Ena hiunapu kama ni usona wa kutanga Mbimbiliya, alioze yiuhonga ngwe atu waze twatongola helu? Atu anji kakunyonga ngwo chapwa chikalu kutanga Mbimbiliya. Alioze nyi mulilongesa ngwe Mbimbiliya muyihasa kukukwasa hanga upwe ni chiseke hamwe ni uwahililo unji ku mwono we? Nawa nyi munyingika ngwe kuli yimwe mitapu yize muyikukwasa hanga ululieke kutanga che cha Mbimbiliya? Shina muhasa kusa shimbu hanga ulilongese yize Mbimbiliya yakulongesa?

Atu anji waze te akunyonga ngwo Mbimbiliya yapwa yikalu kuyitanga, hanamono ngwo kuyitanga hichaakwasa chinji ku mwono wo. Tala maliji a amwe akuli ayo:

Ezekiel yoze uli ni miaka kuhiana 20, yamba ngwenyi: “Ami te nakwendesa mwono wami chamwendesela; napwile ngwe ngunendesa mashinyi, alioze kuchishi kunyingika kuze ngunayi. Kutanga Mbimbiliya changukwasa kunyingika kuze ngunatwale mwono wami. Yize Mbimbiliya yakwamba yangukwasa hanga nguhwise yipikalo yami ya tangwa ha tangwa.”

Frieda nawa uli ni miaka kuhiana 20, yalumbununa ngwenyi: “Ami te nakulivutula chinji. Alioze muze naputuka kutanga Mbimbiliya, yingunyingika chize natamba kwehuka uli wami. Chino changukwashile kupwa mutu mwashi kulikata nenyi, nawa haliapwila ami nguli ni masepa anji.”

Eunice yoze uli ni miaka kuhiana 50, yahanjika hakutwala ku Mbimbiliya ngwenyi: “Yinangukwasa kupwa mutu mupema. Napwile ni yimwe yitanga yize te natamba kwalumuna ku mwono wami, haliapwila ngunahase kuchilinga.”

Kutanga Mbimbiliya chalumuna mwono wa atu wano ni wa tununu twa atu akwo. Muyihasa nawa kukukwasa hanga upwe ni mwono upema hamwe ni chiseke. (Izaia 48:​17, 18) Chakutalilaho, muyihasa kukukwasa: (1) ha kukwata yiyulo yipema, (2) kupwa ni masepa apema, (3) kwehuka yipikalo yinji ku mwono, (4) kulilongesa umwenemwene hali Zambi. Yiyulo yamu Mbimbiliya yili ya Zambi. Nyi mukaula yize yakwamba, kuyichi kukutwala mu jila yipi. Mumu Zambi katwamine ni yiyulo yipi.

Kashika chili ni ulemu kuputuka kutanga Mbimbiliya haliapwila. Yika muyihasa kukukwasa hanga uputuke kutanga Mbimbiliya? Kaula yimwe yikuma yize muyihasa kupwisa chashi kutanga Mbimbiliya ni kuwahilila nayo chinji.

Yika muyihasa kukukwasa kuzanga kutanga Mbimbiliya, ni kupwa ni kuyitanga chinji? Kaula yikuma yitano yize hiyinakwase atu anji.

Fupa kupwa ha chihela chize chalita. Eseka kutwama ha chihela chize chalihola, haze kuheshi yuma yize muyihasa kukupinjisa muze unatange. Chuma muchikukwasa chili kupwa ha chihela haze hanatemuka kanawa, nawa haze hanapalika kanawa fuji.

Lulieka manyonga ni mbunge ye. Mbimbiliya yili mukanda uze Tata yetu wamu malilu hanatwehe. Kashika muze unatange Mbimbiliya, watamba kupwa ni nyonga lialita ngwe mwana yoze unazange kulilongesa chinji kuli umwe chisemi yoze wakumuzanga chinji. Nyi ukwete nyonga lipi hakutwala ku Mbimbiliya eseka kwehuka nyonga liacho. Chino muchikukwasa hanga Zambi akulongese.​​—⁠Samu 25:4

Lemba muze kanda uputuka kutanga. Mu Mbimbiliya tunawanemo manyonga ja Zambi. Kashika tunafupiwa ukwaso wenyi mba tunyingike kanawa yize tunatange. Chuma chize muchihasa kutukwasa chili spiritu yisandu. Zambi kanalakenya kuhana “spiritu yisandu kuli waze mamwita” yo. (Luka 11:13) Spiritu yisandu muyihasa kukukwasa hanga unyingike kanawa manyonga ja Zambi. Kulutwe, spiritu yisandu muyazulula manyonga je ni kunyingika chipwe “yuma yikalu ya Zambi.”​​—⁠1 A-Korindu 2:⁠10.

