Akwa-Kuyula
3 Mavungu waze Yehova ahichikile hanga eseke no A-Izalele eswe waze te kanda achasa jita mu Kanana kali wano 2 (chino kachilingile hanga ana ja A-Izalele anyingike kwasa jita): 3 Mianangana atano A-Filistea, A-Kanana eswe, A-Sendone, A-Hevwe waze te atwama ku milundu ya Lebano, chize ku mulundu wa Mbale-Hermone ndo ku Lebo-Hamate. 4 Mianangana jacho e esekele no A-Izalele hanga Yehova te amone nyi ayo mononokena shimbi jize ahanyine kuli yisemi jo kupalikila muli Mose nyi ka. 5 A-Izalele te katwama ni A-Kanana, A-Hete, A-Amore, A-Perize, A-Hevwe ni A-Yepushe. 6 A-Izalele yaputuka kumbata ana-mapwo yilambala ni kuhana ana jo a mapwo hanga aambate kuli yilambala. Ayo yaputuka kuwayila tuzambi jo.
7 Chocho, A-Izalele yalinga yuma yipi kumeso ja Yehova, yavulama Yehova Zambi yo, yaputuka kuwayila Ambale ni manguji asandu.* 8 Kashika, utenu wa Yehova yiwiza hali A-Izalele, iye yaakunjika ku moko ja Kushane-Rishataime, mwanangana wa Mesopotamia. A-Izalele yakalakalila Kushane-Rishataime ha miaka nake. 9 Muze A-Izalele atetele kuli Yehova hanga aakwase, Yehova yatuma umwe chilamwina hanga apulule A-Izalele, chilamwina wacho kapwile Oteniele, mwana wa Kenaze, mwana-kwo ya Kalemba. 10 Mba spiritu ya Yehova yiyiza hali iye, yapwa mukwa-kuyula mu Izalele. Muze ayile mu jita, Yehova yakunjika Kushane-Rishataime, mwanangana wa Mesopotamia mu moko jenyi, chocho iye yakumba Kushane-Rishataime. 11 Chocho chifuchi yichipwa ni uhwimino ha miaka 40. Oteniele mwana wa Kenaze yafwa.
12 Cheka nawa, A-Izalele yaputuka kulinga yuma yipi kumeso ja Yehova. Mba Yehova yecha hanga Eglone mwanangana wa Moape apwe ni tachi jinji kuhiana A-Izalele, mumu ayo te kakulinga yuma yipi kumeso ja Yehova. 13 Chikwo nawa, Eglone yalichinga ni A-Amone ni A-Amaleke. Ayo yasa jita ni A-Izalele, yatambula mambonge a mingaji. 14 A-Izalele kanakakalakalila Eglone, mwanangana wa Moape ha miaka 18. 15 A-Izalele yateta kuli Yehova hanga aakwase, chocho Yehova yatuma umwe chilamwina. Chilamwina wacho kapwile Ehude, mwana wa Ngera, Ka-Mbenjamine, mukwa-chipipa. Hakupalika cha mashimbu, A-Izalele yamutuma hanga atwale mulambu kuli Eglone, mwanangana wa Moape. 16 Ehude yafula mukwale wa mbandu yimuwika, yaujichika ha shina lia kulu lienyi lia utata muchima lia mazalo jenyi. 17 Chocho iye yahana mulambu kuli Eglone, mwanangana wa Moape. Eglone te kakwete mujimba unene chinji.
18 Muze te hahana mulambu, Ehude yaya kwenyi hamwe ni malunga waze ambachile mulambu wacho. 19 Alioze, muze ahetele haze hapwile tuponya a kusonga ku Ngilingali, iye yafuna, yamba ngwenyi: “Nanehena mwanangana lusango.” Chocho mwanangana yamba ngwenyi: “Hola!” Hazehene, tuvumbi jenyi eswe yatuhuka. 20 Ehude yakundama kuli mwanangana muze te anatwama ukawenyi mu chipatulo cha kwilu mu chihuhumuke. Mba Ehude yamba ngwenyi: “Nguli ni lusango wa Zambi yoze nanehena mwanangana.” Chocho, mwanangana yakatuka ha ngunja yenyi. 21 Chocho, Ehude yatomona mukwale uze wapwile ha shina lienyi lia kulu lia utata, yautuwa mu jimo lia mwanangana. 22 Chikundo yichinjila hamuwika ni mukwale, maji yafuka mukwale, mumu Ehude kakachijile mukwale mu jimo lienyi, yipi yiputuka kutuhuka. 23 Ehude yatuhukila mu mbalanda, yayika yajilo ya chipatulo cha helu. 24 Muze te haya, tuvumbi ja mwanangana yahiluka, yawana yajilo ya chipatulo yili ya kuyika. Yamba ngwo: “Kota mu kumba ali.” 25 Muze kwapalikile mashimbu anji, ayo yaputuka kulipikala. Muze amwene ngwo, mwanangana kanda achazulula yajilo ya chipatulo cha kwilu, yanda sapi yayazulula, yawana mwanangana wo hashi, hafwa!
26 Muze ayo te analaluka, Ehude yachina. Yapalikila muma muze mwapwile tuponya akwola, yaheta ndo ku Saira. 27 Muze ahetele, yemba chitavwi ku chifuchi cha ku milundu cha Eframe. A-Izalele yapalumuka ku chifuchi cha milundu, iye te kulutwe lio ali. 28 Chocho iye yaalweza ngwenyi: “Ngukaulenu, mumu Yehova hakunjika mu moko jenu akwa-kole jenu, A-Moape.” Chocho ayo yamukaula, yamana ha yau ya Yordau hanga A-Moape achine kupalika, kakechele mutu niumwe hanga azauke. 29 Ha shimbu liacho, ayo yashiha A-Moape 10,000, malunga eswe a tachi, yitakame. Kakechele mutu niumwe. 30 Chocho, ha tangwa liacho, A-Moape yaahana mu moko ja A-Izalele, mu chifuchi cheswe yimupwa sambukila ha miaka 80.
31 Kulutwe lia yino yuma, yikusoloka Shangare, mwana wa Anate yoze washihile A-Filistea 600 ni musongolwela wa kutembula nayo ngombe. Iye yapulwila nawa A-Izalele.