Kuchi Kukunguluka ni Yela ja Yehova Muchihasa Kukuyukisa?

Hiunayi kama ha chimwe kukunguluka cha Yela ja Yehova? Nyi ka, nyonga lia kuya ku kukunguluka ha chisuho chitangu mulihasa kukuvwisa woma. Muhasa kulihula ngwe: ‘Yika yakulingiwa ha kukunguluka chacho? Mumu liaka kukunguluka chacho chili chilemu? Mumu liaka natamba kuya ni kukunguluka?’ Ha longeso lino, mulilongesa chize kukunguluka muchihasa ku kukundamisa kuli Zambi ni kukukwasa ku mwono we wa hita tangwa.

1. Mumu liaka Yela ja Yehova akulikungulula hamuwika?

Tala chize mukwa-kusoneka Mbimbiliya asolwele ulemu wa kulikungulula ni akwo hakwamba ngwenyi: “Mu yikungulwila mungufumanyisa Yehova.” (Samu 26:12) Chizechene nawa, Yela ja Yehova a hashi heswe kakulikungulula poso jeswe hanga awayile Zambi, kumwimbila ni kulemba. Mwaka ha mwaka kakupwa ni kukunguluka chinene hanga awayile Zambi.

2. Yika mulilongesa ha kukunguluka chetu?

Ha kukungulula twakulihulikila ha Mbimbiliya. Twakutanga Mbimbiliya ‘ni kuyilumbununa hanga kutanga chilumbunuke.’ (Tanga Nehemia 8:8.) Ha kukunguluka mulilongesa hakutwala kuli Yehova ni yitanga yenyi yipema. Muze mulilongesa chinji ha zango lia Yehova, chino muchikukwasa kukundama kuli iye. Mulilongesa nawa chize Yehova mahasa kukukwasa kupwa ni uwahililo.—Izaia 48:17, 18.

3. Yika muhasa kuyuka ha kukunguluka hamuwika ni atu akwo?

Yehova kanambe ngwenyi, litalenu ‘umwe ni mukwo ni kulikasumuna ku zango ni yitanga yipema. Kanda nwehuka kulikungulula hamuwika.’ (A-Hepreu 10:24, 25) Ha kukunguluka muwanaho atu waze akulihulumba hali umwe ni mukwo, waze akuzanga kulishimwinya yuma yipema ya mu Mbimbiliya. Chizechene ngwe yena, no kanazange kulilongesa hakutwala kuli Zambi. (Tanga A-Roma 1:11, 12.) Chikwo nawa, munyingika atu anji, twamishi hanji waze alimbata akuwahilila chipwe muze anamono lamba. Ayi yili yuma yimwe yize Yehova akutwichila hanga tulikungulule mashimbu eswe!

NYINGIKA NAWA

4. Chize kukunguluka cha Yela ja Yehova chapwa

Ku sekulu yitangu, akwa-Kristu kapwile ni kulikungulula mashimbu eswe hanga awayile Yehova. (A-Roma 16:3-5) Tanga A-Kolosu 3:16, mba nushimutwine chihula chino:

• Kuchi akwa-Kristu apwile ni kuwayila Yehova ku sekulu yitangu?

CHINEMA: Yika Yakupwa mu Zuwo Lia Wanangana? (2:12)

• Chinema chasolola yuma yize yakulingiwa mu Zuwo lia Wanangana. Yuma yika yakulingiwa mu Zuwo lia Wanangana yize yinalifu ni yize watanga ha mukanda wa A-Kolosu 3:16?

• Ha chinema hanji ha chizulie, shina wazangaho chuma chimwe chize chinatale ha kukunguluka?

Tanga 2 A-Korindu 9:7, mba nushimutwine chihula chino:

• Mumu liaka Yela ja Yehova keshi kwita mbongo ha kukunguluka cho?

Tala katalilo wa kukunguluka chize chinakundama hamuwika ni longeshi ye.

• Chihanda chika cha ha kukunguluka chize wakuzanga chinji?

Unachinyingika nyi?

Ha jw.org, muhasa kuwana chihela ni mashimbu waze kukunguluka chakulingiwa hashi heswe.

