Shina Usolo wa Upite Chikota cha Yipi Yeswe?

Kumbululo lia mu Mbimbiliya

Ka. Mbimbiliya kuyishi kwamba ngwo mbongo jili chuma chipi, chipwe kujisolola ngwe chuma chize chakukoka yuma yeswe yipi. Atu amwe kakwamba ngwo, “mbongo che chishina cha yuma yeswe yipi.” Alioze, Mbimbiliya kuyishi kulongesa chocho. Kwamba pundu Mbimbiliya yakwamba ngwo “usolo wa upite chikota cha yipi yeswe.”a—1 Timoteu 6:10.

• Yika Mbimbiliya yakwamba hakutwala ku mbongo?

• Mumu liaka Mbimbiliya yakutukanyamisa kuzanga mbongo?

• Mumu liaka chili chipema kukaula yiyulo ya mu Mbimbiliya hakutwala ku mbongo?

• Yisoneko ya mu Mbimbiliya yize yakuhanjika hakutwala ku mbongo

Yika Mbimbiliya yakwamba hakutwala ku mbongo?

Mbimbiliya yakwamba ngwo, mbongo nyi mujipwa kuzachisa kanawa, jakukwasa. Yakwamba nawa ngwo, “mbongo kujakutufunga.” (Chilumbununyi 7:12) Chikwo nawa, Mbimbiliya yakuchichimieka atu waze apwa yihanyi, chino chinatale nawa ha kuhana mbongo.—Yishima 11:25.

Alioze, Mbimbiliya yakututoweza hanga tuchine kupwisa mbongo ngwe chuma chilemu ku mwono wetu. Yinambe ngwo: “Ndako jenu jikapwe kujishi kufwila cha mbongo; pwenu akwa kuyuka ni yuma yize nuli nayo.” (A-Hepreu 13:5) Yika twalilongesa? Twatamba kusa mbongo ha chihela chajo, kutwambile kwecha hanga mbongo jisongwele mwono wetu.—1 Timoteu 6:8.

Mumu liaka Mbimbiliya yakutukanyamisa kuzanga mbongo?

Atu waze akwete kuzo kechi kazuka mwono wa mutolo. (A-Efwesu 5:5) Chitangu, mumu kuzo yapwa ngwe kukombelela mahamba hanji ngwetu uwayilo wa mahuza. (A-Kolosu 3:5) Chamuchiali, kanji-kanji atu waze akwete kuzo kakulinga yuma yinji yipi hanga azuke yize anazange. Mukanda wa Yishima 28:20 unambe ngwo: “Yoze malipupwisa kupwa pichi kechi kasamba.” Mutu yoze wakuzanga chinji mbongo mahasa kulinga yuma yipi ngwe kalimbalimba, kuhanjika mahuza, kushiha mutu, kwiya hanji kwonga akwo.

Chipwe ngwe kuzanga mbongo kuchalingishile mutu kulinga yuma yipi, nihindu muchihasa kuneha lamba likwo. Mbimbiliya yakwamba ngwo, “Waze mazanga kupwa pichi, malimbuka mu cheseko, ni mu muheto, ni mu usolo wunji wa kuhulamisa ni wa kulemeka, uze kuwakushimbamisa atu mu kwenyeka ni mu kwonona.”—1 Timoteu 6:9.

Mumu liaka chili chipema kukaula yiyulo ya mu Mbimbiliya hakutwala ku mbongo?

Nyi kutwalingile yuma yize tunanyingika ngwo yili yipi ni yize yakulimika ni shimbi ja Zambi hanga tuzuke mbongo, mutuvwisa Zambi kuwaha. Kuli waze anazange kuvwisa Zambi kuwaha, Yehova kanalakenya ngwenyi “Chichi kukuhichika nichimwe, chipwe kukwehuka, ka.” (A-Hepreu 13:5, 6) Zambi kanalakenya nawa ngwenyi, “Mukwa jika mapwa ni yiwape ya kulumbama.”—Yishima 28:20.