Akwa-Kuyula
1 Muze Yoshua te hafwa, A-Izalele yahula Yehova ngwo: “Iya wa kuli yetu makanduka chitangu hanga ase jita ni A-Kanana?” 2 Yehova yaakumbulula ngwenyi: “Munyachi wa Yunda we muukanduka. Munguhana chifuchi chino mu moko jo.” 3 Munyachi wa Yunda yiulweza munyachi wa Simeone ngwo: “Kanduka ni yetu mu chifuchi chize atwaha hanga twase jita ni A-Kanana. Mba mutuya ni yenu mu chifuchi chize anwaha.” Chocho A-Simeone yaya no.
4 Muze A-Yunda ayile ni kwasa jita, Yehova yakunjika A-Kanana ni A-Perize mu moko jo, ayo yashiha malunga 10,000 ku Mbezeke. 5 Ayo yawana Adonibezeke ku Mbezeke, kuzekwene yasa nenyi jita, yakumba A-Kanana ni A-Perize. 6 Muze Adonibezeke achinyine, ayo yamuzombwesa, yamukwata, yamuteta minwe ya shina ya ku moko ni ku molu. 7 Mba Adonibezeke yamba ngwenyi: “Mianangana 70 waze natetele minwe ya shina ya ku moko ni ku molu, kakutongona kulia mushi lia mesa yami. Yize nalingile kuli ayo, yenayo nawa Zambi alinga kuli yami.” Mba yamutwala ku Yerusaleme, yafwilako.
8 Malunga A-Yunda no yasa jita ni Yerusaleme, yayikumba. Yanongesa mbonge yacho ni katana ni kuyocha. 9 Mba malunga A-Yunda yapalumuka hanga ase jita ni A-Kanana waze te atwama mu chifuchi cha ku milundu, ku Nengeve ni mu yana. 10 A-Yunda yaya ni kwasa jita ni A-Kanana waze apwile mu Heprone (ku mashimbu a kunyima, mbonge ya Heprone kapwile ni kuyisanyika ngwo, Kiriate-Arpa), ayo yashiha Sheshai, Ahimane ni Talamai.
11 Ayo yanunga ni kwasa jita ni atu a mu Ndebire. (Ku mashimbu a kunyima mbonge ya Ndebire kapwile ni kuyisanyika ngwo, Kiriate-Zefa.) 12 Kalemba yamba ngwenyi: “Lunga yoze makumba Kiriate-Zefa ni kuyitambula, mungumwaha mwanami Aksa akapwe pwo lienyi.” 13 Mba Oteniele, mwana wa Kenaze, mwana-kwo ya Kalemba, yakumba mbonge yacho, chocho Kalemba yamwaha mwanenyi Aksa hanga apwe mukwo-pwo. 14 Muze Aksa te anayi ku zuwo lienyi, yashinjila mukwo-lunga Oteniele hanga ete munda kuli tato. Chocho yasunuka ha chimbulu, mba Kalemba yamuhula ngwenyi: “Yika unazange?” 15 Iye yakumbulula ngwenyi: “Lisesa, nguwahise kama, mumu nwangwaha chihanda cha munda ku uto. Ngwehenu kama nawa mashima a ku Ngolote-Maime.” Chocho, Kalemba yamwaha Mashima a ku Tunda ni ku Mwanda.
16 Mba ana ja Kene, tato-weno ya Mose, hamwe ni A-Yunda, yakanduka yaya ku mbonge ya mingaji mu puya ya Yunda ku uto ya Arata. Ayo yaya, yatwama ni atu a mu mbonge. 17 Alioze, A-Yunda yaya ni A-Simeone, yalukukila A-Kanana waze apwile mu Sefate ni kwanongesa. Chocho yaluka mbonge yacho ngwo, Horoma. 18 Mba A-Yunda yatambula mbonge ya Ngaza ni yihunda yamo, Asekalone ni yihunda yamo ni Ekrone ni yihunda yamo. 19 Yehova kapwile hamwe ni A-Yunda, ayo yatambula chifuchi cha ku milundu, alioze kakahashile kuhuma atu waze te atwama mu chana. Mumu atu jacho kapwile ni matemba a jita waze te akwete makunga a utale. 20 Ayo yahana mbonge ya Heprone kuli Kalemba ngwe chize Mose ambile, Kalemba yahumamo ana atatu a Anake.