1. Ha kukunguluka chetu, twakupanjika pande ja mbunga, kutala yimweso ni yinema. Kukunguluka chakuputuka mwaso ni kulemba ni ha kuhwa che chakulingiwa

2. Ha yihanda yimwe ya kukunguluka, mbunga eswe kakuhana makumbululo nyi mazanga

3. Mweswawo mutu mahasa kuya ni kukunguluka—waze alimbata, twamishi, tushinakaji ni twanuke

4. Ha kukunguluka cha Yela ja Yehova, keshi kwitaho mbongo

5. Kuya ku kukunguluka chakufupiwa kusa tachi

Tala chilweza cha usoko wa Yesu. Hita mwaka, o kapwile ni kukatuka ku Nazare ni kuya ku Yerusaleme hanga akawayile mu tembele. Wenyi wacho wapwile ukalu chinji mumu tapalo liapwile ni milundu yinji. Chikwo nawa, wapwile wenyi usuku mumu te kakwenda kilometru 60, hanji kulinga matangwa atatu mba ahete. Tanga Luka 2:39-42, mba nushimutwine yihula yino:

• Ku nyonga lie, shina kulinga wenyi wacho chapwile ni kufupiwa kusa tachi jinji?

• Mumu liaka ni yena watamba kusa tachi hanga uye ku kukunguluka?

• Shina chili lume chilemu kuli yena kuya ku kukunguluka chipwe ngwe muchipwa chikalu? Mumu liaka?

• Mumu liaka twatamba kuya ku kukunguluka mashimbu eswe?

YIZE WALILONGESA

Kuya ku kukunguluka muchikukwasa ulilongese yuma yinji hali Yehova ni kukolesa usepa we ni iye. Chikwo nawa, kukunguluka muchikukwasa kuwayila Yehova hamwe ni atu akwo.

Kuhitulula

• Mumu liaka Yehova anazange hanga tulikungulule?

• Yika mulilongesa ha kukunguluka cha Yela ja Yehova?

• Shina kukunguluka muchihasa kukukwasa nawa mu milali yikwo?

HENGWOLA NAWA

Nyonga lia kuya ku kukunguluka mulihasa kukuvwisa woma. Chino chalingiwile kuli umwe lunga. Tala yize yamukwashile mba azange kukunguluka.

Kutuchi Keza Kavulama Chize Atutambwile (4:16)

Tala chize umwe mukweze azangile kukunguluka ni yize alingile hanga apwe ni kuya ha kukunguluka cheswe.

Yami Nakuzanga Chinji Kukunguluka! (4:33)

Nyingika yize atu akwo akunyonga hakutwala ku kukunguluka.

“Mumu Liaka Chili Chipema Kuya ku Kukunguluka mu Zuwo lia Wanangana?” (Lusango wa ha internet)

Nyingika chize kuya ku kukunguluka cha Yela ja Yehova chalumwine mwono wa umwe lunga yoze wapwile mu chimwe chizavu cha yingalwe.

“Te Chishi Kuhichika Uta Wami” (Kaposhi wa Kutalila 1 wa Julho, 2014)

5. Hashi halumuka chinji chize ha mwaka 1914

Tala CHINEMA.

CHINEMA: Chize ha Mwaka 1914 Hashi Halumuka Chinji (1:10)

Yesu kasolwele yuma yize te muyilingiwa muze mapwa Mwanangana. Tanga Luka 21:9-11, mba nushimutwine chihula chino:

• Yuma yika yize wakumona hanji wakwivwa musono?

Postolo Paulu kasolwele chize atu te mapwa ha matangwa a kusula a kuyula cha atu. Tanga 2 Timoteu 3:1-5, mba nushimutwine chihula chino:

• Yitanga yika yize wakumona kuli atu musono?

6. Kuyula cha Wanangana wa Zambi chatamba kututakamisa

Tanga Mateu 24:3, 14, mba nushimutwine yihula yino:

• Mulimo uka ulemu uze unasolola musono ngwo, Wanangana wa Zambi unayulu?

• Kuchi muhasa kukwasa mulimo wacho?

Wanangana wa Zambi hiunaputuka kuyula, kashika kwasala hakehe hanga uputuke kuyula hashi heswe. Tanga A-Hepreu 10:24, 25, mba nushimutwine chihula chino:

• Yika mutu ni mutu atamba kulinga amu “lie tangwa linakundama”?