Kululieka Mazuwo Jetu a Wanangana

Nicole, ndumbu wa pwo yoze watwama ku Colômbia, yamba ngwenyi: “Nakuzanga chinji Zuwo lietu lia Wanangana! Chili chihela chize munguhasa kupwa hamwe ni usoko wami wa ku ufulielo.” Shina ni yena che wakulivwa?

Hashi heswe, Yela ja Yehova kakulikungulwila mu mazuwo a Wanangana 63,000. Mazuwo jacho kapwa yihela yipema, yize twakulikungulwila tuwayile Zambi. Alioze hi yino wika ko. David, umwe pionelu wa shimbu lieswe yoze watwama ku Colômbia yamba ngwenyi: “Zuwo lietu lia Wanangana liakupemesa malongeso jetu. Atu eswe waze akwiza ku kukunguluka ha chisuho chitangu, kakukomoka chinji ha kumona chize twakufunga kanawa Zuwo lietu lia Wanangana.” Chino kuchishi kulingiwa chamulingiwila. Twakukalakala chinji tukombe ni kululieka zuwo lietu lia Wanangana. Kuchi mulimo wacho wakulingiwa?

Kuchi mulimo wacho Akuululieka?

Yikungulwila yize yakulikungulula mu limwe Zuwo lia Wanangana, ye yikwete chiteli cha kulifunga. Hachino, mandumbu jetu a malunga ni a mapwo kakukomba mashimbu eswe Zuwo lia Wanangana. Ayo nawa kakululieka yize yakupiha.

Mba akwase yikungulwila kufunga mazuwo jo a Wanangana, Chipatulo cha (LDC) chakutongola mandumbu waze akulongesa chize mulimo wacho akuulinga. Hita longeshi, kakuta-tala Mazuwo a Wanangana asambano hanji kumi. Iye kakumeneka akwa-kwambujola mu yikungulwila ni kwafumba chize mahasa kufunga Mazuwo jo a Wanangana. Ha kupalika cha miaka yitatu, iye kakuhengwola hita Zuwo lia Wanangana hanga amone yize yinapiha hanji yize mahasa kululieka.

Mandumbu jetu a malunga ni a mapwo, kakuzanga chinji fumbo lize akutambula. Indhumathi, ndumbu wa pwo yoze watwama mu India, yamba ngwenyi: “Fumbo twatambula liapwa lipema chinji. Chapwa chiwape kulilongesa kululieka ni kufunga Zuwo lietu lia Wanangana.” Evans, umwe ndumbu wa mu Kenya, yamba ngwenyi: “Twalilongesa kufunga mbongo ha kululieka yuma yikehe-yikehe shimbu kanda yipiha chinji.”

Kuze Kwakukatuka Mbongo

Kululieka ni kufunga Zuwo lia Wanangana ha mwaka, muchihasa kufwika makulakaji hanji tununu a ndolarea kulita ni kuze alitungilile, mashimbu waze lialinga ni unji wa yikungulwila yize yakulikungulwilamo. Kulihi mbongo jacho jakukatuka?

Kululieka Mazuwo a Wanangana chakulingiwa ni milambu yize twakuhana. Alexander, umwe ndumbu watwama ku Cazaquistão, kanalumbununa ngwenyi: “Chihanda chimwe cha mbongo jacho kakufweta najo Internet, meya ni kahia kazembwe. Chihanda chikwo, kakulanda najo yuma yikwo ngwe, tinta, mapapilo a mu kumba ni yuma ya kukusumuna ni kukomba nayo.” Milambu yetu yikwo, kakuyihana hanga alinge milimo hashi heswe ya kukwasa kululieka yihela yinene yinene yize yakufwika mbongo jinji.

Kululieka Yihela Yinene Yinene

Nyi kululieka limwe Zuwo lia Wanangana muchimbata tukweji aali hanji atatu, makulwana a mu chikungulwila kakuhanjika ni longeshi wa ku LDC. Nyi LDC yatayiza, mulimo wacho kanji-kanji kakuulinga ni milambu yize akuhana hanga yikwase mulimo hashi heswe. Ha mwaka wa mulimo wa 2023, kaluliekanga Mazuwo a Wanangana 8,793, waze afwikile 76.6 tununu a tununu a ndolare. Tutalenu yimwe ya ku milimo yacho yiali.

Mu Angola, limwe Zuwo lia Wanangana lize te hilialinga miaka 15, yilipiha chinji. Yikalakala te hiyapwa ni miaji, ngoji ja kahia kazembwe te hijapiha, nawa enyembo te haputuka kulinyenyeta ngwo meya a ku fulumba te kakunjila mu mazuwo jo. Mandumbu a ku LDC yalulieka yuma hanga ahwise kapinda wacho. Mulimo wacho wafwikile mbongo 9,285 a ndolare. Enyembo yasakwilila ni kukomoka chinji ha chize mulimo wacho aulingile.

Mu Polônia, limwe Zuwo lia Wanangana te liakuhita, chocho tapete yiyipihia chinji. LDC yiyitayiza hanga alulieke fulumba ni kusa tapete yeka. Mulimo wacho wafwikile ndolare 9,757. Mumu lia chino, mukupalika miaka yinji mba akalulieke nawa Zuwo lia Wanangana liacho.

Kululieka Mazuwo a Wanangana chakuhalisa Yehova

Kululieka Mazuwo a Wanangana chishi kutukwasa wika kufunga milambu, alioze, chakuhalisa nawa Yehova. Shaun, umwe ndumbu watwama mu Tonga, yamba ngwenyi: “Mumu lia mulimo wetu wa kululieka Mazuwo a Wanangana, twakuwayila Yehova mu yihela yipema, yakululieka kanawa, yize yakuhalisa jina lia Zambi kuze twatwama. Kutushi kwivwa sonyi ja kusanyika atu hanga aye ku Zuwo lia Wanangana.”

Kuchi Muhasa Kukwasa?

Yetu eswe mutuhasa kukwasa kululieka ni kufunga yihela yetu ya uwayilo. Marino, wa mu Austrália, yoze wakufumba akwa-kululieka Mazuwo a Wanangana yamba ngwenyi: “Yetu eswe mutuhasa kulihana hanga tululieke Zuwo lietu lia Wanangana. Muze twakuchilinga, twakukwasa ha kufunga cha mbongo ni kuhana uhashi hanga ajikalakalise kuze kunafupiwa.”

Ndumbu Joel, yoze watwama mu India, kakuwahilila chinji muze akululieka Zuwo lio lia Wanangana. Yamba ngwenyi: “Kukalakala hamwe ni mandumbu jami, chakungukwasa kumona chize mwono muukapwa mu chifuchi chaha.” Nicole, yoze twatongola helu, yamba nawa ngwenyi: “Ha shimbu linoliene, nakwasanga kukusumuna meya muze mandumbu te analulieka mulonda mu kumba. Chipwe ngwe hi yami ko naluliekanga mulonda wacho, nihindu nakwasanga hanga kuhone kulingiwa ponde.”

Nyi unazange kulihana hanga ukwase kululieka Zuwo lia Wanangana, hanjika ni makulwana a mu chikungulwila. Chikwo nawa, muhasa kukwasa mulimo wa kululieka Zuwo lienu lia Wanangana hanji Mazuwo akwo a Wanangana hashi heswe, kupalikila mu milambu. Muhasa kuhana milambu yacho kupalikila mu mishete yili mu Zuwo lienu lia Wanangana hanji ha site donate.jw.org. Tunasakwila chinji ha milambu yize nwakuhana.