LONGESO 12
Yika Muyikukwasa Kununga ni Kulilongesa Mbimbiliya?
Kulilongesa Mbimbiliya chakuneha uwahililo. Alioze ha mashimbu amwe hi chashi ko kuchilinga. Hanji muhasa kulihula nyi muhasa kununga ni kulilongesa Mbimbiliya nyi ka. Mumu liaka chili chilemu kusa tachi hanga ununge ni kulilongesa? Yika muyihasa kukukwasa kunyongonona ni kulilongesa Mbimbiliya chipwe muze mukusoloka yikwiko?
1. Mumu liaka kulilongesa Mbimbiliya chili chilemu?
“Liji lia Zambi mwono lili nawo.” (A-Hepreu 4:12) Mbimbiliya yili yilemu mumu yakusolola manyonga a Zambi ni chize iye akwivwa hali yena. Mbimbiliya muyihasa nawa kukukwasa kupwa ni chinyingi, malinjekela ni kutalatala cha kulutwe lia matangwa. Chahiana ulemu Mbimbiliya muyikukwasa kupwa sepa lia Yehova. Muze unalilongesa Mbimbiliya, uneche hanga ndundo ja Zambi jalumune mwono we.
2. Mumu liaka chili chilemu kunyingika ulemu wa umwenemwene wa mu Mbimbiliya?
Umwenemwene wa mu Mbimbiliya wapwa ngwe kakanga mulemu. Kashika Mbimbiliya yakutukolweza ngwo, “landa umwenemwene, kanda uulanjisa.” (Yishima 23:23) Nyi wanyingika ulemu wa umwenemwene wa mu Mbimbiliya, muosa tachi hanga ununge ni kulilongesawo chipwe muze mukusoloka yikwiko.—Tanga Yishima 2:4, 5.
3. Kuchi Yehova mahasa kukukwasa hanga ununge ni kulilongesa?
Yehova Sakatanga kanda Sepa lie, kanazange chinji hanga ulilongese hakutwala kuli iye. Mahasa kukukwasa ulinge yize unazange. (Tanga A-Fwilipu 2:13.) Kashika, muze mufupiwa ukwaso wa kuzanga kulilongesa Mbimbiliya ni kukaula yize unalilongesa, iye mahasa kukukwasa. Lemba kuli Yehova mashimbu eswe hanga akukwase kununga ni kulilongesa Mbimbiliya.—1 A-Tesalonika 5:17.
NYINGIKA NAWA
Nyingika chize muhasa kununga ni kulilongesa Mbimbiliya chipwe ngwe ukwete milimo yinji hanji chipwe muze akwenu makuhungumiona. Kashika, tala chize Yehova makukwasa hanga ununge ni kulilongesa.
4. Pwisa longeso lie lia Mbimbiliya chuma chilemu ku mwono we
Ha mashimbu amwe muchihasa kusoloka ngwe kuchi kuhasa kulilongesa Mbimbiliya mumu uli ni yuma yinji yakulinga. Yika muyihasa kukukwasa? Tanga A-Fwilipu 1:10, mba nushimutwine yihula yino:
Kuli yena, yuma yika wakumona ngwe yahiana kupema ku mwono we?
Kuchi muhasa kusa longeso lie lia Mbimbiliya kulutwe lia yuma yikwo ku mwono we?
Nyi wazalisa chimwe chikashi ni mavu mba hanyima usemo mawe, mawe jacho kechi kutamo
Nyi walianga kusamo mawe, mumusala chihela cha kusa mavu. Chizechene nawa, nyi wasa “yuma yahiana kupema” ha chihela chitangu ku mwono we, muhasa kulinga yuma yacho ni kupwa ni mashimbu akulinga yuma yikwo
Kulilongesa Mbimbiliya chakukuchisa zala yetu ya ku ufulielo—ni zango lietu lia kunyingika Zambi ni kumuwayila. Tanga Mateu 5:3, mba nushimutwine chihula chino:
Yika twakuyuka muze twakupwisa longeso lia Mbimbiliya chuma chilemu ku mwono wetu?
5. Nyongonona muze makuhungumiona
Ha mashimbu amwe akwenu mahasa kukushinjila hanga ulitwamine kulilongesa Mbimbiliya. Tala chilweza cha Francesco. Tala CHINEMA, mba nushimutwine yihula yinahateho.
Kulita ni chinema, yika masepa ni asoko ja Francesco alingile muze aalwezele ngwenyi kanalilongesa Mbimbiliya?
Yika iye ayukile ha kunyongonona?
Tanga 2 Timoteu 2:24, 25, mba nushimutwine yihula yino:
Kuchi masepa ni asoko je akwivwa amu unalilongesa Mbimbiliya?
Kulita ni versu jino, yika watamba kulinga nyi wamona ngwe atu anji kasolo kuwahilila ni yena hamukunda wa kulilongesa Mbimbiliya? Mumu liaka?
6. Fuliela muli Yehova hanga akukwase
Muze twakukundama kuli Yehova, zango lietu hali iye liakukola. Chipwe chocho muchihasa kupwa chikalu kwalumuna yitanga yimwe ku mwono wetu hanga tutwame kulita ni chize Yehova akuzanga. Nyi mulivwa chocho, kanda uhonga. Yehova makukwasa. Tala CHINEMA, mba nushimutwine yihula yinahateho.
Kulita ni chinema, yuma yika Jim alumwine ku mwono wenyi hanga evwise Yehova kuwaha?
Yuma yika wazanga ha chilweza chenyi?
Tanga A-Hepreu 11:6, mba nushimutwine yihula yino:
Yika Yehova akulinga kuli “waze akumufupa” hanji ngwetu waze akusa tachi hanga amunyingike ni kumuwayila?
Kuchi Yehova akwivwa muze akukumona muosa tachi hanga ulilongese Mbimbiliya?
AMWE MAHASA KUKUHULA NGWO: “Mumu liaka unalilongesa Mbimbiliya?”
Kuchi muhasa kukumbulula?
YIZE WALILONGESA
Chipwe ngwe kulilongesa Mbimbiliya hi chashi ko, nihindu muchikukwasa kuwahilila ku mwono ndo ku miaka ya mutolo. Nunga ni kufuliela muli Yehova, iye kumakuyukisa.
Kuhitulula
Mumu liaka umwenemwene wa mu Mbimbiliya uli ulemu kuli yena?
Kuchi muhasa kupwa ni “shindakenyo ha yuma yahiana kupema”?
Mumu liaka watamba kwita kuli Yehova hanga akukwase kununga ni kulilongesa Mbimbiliya?
HENGWOLA NAWA
Tala majila awana waze anakakwasa atu anji kuzachisa kanawa mashimbu jo.
“Chize Muhasa Kuzachisa Mashimbu je ni Mana” (Laulenu! wa Fevereiro 2014)
Tala chize Yehova akwashile umwe pwo yoze mukwo-lunga te keshi kunyingika mumu liaka pwo lienyi apwile ni kusa tachi hanga alingile Yehova.
Tala chize umwe lunga ayukile ha kunyongonona cha mukwo-pwo.
Yela ja Yehova kanji-kanji kakwalamikiza ngwo, kakuhandununa asoko. Shina chino chili chamwenemwene?
“Shina Yela ja Yehova Kakuhandununa Asoko nyi Kakwanunga?” (Lusango wa ha internet)