Yetu tuli ni yuma yinji yize muyihasa kututwala hanga tusakwilile Yehova kupalikila mu yilemba yetu. Mutuhasa kusakwilila Yehova ha yuma yeswe yipema yize tukwete; mumu chawana cheswe chingunu chinakatuka kuli iye. (Tia. 1:17) Chakutalilaho, mutuhasa kumusakwilila ha yuma yeswe yipema yize atangile. Mutuhasa kumulweza ngwetu, tunasakwilila chinji ha mwono uze watuhele, asoko, masepa ni kutalatala chetu cha kulutwe lia matangwa. Chochene, tunazange kusakwilila nawa Yehova ha uhashi uze atuhele wa kupwa masepa jenyi. Hanji mutufupiwa kusa tachi jinji mba tuhase kunyonga ha yuma tuli nayo yize yakututwala tusakwilile Yehova. Atu anji musono keshi kusakwilila. Ayo kakuzachisa mashimbu jo hanga afupe yuma yize anazange, shimbu asolole usakwililo wo ha yuma yize ali nayo. Nyi mutwimbulula yitanga ya mutapu au, yilemba yetu muyihasa kupwa wika ya kwita-ta yuma. Mba yino yihone kulingiwa, tunafupiwa kununga ni kusakwilila Yehova ha yuma yeswe yize akutulingila.—Luka 6:45. w23.05 4 ¶8-9

Yehova keshi kuzanga hanga tumone lamba. (Iza. 63:9) Alioze, keshi kukwika yuma yipi hanga yihone kulingiwa kuli yetu, yize mutuhasa kutesa ni ngiji ni milengi ya kahia. (Iza. 43:2) Chipwe chocho, iye kanatulakenya ngwenyi, nihindu matukwasa muze mutupalika mu yipikalo. Chikwo nawa, kechi kwecha hanga yipikalo yitunehene lamba lize ‘kulichi keza kahwa.’ Kuchizako yino, Yehova kakutwaha spiritu yisandu hanga yitukwase kunyongonona mu yuma yize mutupalika. (Luka 11:13; Fwili. 4:13) Kashika, mutuhasa kupwa ni shindakenyo ngwetu, nihindu mutupwa ni yeswe yize mutufupiwa hanga tunyongonone ha kulingila Yehova ni ushishiko. Yehova kanashimbwila hanga tujikijile muli iye. (Hepre. 11:6) Ha mashimbu amwe, yipikalo yetu muyihasa kusoloka ngwe yinji chinji kutuchi kuhasa kuyikumba. Hachino, mutuputuka kukakajana chipwe ha ukwaso wa Yehova. Alioze Mbimbiliya yakwamba ngwo, ndundo ja Zambi mujihasa kutukwasa “kutangunuka yipanga.” (Samu 18:29) Kashika, shimbu tuyambashane ha ukwaso wa Yehova, twatamba kulemba kuli iye ni ufulielo ni kushimbwila ngwetu, mapanjika yilemba yetu.—Tia. 1:6, 7. w23.11 22 ¶8-9

Mbimbiliya yakulumbununa zango liamwenemwene mu mutapu upema chinji. Maliji wano kanahane shindakenyo yipema kuli waze alimbata. Chochene, waze alimbata mahasa kulisolwela zango liamwenemwene umwe ni mukwo. Zango liamwenemwene lize liakununga ku miaka yeswe hakachi ka lunga ni pwo, linatale ha tachi jize ayo eswe aali masa. Chakutalilaho, achinyongenu ha jiko lia kahia. Kahia mukahasa kunungaho matangwa eswe, alioze mba kanunge watamba kuwezelaho kunyi. Nyi kuwaseleho kunyi, kahia kacho mukahasa kujima. Chizechene nawa, zango hakachi ka lunga ni pwo mulihasa kukola ku miaka yeswe, alioze mulinunga nyi ayo mafunga ulo wo. Ha mashimbu amwe, lunga ni pwo mahasa kulivwa ngwe zango lio linakeketela, chipi-chipi nyi kali ni kapinda hakutwala ku mbongo, misongo hanji kapinda wa kulela ana. Mba afunge ‘mulengi wa kahia ka Yehova,’ lunga ni pwo katamba kupwa ni usepa upema ni Yehova. w23.05 20-21 ¶1-3