Yesu kapwile chitangiwa cha ku spiritu mu malilu shimbu te kanda achiza hano hashi. Yesu mwene kambile ngwenyi: “nakatukile mwilu.”—Yoano 6:38; 8:23.

Zambi kaliangile kutanga Yesu shimbu te kanda atanga chuma cheswacho. Mbimbiliya yinambe hakutwala kuli Yesu ngwo:

• “Mwenawo . . ., mwe swana wa yuma yeswe atangile.”—A-Kolosu 1:15.

• Iye “we uputukilo wa kutanga cha Zambi.”—Usolwelo 3:14.

Yesu kamanunwine uprofeto wakwamba ngwo, “Chikota chenyi cha ku miaka, kwe ku miakulwila”—Mika 5:2; Mateu 2:4-6.

Yika Yesu apwile ni kulinga shimbu te kanda achiza hashi?

Iye kapwile ni wata unji mu malilu. Yesu kahanjikile ha chiteli chacho muze alembele ngwenyi: “Haliapwila nguchichimieke Tata . . . ni uhenya uze napwile nawo hamwe ni yena, muze te hashi kanda hapwa.”—Yoano 17:5.

Iye kakwashile Tato kutanga yuma yikwo yeswe. Yesu kakalakalile hamwe ni Tato ngwe “chilangaji.” (Yishima 8:30) Mbimbiliya yinahanjika hali Yesu ngwo: “Muli iye yuma yeswe yatangiwile, mu malilu ni hano hashi.”—A-Kolosu 1:16.

Yehova kazachishile Yesu hanga atange yuma yikwo yeswe. Kutanga chacho chinatale nawa hali angelo, malilu ni hashi. (Usolwelo 5:11) Mutuhasa kwamba ngwetu, Yehova kakalakalile ni Yesu ngwe chize mukwa-kufunjeka mazuwo akukalakala ni mukwa-kutunga. Mukwa-kufunjeka kakufunjika mba mukwa-kutunga makaula yize yili ya kufunjika.

Iye kapwile mwe Liji. Mbimbiliya yakuvuluka Yesu shimbu te kanda achiza hano hashi ngwo: “Mwe Liji.” (Yoano 1:1) Kota chino chinalumbunuka ngwo, Zambi kazachile Mwanenyi hanga ambujole sango ni usongwelo Wenyi ku yitangiwa yikwo ya ku spiritu.

Yesu kota kakalakalile nawa ngwe mukwa-kwambujola sango ja Zambi kuli atu hano hashi. Muze Yehova ahanyine usongwelo kuli Alama ni Eva mu munda wa Endene, kota kahanjikile no kupalikila muli Yesu, Mwe Liji. (Uputukilo 2:16, 17) Yesu nawa kota mwe wasongwelele A-Izalele mu puya ni kwalweza yuma yize atamba kwononokena.—Kutuhuka 23:20-23.a