Nyonga ha yize unatange. Kanda utanga wika fuji-fuji hanga uhwise. Fupa kulilongesa ha yize unatange. Chakutalilaho, muhasa kulihula ngwe: ‘Yitanga yika nalilongesa ha lusango wa mutu yoze ngunatange mu Mbimbiliya? Kuchi munguhasa kuzachisa yize nalilongesa mu mwono wami?

Tesa yize mulilongesa. Mashimbu eswe waze mulilongesa Mbimbilliya fupa kunyingika yuma yize muyikukwasa ku mwono we. Hachino, muhasa kulilongesa yikuma yino yinasulaho. ‘Shina unazange kunyingika kanawa utu wa Zambi?’ ‘Kutala unazange kupwa mutu mupema, lunga hanji pwo mupema?’ Nyi chocho, fupa yihanda ya Mbimbiliya yize muyikukwasa kululieka mwono we ha yikuma yacho.a

Haliapwila ena muhasa kunyingika haze muputukila kutanga Mbimbiliya. Alioze yika muhasa kulinga hanga wivwe kuwaha chinji ha kutanga che cha Mbimbiliya? Kaula yimwe yikuma yipema ha mafwo waze masulaho.

Kuchi chapwa kutanga che cha Mbimbiliya? Shina chapwa cha helu-helu nyi chize wakuzanga? Yino yinatale wika ha chize yena mwene wakuzanga kuyitanga. Tutalenu yimwe yikuma yize muyihasa kukukwasa mba uzange ni kuwahilila ha kutanga che cha Mbimbiliya.

Sakula Mbimbiliya yipema nawa yashi kuyitanga. Nyi unatange jimwe sango jize jili ni maliji akalu hanji waze akulu, kota kuuchi kuwahilila kujitanga. Chekwamba ngwo, muze muzanga kutanga Mbimbiliya, fupa Mbimbiliya yize yashi kuyitanga nawa yili ni maliji waze makukwata ku mbunge. Alioze watamba kukanyama, hanga ufupe Mbimbiliya yize yapwa yashi kuyitanga nawa yakulumbununa kanawa.a

Zachisa tecnologia yaha. Ha matangwa wano, Mbimbiliya yili mu mutapu wa mikanda ni mu eletronico. Yena muhasa kutanga Mbimbiliya ha internet hanji kuyisa mu telefone, tablet chipwe computador. Mbimbiliya jimwe mu mutapu wa eletronico jili ni yikuma yipema yakuhengwola nayo kawashi-washi. Chakutalilaho, yena muhasa kutanga ma versu anji a Mbimbiliya waze anahanjika sango jimuwika. Nawa, muhasa kutesa versu jacho mu Mbimbiliya jeka ni jeka. Shina yena wakuzanga kwivwa maliji akukopa a Mbimbiliya, kuhiana kwaatanga? Nyi chocho, Mbimbiliya yili nawa ni maliji akukopa. Atu anji kakuzanga kwivwa maliji akukopa a Mbimbiliya muze ali mu mashinyi hanji muze analingi mulimo ku zuwo lio. Yena kuwazangile kweseka mutapu uno?

Zachisa yikuma ya kulilongesa nayo Mbimbiliya. Mbimbiliya yili ni yikuma yinji yize muyihasa kukukwasa hanga uhase kuyinyingika kanawa. Chakutalilaho, muli mapa waze anasolola yihela yize Mbimbiliya yakutongwola, ayi muyihasa kukukwasa kuwana yihela haze halingiwile yuma yize unatange. Yikuma yikwo yize muyihasa kukukwasa hanga unyingike kanawa yuma yize unatange mu Mbimbiliya, yili ha Kaposhi yono ni ha chikuma chakwamba ngwo: “Malongeso a Mbimbiliya” chize chili mu site jw.org, yikuma yino muyikukwasa hanga unyingike kanawa ulumbunwiso unji wa yihanda ya Mbimbiliya.

Zachisa mitapu yalisa. Shina wakunyenganyana muze munyonga wika kutanga Mbimbiliya yeswe? Mumu liaka kuwatambile wika kuputuka kuyitanga mu mukanda wa Uputukilo? Mba upwe ni zango lia kutanga Mbimbiliya, sakula mikanda ya Mbimbiliya yize wakuzanga chinji kutanga. Chakutalilaho, muhasa kuputuka kutanga sango ja atu alufuma waze ali mu Mbimbiliya. Amwe akuli atu jacho kali ha kasha yinambe ngwo, “Nyingika Amwe Atu Waze Mbimbiliya Yakutongwola.” Hanji muzanga nawa kutanga Mbimbiliya kulita ni chize yuma yapwile ni kulingiwa. Shina kuwazangile kuzachisaho chimwe?

