Yehova hi Zambi wa chizungozungo ko. (1 A-Korindu 14:33) Kashika, tuvumbi twenyi no kapwa akululieka kanawa. Kuchi akululieka chikungulwila cha akwa-Kristu? Kuchi mutuhasa kukwasa hanga yuma yeswe mu chikungulwila yende kanawa?

1. Mutwe wa chikungulwila iya?

‘Kristu iye mutwe wa chikungulwila.’ (A-Efwesu 5:23) Kukatuka mu malilu, Kristu kanasongwela mulimo uze tuvumbi twa Yehova analingi hashi heswe. Yesu katongwele ‘ndungo wamwenemwene, wakanyama,’ chimwe chizavu chikehe cha makulwana chize tunanyingika musono ngwetu, Chizavu cha Tusongo. (Tanga Mateu 24:45-47.) Musono, Chizavu cha Tusongo chinasongwela yikungulwila yeswe ya hashi ngwe chize apostolo ku sekulu yitangu mu Yerusaleme alingile. (Yilinga 15:2) Alioze malunga wano hi miata a ululikiso wetu ko. O kakukaula usongwelo wa Yehova ni Liji lienyi ni kuzeyela ku wata wa Yesu.

2. Mulimo uka akwete makulwana a mu chikungulwila?

Makulwana a mu chikungulwila kali malunga ajama ku ufulielo. O kakulongesa Mbimbiliya kuli atu ja Yehova ni kwakolweza. Keshi kwafweta ha mulimo uze akulinga. Alioze, kakulihana ene ‘hi ha kwazangisa ko, chipwe hi mukufumbuka ko ku upite wa sonyi, alioze mumu ha zango.’ (1 Petulu 5:1, 2) Makulwana a mu chikungulwila kakwakwasa kuli tuvumbi. Tuvumbi jacho ha kupalika cha mashimbu no mahasa kwatongola apwe makulwana mu chikungulwila.

Chizavu cha Tusongo chakutongola makulwana amwe a mu chikungulwila hanga apwe tulayi a mambonge. O kakumeneka yikungulwila yinji hanga ahane usongwelo ni kutakamisa mandumbu. Tulayi a mambonge e akutongola mandumbu waze akusolola yitanga yize yakufupiwa kulita ni Mbimbiliya mba apwe makulwana ni tuvumbi a mu yikungulwila.—1 Timoteu 3:1-10, 12; Titu 1:5-9.

3. Mulimo uka akwete hita Chela cha Yehova?

Eswe mu chikungulwila ‘kakuhalisa jina lia Yehova’ ha kuhana makumbululo, kulinga pande, yimweso ni kwimba miaso ha kukunguluka cha chikungulwila ni kwambujola sango lipema kulita ni uhashi wo.—Tanga Samu 148:12, 13.

NYINGIKA NAWA

4. Yesu kali mwata mupema

Yesu kanatusanyika ni zango. Tanga Mateu 11:28-30, mba nushimutwine chihula chino:

• Kuchi Yesu anazange hanga tulivwe hakutwala ku wata wenyi?

CHINEMA: Ukwaso wa Makulwana a mu Chikungulwila ku Nepal Kuze Kunakalingiwa Munyiko (4:56)

Mbimbiliya yakulongesa chize makulwana a mu chikungulwila atamba kulinga mulimo wo.

Tanga Izaia 32:2 ni 1 Petulu 5:1-3, mba nushimutwine yihula yino:

• Kuchi wakwivwa ha kunyingika ngwe, makulwana a mu chikungulwila kakutakamisa akwo ngwe chize Yesu akulinga?

• Mu majila akwo aka waze makulwana a mu chikungulwila akwimbulwilamo Yesu?

5. Makulwana a mu yikungulwila kakutulongesa kupalikila mu yilweza yo

CHINEMA: Makulwana a mu Yikungulwila Kakusongwela! (7:39)

Yesu kahichikile chilweza kuli waze ali ni yiteli mu chikungulwila. Tanga Mateu 23:8-12, mba nushimutwine chihula chino:

• Yika yakukukomwesa ha yize Mbimbiliya yakwamba hakutwala kuli makulwana a mu yikungulwila ni yize wakumona kuli mangana a mu mayingeleja?