21 Alioze A-Mbenjamine kakahumine A-Yepushe waze te atwama mu Yerusaleme. Kashika A-Yepushe atwama mu Yerusaleme hamuwika ni A-Mbenjamine ndo musono.
22 Ha shimbu liacho, akwa-zuwo lia Yosefwe yakanduka hanga ase jita ni Mbetele, Yehova yaakwasa. 23 Akwa-zuwo lia Yosefwe te kanendesa Mbetele (ku mashimbu a kunyima, chihunda chacho kapwile ni kuchivuluka ngwo, Luze), 24 ngendeshi yamona umwe lunga kanakatuka mu mbonge. Ayo yamwamba ngwo: “Lisesa, tulweze kama chize mutuhasa kunjila mu mbonge, kutuchi kakushiha.” 25 Chocho, lunga wacho yaalweza chize mahasa kunjila mu mbonge, ayo yakumba mbonge ni katana, alioze yahichika ni mwono lunga wacho ni asoko jenyi. 26 Lunga wacho yaya ni kutwama mu chifuchi cha A-Hete, yatungamo mbonge. Mbonge yacho yayiluka jina ngwo, Luze, chenacho akuyisanyika ndo musono.
27 A-Manase kakahumine atu a mu Mbete-Shiane ni a mu yihunda yamo, chipwe a mu Tanaka ni a mu yihunda yamo, chipwe A-Ndole ni a mu yihunda yamo, chipwe atu a mu Ibliame ni a mu yihunda yamo, chipwe atu a mu Megidu ni a mu yihunda yamo. A-Kanana yanunga mu chifuchi chacho. 28 Muze A-Izalele apwile ni tachi jinji, yapwisa A-Kanana ngamba ni kwaha milimo yikalu, alioze kakahumine eswe.
29 A-Eframe no kakahumine A-Kanana waze te atwama mu Ngezere. A-Kanana kanungine ni kutwama mu Ngezere hakachi ko.
30 A-Zapulone kakahumine atu waze te atwama mu Kitrone chipwe waze te atwama mu Nahalale. A-Kanana kanungine ni kutwama mukachi ko ngwe ngamba ni kulinga milimo yikalu.
31 A-Ashe kakahumine atu waze te atwama mu Aku, mu Sendone, mu Alaba, mu Akaziba, mu Helaba, mu Afeke, chipwe mu Rehobo. 32 Chocho A-Ashe yanunga mukachi ka A-Kanana waze te atwama mu chifuchi chacho, mumu kakaahumine.
33 A-Napatali kakahumine atu a mu Mbete-Shemeshe, chipwe a mu Mbete-Anate, alioze ayo yanunga ni kutwama mukachi ka A-Kanana waze te atwama mu chifuchi chacho. Atu waze te atwama mu Mbete-Shemeshe ni mu Mbete-Anate yaapwisa ngamba ni kwaha milimo yikalu.
34 A-Amore yahuma A-Ndane ndo ku chifuchi cha milundu, A-Amore kakatayijile hanga A-Ndane apalumuke mu yana. 35 A-Amore kazangile kutwama ku mulundu wa Here, mu Ajalone ni mu Shalabimi. Alioze, muze tachi ja akwa-zuwo lia Yosefwe jokele, A-Amore yaapwisa ngamba ni kwaha milimo yikalu. 36 Ngiza ya A-Amore te yakupalika chize ku mulundu wa Akarabimi ni ku Sela ndo ku tunda.