Mbimbiliya hi mukanda wangwaza ko. Sango jamo jinakatuka kuli Sakatanga wetu. (2 Timoteu 3:16) Kashika, sango ja Mbimbiliya mujihasa kutukwasa chinji. Mbimbiliya yinambe ngwo: “Liji lia Zambi mwono lili nawo, kuliakulinga ni tachi.” (A-Hepreu 4:12) Mbimbiliya yili ni ndundo ja kululieka mwono wetu. Kuchi yakuhasa kulinga chocho? Chino chakulingiwa mu mitapu yaali yilemu​—ya kutwaha usongwelo wa tangwa ha tangwa ni kutukwasa hanga tunyingike kanawa Zambi ni yilakenyo yenyi.​—1 Timoteu 4:8; Tiangu 4:8.

Mbimbiliya muyihasa kululieka mwono we haliapwila. Mbimbiliya muyihasa kukukwasa mu yikuma yinji ku mwono we. Yikwete yiyulo yipema hakutwala ku.

• Usepa ni akwetu.—A-Efwesu 4:31, 32; 5:22, 25, 28, 33.

• Manyonga ni misongo.​—Samu 37:8; Yishima 17:22.

• Yitanga yipema.​—1 A-Korindu 6:9, 10.

• Kufupa mbongo ni nyonga lipema.​—Yishima 10:4; 28:19; A-Efwesu 4:28.a

Mba uwane yiyulo yikwo ya Mbimbiliya, yako mu site, jw.org. Mushi lia MALONGESO A MBIMBILIYA > KUMBULULO LIA YIHULA YA MBIMBILIYA.

Amwe akweze waze alimbata kanakawahilila chinji ni ulemu wa yiyulo ya Mbimbiliya. Amu te machilimbachilaho, ayo kapwile ni kapinda munji wakunyingika utu wa umwe ni mukwo ni kuhanjika kanawa. Mba yika yakwaashile? Kukaula yiyulo yize te akutanga mu Mbimbiliya. Lunga, Vicent, yamba ngwenyi: “Yize natangile mu Mbimbiliya yangukwashile kukumba yipikalo mu ulo wetu hakusolola yitanga ya zango. Kukaula shimbi ja mu Mbimbilya, hi chatukwasa kupwa ni uwahililo ku mwono wetu.” Mukwo-pwo Annalou, yamba ngwenyi: “Yilweza ya mu Mbimbiliya yatukwasa chinji ku mwono wetu. Haliapwila tuli ni chiseke mu ulo wetu nawa ngunawahila ha yiyulo yize twatesa mu ulo wetu.” Vicent ni Annalou kakulemesa chinji yiyulo ya mu Mbimbiliya.

Mbimbiliya muyikukwasa kunyingika Zambi. Kuchizako maliji jenyi hakutwala ku ulo, Vicent yamba ngwenyi: “Kutanga Mbimbiliya, chakungukwasa kukundama kuli Yehova kuhiana ku mashimbu akunyima.” Maliji wano kanasolola chimwe chikuma chilemu ngwo​​—⁠Mbimbiliya muyihasa kukukwasa hanga upwe ni usepa upema ni Zambi. Nyi walinga chocho, kuuchi kuyuka wika ku yiyulo yamo, alioze muhasa kupwa ni usepa upema ni Zambi. Nawa muyikukwasa kunyingika yuma yize Zambi analakenya kulutwe lia matangwa, ni mashimbu waze mukawahilila ni “mwono wamwenemwene,” uze kuushi songo. (1 Timoteu 6:19) Chikuma chino kukushi mukanda niumwe uze muuhasa kuchilumbununa.

Nyi mutanga ni kulilongesa Mbimbiliya, ni yena mululieka mwono we haliapwila ni kunyingika kanawa Zambi. Hachino, muze mutanga Mbimbiliya, kota muhasa kulihula yihula yinji. Yino yinakalingiwa kuli umwe lunga yoze watwamine ha miaka 2,000 kunyima. Aye te Ka-Etiopia kapwile ni yihula yinji hakutwala ku yize te akutanga mu Mbimbiliya. Muze amuhulile ngwo, unanyingika yuma yize unatange? Iye yakumbulula ngwenyi, ‘kuchi munguyingika, nyi kukushi niumwe mangusongwela?’b Chocho, yatayiza ni mbunge yeswe ukwaso uze amwehele kuli mutu yoze te wajama ni kulongesa, Fwilipu umwe kambaji ka Yesu ku sekulu yitangu. (Yilinga 8:30, 31, 34) Nyi unazange kunyingika kanawa Mbimbiliya, tunakwite hanga wite longeso lia Mbimbiliya mu site www.pr418.com hanji kusoneka ku chimwe chifuchi ha yize yili mu kaposhi yono. Muhasa nawa kuhanjika ni umwe Chela cha Yehova ha mukala wenu hanji kuya ku Zuwo lia Wanangana. Kashika fupa Mbimbiliya haliapwila, nawa echa hanga yikukwase kululieka mwono we!