1. Makulwana a mu yikungulwila kakununga ni kukolesa usepa wo ni Yehova ni kukwasa asoko ni mandumbu jo hanga no achilinge

2. Makulwana a mu chikungulwila kakufunga mandumbu eswe mu chikungulwila

3. Makulwana a mu chikungulwila kakwambujola chinji

4. Makulwana a mu chikungulwila kali alongeshi. O kakukwasa nawa mulimo wa kukomba-komba ni yuma yikwo nawa

6. Mutuhasa kwononokena makulwana a mu chikungulwila

Mbimbiliya yakutukwasa kumona mumu liaka chili chilemu kwononokena makulwana a mu chikungulwila. Tanga A-Hepreu 13:17, mba nushimutwine chihula chino:

• Mumu liaka Mbimbiliya yinambe ngwo twatamba kwononokena ni kuzeyela kuli waze apwa tusongo? Mumu liaka wakumbulula chocho?

Tanga Luka 16:10, mba nushimutwine chihula chino:

• Mumu liaka chili chilemu kwononokena makulwana a mu chikungulwila chipwe ha yuma yize muyisoloka ngwe yikehe-yikehe?

YIZE WALILONGESA

Yesu iye mutwe wa chikungulwila. Yetu twakwononokena makulwana a mu chikungulwila, mumu o kakututakamisa ni kutulongesa kupalikila mu yilweza yo.

Kuhitulula

• Mutwe wa chikungulwila iya?

• Kuchi makulwana a mu chikungulwila akukwasa chikungulwila?

• Mulimo uka akwete hita Chela cha Yehova?

HENGWOLA NAWA

Tala chize Chizavu cha Tusongo ni makulwana a mu chikungulwila akulihulumba hali mandumbu jo musono.

Kukolweza Mandumbu ha Mashimbu a Ukanjiso (4:22)

Nyingika mulimo uze tulayi a mambonge akulinga.

Mwono wa Kalayi wa Mbonge mu Yihunda (4:51)

Tanga hakutwala ku ulemu uze mapwo akwete mu chikungulwila.

“Shina Mapwo Yela ja Yehova Mahasa Kupwa Akwa-Kwambujola?” (Kaposhi wa Kutalila 1 wa Setembro, 2012)

Tala yize makulwana a mu chikungulwila akulinga hanga akwase mandumbu jo.

“Makulwana a mu chikungulwila—‘Yikwashi ya Uwahililo Wetu’” (Kaposhi wa Kutalila 15 wa Janeiro, 2013)

1. Chiyulo chika Mbimbiliya yakuhana kuli malunga?

Yehova hanatongola lunga hanga apwe mutwe wa usoko. (Tanga A-Efwesu 5:23.) Iye kanazange hanga lunga akwate yiyulo yize muyiyukisa usoko wenyi. Mbimbiliya yakutoweza malunga hanga anunge ni ‘kuzanga akwo-mapwo.’ (A-Efwesu 5:25) Yika maliji wano analumbunuka? Lunga yoze ukwete zango kakutwama kanawa ni pwo lienyi chipwe muze ali ku zuwo hanji ha mbunga. Kakumufunga ku manyonga ni kusa tachi hanga amulise ku musunya. (1 Timoteu 5:8) Chahiana ulemu, iye kakumufunga ku ufulielo. (Mateu 4:4) Chakutalilaho, lunga mahasa kulemba ni kutanga Mbimbiliya ni usoko wenyi. Lunga kakukolesa usepa wenyi ni Yehova muze akufunga kanawa mukwo-pwo.—Tanga 1 Petulu 3:7.

Yesu iye Mutwe wa chikungulwila cha akwa-Kristu. (A-Efwesu 5:23) Musono, kukatuka mu malilu, Yesu kanasongwela tumbaji twenyi hano hashi kupalikila muli ‘ndungo wamwenemwene, wakanyama.’ (Tanga Mateu 24:45.) Yesu Kristu katongwele “ndungo” ni kumwaha wata wa kukwata yimwe yiyulo. Chipwe chocho, ndungo wacho kakwononokena Kristu ni kulisa mandumbu jenyi. Ndungo wamwenemwene iya? Kuchi ndungo wacho akutufunga?