Yika mutuhasa kulinga mba tupwe ni hamu? Yisemi jetu mahasa kutukolweza hanga tupwe ni hamu. Alioze chitanga chino, ana keshi kuchihinga kuli yisemi jo. Kupwa ni hamu chili ngwe kulilongesa utotombo waha. Mutapu wa kulilongesamo utotombo wacho, uli kutala kanawa atu waze ali nawo ni kwimbulula chilweza cho. Chizechene nawa, mutuhasa kulilongesa kupwa ni hamu, ha kutala kanawa waze akusolola hamu ni kwimbulula yiilweza yo. Chizechene ngwe Daniele, tunafupu kunyingika kanawa Liji lia Zambi. Tunafupiwa kupwa ni usepa upema ni Yehova ni kulemba kuli iye mashimbu eswe. Chikwo nawa, tunafupiwa kujikijila muli Yehova ni mbunge yeswe ni kupwa ni shindakenyo ngwetu, matukwasa. Hachino, nyi ufulielo wetu muupwa mu cheseko mutuhasa kusolola hamu. Atu waze akwete hamu, kanji-kanji kakwavumbika kuli akwo. Chochene, kuli yuma yinji yize muyitukwasa kupwa ni hamu. w23.08 4-5 ¶8-9

Liji lia Ngregu analumbununa hano ngwo ‘kusa shindakenyo,’ kakulizachisa hanga eseke oru ni prata atale nyi yili lume yamwenemwene. Kashika, twatamba kusa shindakenyo nyi yize twakutanga ni kwivwa yili lume yamwenemwene. Yino yili ni ulemu unji kuli yetu muze songo lia hano hashi linayi ni kukundama. Shimbu tutayize yuma yeswe yize atu akwamba, twatamba kuzachisa uhashi wetu wa kunyonga hanga tutese yize twakwivwa hanji twakutanga ni yize Mbimbiliya ni ululikiso wa Yehova yakulongesa. Nyi twachilinga, kechi katupiangula ku milolo ya mahuza ya andemoniu. (Yishi. 14:15; 1 Timo. 4:1) Tunanyingika ngwetu ngwe chizavu, tuvumbi twa Yehova makalilamwina ku luyinda munene. Alioze, kutwanyingikine yize muyikalingiwa kuli hita umwe wa kuli yetu. (Tia. 4:14) Chipwe ngwe mutukapwa ni mwono ha luyinda munene, hanji makatuwana hitwafwa, nyi mutununga ni kushishika Yehova makatuwahisa ni mwono wa mutolo. Kashika, twatamba kulihulikila ha kutalatala chetu chipema, ni kulilulieka hakutwala ku tangwa lia Yehova! w23.06 13 ¶15-16

Yetu kutwanyingikine chize uprofeto umwe wa mu Mbimbiliya mukamanunuka. (Danie. 12:8, 9) Kashika, nyi kutushi kunyingika pundu chize uprofeto umwe muukamanunuka, chino kuchalumbunukine ngwo uprofeto wacho kuuchi kamanunuka. Tuli ni shindakenyo ngwetu, ha shimbu lialita Yehova matukwasa kunyingika yize tunazange ngwe chize alingile kunyima. Mutambi wa “sambukila ni kutwama kawape” makautwa pundu. (1 Tesa. 5:3) Hanyima lia mutambi uno, manguvulu a hashi heswe makalimika ni uwayilo wa mahuza ni kuunongesa. (Uso. 17:16, 17) Mba hi malukukila tuvumbi twa Zambi. (Eze. 38:18, 19) Yuma yino yeswe muyikatutwala ndo ku jita ya Armagedone. (Uso. 16:14, 16) Mutuhasa kupwa ni shindakenyo ngwetu, kwasala hakehe yuma yino yeswe muyimanunuka. Alioze, shimbu kanda yichimanunuka, tunungenu ni kusolola usakwililo wetu hali Yehova, ha kulilongesa kanawa uprofeto wa mu Mbimbiliya ni kukwasa atu akwo hanga no achilinge. w23.08 13 ¶19-20