Yika Mbimbiliya Yakwamba Ha Kulichata Hanji Kulisoneka ha Mujimba?
Kumbululo Lia Mbimbiliya
Mbimbiliya yakutongola chato hanji kulisoneka ha mujimba chisuho chimuwika ha mukanda wa Ulevi 19:28 unambe ngwo, “Kanda nukachata mijimba yenu.” Zambi kahanyine shimbi yino kuli A-Izalele hanga alise ni atu akwo waze te akulichata hanji kulisoneka majina ni yilayi ya tuzambi two ha mijimba yo. (Shimbi Yamuchiali 14:2) Chipwe ngwe shimbi yize Yehova ahanyine kuli A-Izalele kuyatalile hali Akwa-Kristu musono, nihindu tulieswe twatamba kuhengwola kanawa yize shimbi yacho yinambe.
Shina Mukwa-Kristu katamba kulichata hanji kulisoneka ha mujimba wenyi?
Yisoneko yize mututongola mushi, muyihasa kukukwasa kupwa ni nyonga lialita ha chikuma chino:
“Mapwo aliwahise . . . ni kuhomboka” (1 Timoteu 2:9, Nova Bíblia Americana) Shimbi yino, yinatale hali mapwo ni malunga. Twatamba kulemesa manyonga ja akwetu ni kwehuka kulinga yuma yize muyisolola ngwo twakulilemesa chinji.
Atu amwe kakuzanga kulisolola hanji kupwa ni utuswilo, Akwo kakulichata hanji kulisoneka ha mujimba mumu kakunyonga ngwo mujimba hi wo, kashika ayo akulinga yeswawo anazange. Alioze Mbimbiliya yakukolweza Akwa-Kristu ngwo: “Nutumbikile mijimba yenu mulambu wa mwono, usandu, wa kupemena chikolo kuli Zambi. Chenacho we uvumbiko wenu wakulita ni kunyonga cha mana.” (A-Roma 12:1) Zachisa “kunyonga cha mana” hanga uhengwole mumu liaka unazange kulichata hanji kulisoneka ha mujimba. Nyi ngwe unazange kuchilinga hanga wimbulule yize atu anji akulinga hanji kusolola ngwe uli mu chimwe chizavu, iwuluka ngwe yize mulisoneka ha mujimba muyitwamaho mashimbu anji kuhiana chize mutu akunyonga. Kuhengwola kanawa nyonga lie lia kuzanga kupwa ni chato, muchihasa kukukwasa kukwata yiyulo yipema hakutwala ku chato hanji kulisoneka ha mujimba.—Yishima 4:7.
“Manyonga a yipalakata katwala kukulumbama wika; alioze manyonga a mukwa kulipupula katwala ku kuhona wika.” (Yishima 21:5) Atu anji kakukwata chiyulo cha kulichata hanji kulisoneka ha mujimba kawashi-washi, alioze kulisoneka ha mujimba muchihasa kwonona usepa wetu ni atu amwe hanji mulimo wetu ha miaka yinji. Chikwo nawa kujimuna chato hanji sona jize mutu mafunjika ha mujimba, chakumbata mbongo jinji ni kuneha yikola. Akwa-kuhengwola hamwe ni akwa-mingoso ya kujimuna chato, kakusolola ngwo atu anji waze alisele chato ha mijimba yo, kakwamba ngwo kachi te kakakwachile chiyulo chacho.